AKPកំពង់ធំ ថ្ងៃទី២៣ ខែកក្កដា ឆ្នាំ២០២៥ -- លោកព្រឹម រដ្ឋាអភិបាលរងខេត្តកំពង់ធំបានលើកឡើងថា  មន្ត្រីរាជការត្រូវបង្កើនសមត្ថភាពនិងអនុវត្តតួនាទីភារកិច្ច របស់ខ្លួនឱ្យបានល្អជាប្រចាំនៅក្នុងឱកាសដែលលោកតំណាងឯកឧត្តមនួន ផារ័ត្ន អភិបាលខេត្តកំពង់ធំ អញ្ជើញជាអធិបតីភាពក្នុងពិធីប្រកាសចូលកាន់តំណែងអភិបាលរងស្រុកស្រុកស្ទោងនាព្រឹកថ្ងៃទី២៣ ខែកក្កដាឆ្នាំ២០២៥នៅអគាររដ្ឋបាលស្រុកស្ទោង។

លោកព្រឹម រដ្ឋាបានមានប្រសាសន៍ថាសាមគ្គីភាពនិងឯកភាពផ្ទៃក្នុងគឺជាភាពចាំបាច់មួយទៀតដែលជួយឱ្យមន្ត្រីរាជការនិងស្ថាប័នអង្គភាពនានាជាពិសេសរដ្ឋបាលស្រុកស្ទោងរួបរួមសហការគ្នាបម្រើសេវាជូនប្រជាពលរដ្ឋនៅក្នុងមូលដ្ឋានក៏ដូចជាអនុវត្តតួនាទីភារកិច្ចជាមន្ត្រីរាជការ ប្រកបដោយគុណភាពប្រសិទ្ធភាពខ្ពស់នៅចំពោះមុខរាជរដ្ឋាភិបាលដែលមានសម្ដេចមហាបវរធិបតីហ៊ុន ម៉ាណែតជានាយករដ្ឋមន្ត្រីក្នុងអាណត្តិទី៧នេះ។ត្រូវមានភាពស្មោះត្រង់ ម្ចាស់ការ គោរពច្បាប់ និងលិខិតបទដ្ឋានគតិយុត្តិពាក់ព័ន្ធដែលរាជរដ្ឋាភិបាលបានបង្កើតឡើងនិងអនុវត្តប្រកបដោយតម្លាភាពហើយប្រាសចាក ជៀសឱ្យផុតពី ការកេងប្រវ័ញ្ចអំពើពុករលួយ ដែលនាំឱ្យអាប់អោនដល់បុគ្គលខ្លួនឯង អង្គភាពស្ថាប័ននិងរាជរដ្ឋាភិបាលនាំឱ្យប្រឈមនឹងទោសទណ្ឌច្បាប់ប្រឆាំងអំពើពុករលួយជាធរមានផងដែរ ហើយត្រូវអនុវត្តរបៀបរបបឬឥរិយាបថការងារ ការលើកទឹកចិត្ត ការបែងចែកភាគលាភ គំរូរូបភាពនិងការស្រលាញ់ចូលចិត្តពីមន្ត្រីក្រោមឱវាទនិងប្រជាពលរដ្ឋនៅក្នុងមូលដ្ឋានផងដែរ។

ក្នុងឱកាសនោះ លោកស្រី ទត គឹមសុភារិន្ទ បានប្ដេជ្ញាចិត្តខ្ពស់ក្នុងការ អនុវត្តតួនាទីភារកិច្ចក្នុងនាមជាអភិបាលរង នៅចំពោះមុខប្រជាពលរដ្ឋក្នុងមូលដ្ឋាននិងរាជរដ្ឋាភិបាលទាំងមូលប្រកបដោយស្មារតីទទួលខុសត្រូវសាមគ្គីភាពផ្ទៃក្នុងនិងជួយឱ្យអង្គភាពស្រុកស្ទោងឱ្យមានការរីកចម្រើនជាលំដាប់។

សូមបញ្ជាក់ថាលោកស្រីទត គឹមសុភារិន្ទត្រូវបានប្រកាសតែងតាំងជាអភិបាលរងស្រុកស្ទោង ជំនួសលោកស្រីហុង ឡាំងហ៊ាង ដែលត្រូវបានផ្លាស់ប្ដូរទៅកន្លែងថ្មី៕

ដោយ៖ ស៊ុម វណ្ណា