AKP សៀមរាប ថ្ងៃទី២៣ ខែកក្កដា ឆ្នាំ២០២៥--ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានថ្លែងបញ្ជាក់ថា ក្នុងរយៈពេលពីរទសវត្សរ៍ កិច្ចប្រជុំនេះបានក្លាយជាវេទិកាដ៏សំខាន់សម្រាប់ការពិភាក្សា កិច្ចសហប្រតិបត្តិការ និងបំណងច្នៃប្រឌិតក្នុងវិស័យព័ត៌មានមិនត្រឹមតែក្នុងអាស៊ីទេ ប៉ុន្តែជាសកលផងដែរ។ ឯកឧត្តមរដ្ឋមន្រ្ដីបានលើកឡើងថា ការជួបជុំគ្នា គឺដើម្បីអបអរសាទរដល់ការលើកកម្ពស់នៃភាពល្អឆ្នើម ដែលជាភស្តុតាងនៃការច្នៃប្រឌិត បំណងការងារ និងការរួមចំណែកដល់សហគមន៍និងឧស្សាហកម្មព័ត៌មានផ្សព្វផ្សាយ។ ការលើកឡើងរបស់ឯកឧត្ដមរដ្ឋមន្រ្ដីបែបនេះ ក្នុងពិធីជប់លៀងផ្លូវការនិងប្រគល់រង្វាន់ជូនគណៈប្រតិភូជាតិនិងអន្តរជាតិដែលបានអញ្ជើញចូលរួមនៅក្នុងសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ នៅខេត្តសៀមរាប នារាត្រីថ្ងៃទី២២ ខែកក្កដា ឆ្នាំ២០២៥។

ឯកឧត្តម នេត្រ ភក្ត្រា បានមានប្រសាសន៍ថា សន្និសីទកំពូលប្រព័ន្ធផ្សព្វផ្សាយអាស៊ី (Asia Media Summit-AMS) នឹងជះឥទ្ធិពលចំពោះអនាគតរបស់វិស័យព័ត៌មាននៅក្នុងតំបន់និងពិភពលោក ធ្វើឱ្យប្រជាពលរដ្ឋទទួលបាននូវព័ត៌មានដែលមានគុណភាព ធានាបាននូវសិទ្ធិទទួលព័ត៌មានគ្រប់ជ្រុងជ្រោយ រួមទាំងការទប់ស្កាត់ព័ត៌មានក្លែងក្លាយ។ ឯកឧត្តមបានបន្ដថា ការទាក់ទង និងការផ្លាស់ប្តូរខាងគំនិតនៅក្នុងកិច្ចប្រជុំ AMS នេះ នឹងជះឥទ្ធិពលយ៉ាងខ្លាំងចំពោះអនាគតរបស់វិស័យព័ត៌មាននៅក្នុងតំបន់របស់យើង។ ឯកឧត្ដមរដ្ឋមន្រ្ដីបានបន្ថែមថា៖ «ចំណេះដឹងដែលត្រូវបានចែករំលែកក្នុងថ្ងៃនេះ ជាពិសេសអំពីឧបករណ៍ឌីជីថលថ្មីៗ វិធីសាស្ត្រផ្ទៀងផ្ទាត់ព័ត៌មាន និងយុទ្ធសាស្ត្រចែកចាយចំណេះដឹងឌីជីថល បានផ្តល់នូវការយល់ដឹងថ្មីៗ និងវិធីសាស្ត្រប្រកបដោយប្រសិទ្ធភាពក្នុងការបង្កើនការយល់ដឹងសាធារណៈ និងការតស៊ូប្រឆាំងនឹងព័ត៌មានក្លែងក្លាយ។ បន្ថែមពីនោះ នៅក្នុងកិច្ចប្រជុំថ្ងៃនេះ ក៏បានបញ្ចេញចំណុចសំខាន់ជាច្រើន ដែលទាក់ទងនឹងគោលបំណងធំបំផុតដែលយើងស្វែងរកនៅក្នុងសន្និសីទដែលនឹងបន្ត»។

សូមជម្រាបជូនថា ក្នុងឱកាសនោះកិច្ចប្រជុំ AMS នេះដែរ ក៏បានប្រគល់ពានរង្វាន់អន្តរជាតិ AIBD ឆ្នាំ២០២៥ ដោយម្ចាស់ជ័យលាភី សម្រាប់កម្មវិធីទូរទស្សន៍ល្អបំផុត បានទៅលើទូរទស្សន៍ KBS របស់សាធារណរដ្ឋកូរ៉េ ដែលបានដាក់កម្មវិធីមានចំណងជើងថា “ភ្នំភ្លើងនឹងពួកយើង-ភ្នំយ៉ាស៊ូ”, កម្មវិធីវិទ្យុល្អបំផុត បានទៅលើវិទ្យុជាតិកម្ពុជា ដែលបានដាក់កម្មវិធីមានចំណងជើងថា “ប្រាសាទភ្នំដា ជាទីកំណើតប្រជាជនខ្មែរ”។ ចំពោះពានរង្វាន់និរន្តរភាព និងបច្ចេកវិទ្យាបៃតង: ដំណោះស្រាយកាកសំណល់ បានទៅលើ ទូរទស្សន៍ និងវិទ្យុ MRTV ដែលកម្មវិធីមានចំណងជើងថា “ការកែប្រែសំរាម ដើម្បីភាពប្រសើរនៅថ្ងៃស្អែក” និងពានរង្វាន់គណៈវិនិច្ឆ័យប្រព័ន្ធផ្សព្វផ្សាយអន្តរជាតិ AIBD ឆ្នាំ២០២៥ បានទៅលើ វិទ្យុសំឡេង វៀតណាម (VOV) ដែលកម្មវិធីមានចំណងជើងថា “ដីល្អទាក់ទាញសត្វបក្សី”។

ក្នុងកិច្ចសន្និសីទកំពូលនេះដែរ ក៏មានការចូលរួមពីគណៈប្រតិភូចំនួន៣៦ប្រទេស និងអ្នកសារព័ត៌មានមកពី២៦ប្រទេស ដែលនេះក៏ជាឱកាសក្នុងការផ្សព្វផ្សាយពីប្រទេសកម្ពុជា ជាពិសេសក្ដានុពលទេសចរណ៍នៅក្នុងខេត្តសៀមរាប ទៅកាន់ពិភពលោក៕

ដោយ៖ ឃុត សៅ