AKP កំពង់ធំ ថ្ងៃទី២៣ ខែកក្កដា ឆ្នាំ២០២៥-- ឯកឧត្តម រស់ សារាំ ព្រះរាជអាជ្ញានៃអយ្យការអមសាលាដំបូងខេត្តកំពង់ធំ កាលពីថ្ងៃទី២២ ខែកក្កដា ឆ្នាំ២០២៥ បានដឹកនាំកិច្ចប្រជុំផ្សព្វផ្សាយអំពីកិច្ចប្រជុំបូកសរុបលទ្ធផលរយៈពេល០៦ខែ ឆ្នាំ២០២៥នៃការអនុវត្តយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ យុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការដែលបានប្រព្រឹត្តទៅកាលពីថ្ងៃទី១៥ ខែកក្កដា ឆ្នាំ២០២៥ នៅទីស្តីការក្រសួងយុត្តិធម៌ ក្រោមអធិបតីភាពដ៏ខ្ពង់ខ្ពស់របស់ឯកឧត្តម កើត រិទ្ធ ឧបនាយករដ្ឋមន្ត្រី និងជារដ្ឋមន្ត្រីក្រសួងយុត្តិធម៌។ ក្នុងកិច្ចប្រជុំផ្សព្វផ្សាយនេះមានការអញ្ជើញចូលរួមពីព្រះរាជអាជ្ញារង និងក្រឡាបញ្ជីនៃអយ្យការអមសាលាដំបូងខេត្តកំពង់ធំ។

ក្នុងឱកាសនោះ ឯកឧត្តមព្រះរាជអាជ្ញាបានកោតសរសើរ និងថ្លែងអំណរគុណដល់ចៅក្រម ព្រះរាជអាជ្ញារង ក្រឡាបញ្ជី និងមន្រ្តីនៃលេខាធិការដ្ឋានរដ្ឋបាលទាំងអស់ដែលបានខិតខំប្រឹងប្រែងអនុវត្តតួនាទី ភារកិច្ចរបស់ខ្លួន ដោយការយកចិត្តទុកដាក់ និងការទទួលខុសត្រូវខ្ពស់ចូលរួមចំណែកក្នុងការអនុវត្តយុទ្ធនាការខាងលើនៅសាលាដំបូង និងអយ្យការអមសាលាដំបូងខេត្តកំពង់ធំ ទទួលបានលទ្ធផលល្អប្រសើរ ដោយបានចំណាត់ថ្នាក់លេខ៣ នៅទូទាំងប្រទេស។ ត្រូវពង្រឹង និងបន្តអនុវត្តយុទ្ធនាការនេះសម្រាប់រយៈពេលនៅសល់០៦ខែទៀតក្នុងឆ្នាំ២០២៥។ ចំពោះសំណុំរឿងចាស់ឆ្នាំ២០២៤ដែលនៅសេសសល់កំពុងចាត់ការ ត្រូវធ្វើយ៉ាងណាចាត់ការដោះស្រាយឱ្យបានរួចរាល់ទាំងស្រុងក្នុងដំណាច់ឆ្នាំ២០២៥ ខាងមុខនេះ។ ចំពោះសំណុំរឿងព្រហ្មទណ្ឌអាទិភាពទាំង៤ (គ្រឿងញៀន ចរាចរណ៍ ក្មេងទំនើងនិងឆបោកតាមប្រព័ន្ធបច្ចេកវិទ្យា Online Scams) ត្រូវពិនិត្យឱ្យបានត្រឹមត្រូវច្បាស់លាស់ ម៉ឺងម៉ាត់ យុត្តិធម៌ តម្លាភាព និងឆាប់រហ័ស។

ឯកឧត្តម រស់ សារាំ ព្រះរាជអាជ្ញានៃអយ្យការអមសាលាដំបូងខេត្តកំពង់ធំ បានជំរុញ និងលើកទឹកចិត្តមន្ត្រីទាំងអស់ ត្រូវបន្តអនុវត្តតួនាទីនិងភារកិច្ចរបស់ខ្លួនឱ្យបានខ្ជាប់ខ្ជួន ប្រកបដោយក្រមសីលធម៌វិជ្ជាជីវៈ និងត្រូវបំពេញបន្ថែមនូវចំណុចខ្វះខាតទាំងឡាយ ដើម្បីធានាប្រសិទ្ធភាពនៃការបម្រើសេវាយុត្តិធម៌ជូនប្រជាពលរដ្ឋឱ្យបានទាន់ពេលវេលា៕

ដោយ ស៊ុម វណ្ណា (ប្រភព៖ សាលាដំបូងខេត្តកំពង់ធំ)