AKP ភ្នំពេញ ថ្ងៃទី២៣ ខែកក្កដា ឆ្នាំ២០២៥--

លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី ក្នុងកិច្ចប្រជុំបូកសរុបលទ្ធផលការងារប្រចាំខែកក្កដា ឆ្នាំ២០២៥ និងផ្សព្វផ្សាយសេចក្តីជូនដំណឹងលេខ០១.ប.ប បទបញ្ជា លេខ ០៤ ស.ណ.ន សេចក្តីជូនដំណឹង លេខ ០៥ ស.ណ.និងសេចក្តីជូនដំណឹងលេខ០១៤.ស.ណ.ន របស់អគ្គស្នងការនគរបាលជាតិ នាព្រឹកថ្ងៃទី២៣ ខែកក្កដា ឆ្នាំ២០២៥ បានណែនាំដល់កងកម្លាំងឱ្យបន្តចាត់វិធានការខ្ពស់ក្នុងការ បង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលជាការគំរាមកំហែងដល់សន្តិសុខនៅក្នុងតំបន់ និងក្នុងពិភពលោក។

លោកឧត្តមសេនីយ៍ទោស្នងការបានសង្កត់ធ្ងន់ថា ទាំងការិយាល័យជំនាញ និងតាមបណ្តាអធិការដ្ឋាននគរបាលក្រុង-ស្រុកទាំងអស់ត្រូវយកចិតទុកដាក់ឱ្យបានខ្ពស់ ធ្វើយ៉ាងណារៀបចំចាត់វិធានការ បង្ការ ទប់ស្កាត់ និងប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា រួមទាំងបទល្មើសព្រហ្មទណ្ឌគ្រប់ប្រភេទផងដែរ និងបានជំរុញការអនុវត្តសេចក្តីណែនាំ លេខ ០០៤ សណន ចុះថ្ងៃទី១៤ ខែមិថុនា ឆ្នាំ២០២៥ ស្តីពីវិធានការគ្រប់គ្រង បង្ការ ទប់ស្កាត់ និងបង្ក្រាបបទល្មើស អាវុធជាតិផ្ទុះ  ក្នុងគោលបំណងសំដៅរួមចំណែកថែរក្សា ការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ត្រូវបង្កើននូវការយកចិត្តទុកដាក់ បង្ការ និងបង្រ្កាបនូវបទល្មើសព្រហ្មទណ្ឌ បទល្មើសនៃការជួញដូរគ្រឿងញៀននៅតាមបណ្តាមូលដ្ឋាន បង្កើននូវការយកចិត្តទុកដាក់រាល់ការជួញដូរមនុស្សឆ្លងដែនដោយខុសច្បាប់ ព្រមទាំងបង្កើននូវការយកចិត្តទុកដាក់ធ្វើការបង្រ្កាបបទល្មើសគ្រប់ប្រភេទ រួមទាំងការងារធ្វើអត្តសញ្ញាណប័ណ្ណជូនប្រជាពលរដ្ឋផងដែរ។

ដោយ៖ ចាន់ សុភឿន (ប្រភព៖ ស្នងការនគរបាលខេត្តមណ្ឌលគិរី)