AKP កំពង់ស្ពឺ ថ្ងៃទី២៣ ខែកក្កដា ឆ្នាំ២០២៥-- ឯកឧត្ដម កៅ ផល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២២ ខែកក្កដា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សាស្តីពី "មុខដំណាំ និងផលិតផលសក្តានុពល" របស់មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ ដើម្បីរំលេចពីចំណុចវិជ្ជមាន និងអវិជ្ជមាន ក្នុងការរៀបចំផែនការសម្រាប់អនុវត្តបន្ត ដោយមានការអញ្ជើញចូលរួមពីលោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទ ការិយាល័យជំនាញនានានៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ។

ឯកឧត្តម កៅ ផល បានមានប្រសាសន៍ថា កិច្ចប្រជុំនេះធ្វើឡើងក្នុងគោលបំណងរិះរកចំណុចខ្លាំង ចំណុចខ្សោយ បញ្ហាប្រឈមនានា និងការចែករំលែកបទពិសោធន៍ ដើម្បីដាក់ចេញនូវវិធានការដោះស្រាយ គាំទ្រ និងកំណត់សកម្មភាពជាអាទិភាពសំដៅប្រសិទ្ធភាព និងប្រសិទ្ធផលការងារ ឈានឆ្ពោះទៅរកការអភិវឌ្ឍវិស័យកសិកម្មឱ្យកាន់តែរីកចម្រើនថែមទៀត ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល និងគោលនយោបាយ របស់ក្រសួងកសិកម្ម រុក្ខាប្រមាញ់ និងនេសាទ។

ទន្ទឹមនឹងនេះ ឯកឧត្តមអនុរដ្ឋលេខាធិការបានកោតសរសើរ និងវាយតម្លៃខ្ពស់ចំពោះសមិទ្ធផលការងារ ដែលថ្នាក់ដឹកនាំ និងមន្ត្រីរាជការនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺខិតខំប្រឹងប្រែងបំពេញការងារ លះបង់កម្លាំង កាយកម្លាំងចិត្ត ប្រកបដោយស្មារតី ទទួលខុសត្រូវខ្ពស់ក្នុងការបំពេញការងារកន្លងមកដោយទទួលបានផ្លែផ្កាល្អ។

បើតាមឯកឧត្តមអនុរដ្ឋលេខាធិការ ការងារកសិកម្មខេត្តកំពង់ស្ពឺមានការរីកចម្រើនគួរឱ្យកត់សម្គាល់ និងសម្រេចបានលទ្ធផលការងារ ស្របតាមផែនការដែលបានគ្រោងទុក។ តែទោះជាយ៉ាងណា វិស័យនេះក៏នៅជួបបញ្ហាមួយចំនួន ដែលតម្រូវឱ្យមន្ត្រីជំនាញបន្តយកចិត្តទុកដាក់គាំទ្រ និងជំរុញបន្ថែមទៀត។

ឯកឧត្តមអនុរដ្ឋលេខាធិការបានណែនាំឱ្យមន្ទីរកសិកម្ម រុក្ខាប្រមាញ់ និងនេសាទ ត្រូវរៀបចំ និងអនុវត្តផែនការសកម្មភាព និងសូចនាករឱ្យបានច្បាស់លាស់ និងគ្រប់ជ្រុងជ្រោយកាន់តែមានប្រសិទ្ធភាព និងដាក់អាទិភាពឱ្យចំគោលដៅ ឆ្លើយតបទៅនឹងគោលនយោបាយរបស់រាជរដ្ឋាភិបាល និងក្រសួងកសិកម្ម រុក្ខាប្រមាញ់ និងនេសាទ ព្រមទាំងបន្តពង្រឹងសហប្រតិបត្តិការយ៉ាងជិតស្និទ្ធជាមួយអាជ្ញាធរមូលដ្ឋាន និងអ្នកពាក់ព័ន្ធរួមគ្នាជំរុញ និងគាំទ្រកាងារកសិកម្មនៅខេត្តកំពង់ស្ពឺ ឱ្យកាន់តែរីកចម្រើនថែមទៀត ដូចជា ត្រូវកំណត់ឱ្យកាន់តែច្បាស់ពីប្រភេទផលិលតផលកសិកម្ម ដែលមានសក្តានុពល ដោយផ្តោតទៅលើដំណាំ និងសត្វ ត្រូវរៀបចំផែនការផលិតផលិតផលដែលមានស្តង់ដារ ដើម្បីឆ្ពោះទៅកាន់ទីផ្សារជាដើម៕

ដោយ លឹម សាន្ត