AKP កណ្ដាល ថ្ងៃទី២៣ ខែកក្កដា ឆ្នាំ២០២៥–សម្តេច​មហាបវរធិបតី​ ហ៊ុន ម៉ា​ណែ​ត នាយករដ្ឋមន្ត្រី​នៃព្រះរាជាណាចក្រ​កម្ពុជា​ នាព្រឹកថ្ងៃទី២៣ ខែកក្កដា ឆ្នាំ២០២៥នេះ អញ្ជើញជាអធិបតី ក្នុងពិធីសម្ពោធជាផ្លូវការ មជ្ឈមណ្ឌល ផ្កាឈូក របស់អង្កការ មូលនិធិកុមារកម្ពុជា ស្ថិតនៅសង្កាត់ព្រែកហូរ ក្រុងតាខ្មៅ ខេត្តកណ្តាល។

អង្គភាពការពារកុមារ បានចាប់ផ្តើមជាមួយនឹងទស្សនវិស័យមួយ៖ គឺដើម្បីផ្តល់ឱ្យកុមារគ្រប់រូបនៅក្នុងប្រទេសកម្ពុជា នូវសិទ្ធិជាមូលដ្ឋាន ទទួលបានបរិយាកាសមួយដែលមានសុវត្ថិភាព និងការថែទាំ​ ដើម្បីទទួលបាននូវការលូតលាស់។

អង្គភាពការពារកុមារ ​គឺជាជាដៃគូតែមួយគត់របស់នគរបាលជាតិកម្ពុជា ដែលបានចាប់ផ្តើមការងាររបស់ខ្លួននៅឆ្នាំ ២០១៣ ជាមួយនឹងការសន្យាមួយ ជួយដល់កុមាររងគ្រោះដោយការរំលោភបំពាន នូវសេវាកម្មដែលមានកម្រិតខ្ពស់បំផុត។

ឥឡូវនេះ អង្គភាពការពារកុមារ - CPU - ឈានដល់ឆ្នាំទី ១២ របស់ខ្លួន​ក្នុងការ បន្តខិតខំប្រឹងប្រែង ធ្វើការងារយ៉ាងសស្រាក់សស្រាំ ដើម្បីគោរពនូវការសន្យាមួយនេះ។

ដោយបានធ្វើការជាមួយនគរបាលកម្ពុជា អង្គភាពមួយនេះ បានក្លាយទៅជាកម្លាំងដ៏មហិមាមួយ ដើម្បីការពារជនងាយរងគ្រោះ ផ្តល់សំឡេងដល់អ្នកគ្មានសំឡេង និងស្វែងរកយុត្តិធម៌ជូនជនរងគ្រោះ។

ឥឡូវនេះ​ អង្គភាពការពារកុមារ ត្រូវបានគេទទួលស្គាល់ថា ជាអ្នកដឹកនាំក្នុងការស៊ើបអង្កេតឧក្រិដ្ឋកម្មកំរិតធ្ងន់ដែលប្រព្រឹត្តទៅលើកុមារ។

នៅពេលដែលការគំរាមកំហែង តាមអ៊ីនធឺណិតទៅលើកុមារចេះតែកើនឡើង ការការពារកុមារកាន់តែ​មានភាពបន្ទាន់ជាងពេលណាៗទាំងអស់។

កំពុងតែប្រឈមមុខនឹងបញ្ហានេះដោយផ្ទាល់ ជាមួយនឹងការបើក ​មជ្ឈមណ្ឌល ផ្កាឈូក ដែលជាកន្លែងដំបូងបង្អស់តែមួយគត់សម្រាប់ដោះស្រាយ​ ការប្រឈមនេះ នៅក្នុងប្រទេសកម្ពុជា។

នេះគឺជាមជ្ឈមណ្ឌលលំដាប់ពិភពលោក ដែលនឹងក្លាយជាផ្ទះរបស់ក្រុម​ការងារប្រឆាំងនឹងឧក្រិដ្ឋកម្ម​អ៊ិនធឺណិតទៅលើ​កុមារ​នៅ​កម្ពុជា។ មជ្ឈមណ្ឌលនេះ ​នឹង​ដាក់​ប្រទេស​កម្ពុជា​ជា​ចំណុច​កណ្តាល ​នៃ​ការ​ប្រយុទ្ធ​ប្រឆាំង​នឹង​អ្នក​ដែល​ព្យាយាម​ធ្វើ​បាប​កុមារ។

មជ្ឈមណ្ឌលនេះ នឹងកំណត់ស្តង់ដារថែទាំមួយសម្រាប់កុមាររងគ្រោះ ក្នុងប្រទេសកម្ពុជា។ វាជាទីកន្លែងមួយ ដែលជនរងគ្រោះដែលនៅរស់រានមានជីវិតទទួលបាននូវការយកចិត្តទុកដាក់ដោយសេចក្តីថ្លៃថ្នូរ  និងការគោរព។

មជ្ឈមណ្ឌល ផ្កាឈូក ត្រូវបានបង្កើតឡើងជាពិសេសដើម្បីផ្តល់នូវសេវាកម្ម​ដែលមានកម្រិតខ្ពស់ ទៅដល់កុមាររងគ្រោះ នៅក្នុងបរិយាកាសមួយដែលមានសុវត្ថិភាព ការថែទាំ និងការគាំទ្រ។  ការរចនារបស់មជ្ឈមណ្ឌលនេះ ត្រូវបានទទួលកា​រកោតសរសើរពីដៃគូអន្តរជាតិ ហើយត្រូវបានគេពិពណ៌នាថាជាគំរូរួមមួយ ដែលអាចយកទៅចម្លងជាអន្តរជាតិ។

សូមរម្លឹកថា កាលពីឆ្នាំមុន មូលនិធិកុមារកម្ពុជាបានប្រារព្ធខួប២០ឆ្នាំនៃការផ្លាស់ប្តូរជីវិត ពោលគឺរយៈពេលពីរទសវត្សរ៍ ដែលបានខិតខំប្រឹងប្រែងផ្តល់ដល់កុមារ និងក្រុមគ្រួសារពួកគេ ដែលរស់នៅតំបន់ស្ទឹងមានជ័យ នូវក្តីសង្ឃឹមសម្រាប់អនាគតដ៏ត្រចះត្រចង់មួយ។ ចាប់ផ្តើមជាមួយកុមារីតែម្នាក់គត់ ជាមួយនិងក្តីសុបិនមួយ​ដែលចង់ផ្តល់ឱ្យនាង នូវជីវិតមួយដែលប្រសើរ៕

ដោយ៖ គង់ សិរីរ័ត្ន