AKP សៀមរាប ថ្ងៃទី ២៣ ខែ កក្កដា ឆ្នាំ ២០២៥--ក្រសួងព័ត៌មាននៃព្រះរាជាណាចក្រកម្ពុជា និងវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក(AIBD) បានរៀបចំកម្មវិធីលៀងសាយភោជន៍ និងពិធីប្រគល់ពានរង្វាន់ នៅក្នុងសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ ឆ្នាំ២០២៥ នៅលើទឹកដីអង្គរ ខេត្តសៀមរាប នារាត្រីថ្ងៃទី២២ ខែកក្កដា ឆ្នាំ២០២៥។ 

ការរៀបចំកម្មវិធីលៀងសាយភោជន៍ និងប្រគល់ពានរង្វាន់នេះ ធ្វើឡើងដោយមានការអញ្ជើញចូលរួមពី ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងលោកជំទាវ ទុយ សិរីរតនៈ នេត្រភក្ត្រា ប្រធានកិត្តិយសសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងព័ត៌មាន អភិបាលនៃគណៈអភិបាលខេត្តសៀមរាប លោកស្រី Philomena នាយកប្រតិបត្តិ និងជាអគ្គលេខាធិការ AIBD លោក Gaurav Dwivedi ប្រធាន AIBD ព្រមទាំងថ្នាក់ដឹកនាំ និងតំណាងប្រព័ន្ធផ្សព្វផ្សាយជិត ៣០ប្រទេស ។ 

ក្នុងឱកាសនោះ ឯកឧត្តម នេត្រ ភក្ត្រា បានថ្លែងថា ក្នុងនាមរាជរដ្ឋាភិបាលកម្ពុជា និងក្រសួងព័ត៌មាន សូមចូលរួមអបអរសាទរ AIBD ក្នុងខួបលើកទី២០ នៃការរៀបចំកិច្ចប្រជុំកំពូលប្រព័ន្ធផ្សព្វផ្សាយអាស៊ី។ ឯកឧត្ដមបញ្ជាក់ថា ក្នុងរយៈពេលពីរទសវត្សរ៍កន្លងមកនេះ AMS បានបង្កើតខ្លួនជាព្រឹត្តិការណ៍ដ៏សំខាន់សម្រាប់ការសន្ទនា កិច្ចសហការ និងការច្នៃប្រឌិតនៅក្នុងវិស័យប្រព័ន្ធផ្សព្វផ្សាយ មិនត្រឹមតែនៅក្នុងទ្វីបអាស៊ីប៉ុណ្ណោះទេ ប៉ុន្តែជាសកលផងដែរ។  ឯកឧត្ដមរដ្ឋមន្ត្រីក្រសួងព័ត៌មាន បានសម្ដែងការចូលរួមអបអរសាទរយ៉ាងស្មោះស្ម័គ្រចំពោះបេក្ខជន និងអ្នកឈ្នះពានរង្វាន់ទាំងអស់នៃពានរង្វាន់ប្រព័ន្ធផ្សព្វផ្សាយអន្តរជាតិ AIBD ដែលសមិទ្ធផលរបស់អ្នកទាំងអស់នេះគឺជាសក្ខីភាពនៃស្មារតីច្នៃប្រឌិត ការប្តេជ្ញាចិត្ត និងការរួមចំណែករបស់អ្នកចំពោះសហគមន៍ដែលអ្នកបម្រើ និងឧស្សាហកម្មប្រព័ន្ធផ្សព្វផ្សាយ។

ជាមួយគ្នានេះ ឯកឧត្តម នេត្រ ភក្ត្រា បានបង្ហាញទំនុកចិត្តថា ការតភ្ជាប់ដែលបានធ្វើឡើង និងគំនិតដែលបានផ្លាស់ប្តូរនៅក្នុង សន្និសីទ AMS នឹងមានផលប៉ះពាល់យ៉ាងខ្លាំងទៅលើអនាគតនៃប្រព័ន្ធផ្សព្វផ្សាយនៅក្នុងតំបន់នេះ។ ឯកឧត្ដមរដ្ឋមន្រ្ដីបានបញ្ជាក់ផងដែរថា ចំណេះដឹងដែលបានចែករំលែកនៅលើទឹកដីកម្ពុជា ជាពិសេសទាក់ទងនឹងឧបករណ៍ឌីជីថលថ្មីៗ យន្តការផ្ទៀងផ្ទាត់ និងយុទ្ធសាស្ត្រអក្ខរកម្មប្រព័ន្ធផ្សព្វផ្សាយ ផ្តល់ឱ្យយល់ដឹងជាថ្មី និងវិធីសាស្រ្តជាក់ស្តែង ដើម្បីកសាងការយល់ដឹងជាសាធារណៈ និងពង្រឹងភាពធន់នឹងព័ត៌មានមិនពិត៕

ដោយ៖ មករា រូបថត៖ ឃុត សៅ