AKP ភ្នំពេញ ថ្ងៃទី២២ ខែកក្កដា ឆ្នាំ២០២៥-- អនុរដ្ឋមន្ត្រីការបរទេសសាធារណរដ្ឋអាស៊ែបៃហ្សង់ ឯកឧត្តម Elnur Mammadov បានរំពឹងថា ទំនាក់ទំនងកម្ពុជា-អាស៊ែបៃហ្សង់ នឹងត្រូវបានពង្រឹងបន្ថែមតាមរយៈកិច្ចសហប្រិតបត្តិការលើវិស័យកសិកម្ម ទេសចរណ៍ សេដ្ឋកិច្ច ការដោះមីន អប់រំ ជាពិសេសការផ្លាស់ប្ដូររវាងប្រជាជន និងប្រជាជន ខណៈដែលប្រទេសទាំងពីរមានទំនាក់ទំនងការទូតជាមួយគ្នាអស់រយៈពេលជាង៣០ឆ្នាំ។

ថ្លែងនៅក្នុងជំនួបអ្នកកាសែតនៅថ្ងៃទី២២ ខែកក្កដា ឆ្នាំ២០២៥ ឯកឧត្តម Elnur Mammadov អនុរដ្ឋមន្ត្រីការបរទេសសាធារណរដ្ឋអាស៊ែបៃហ្សង់ បានលើកឡើថា គោលបំណងសំខាន់នៃដំណើរទស្សនកិច្ចរបស់លោកមកកាន់កម្ពុជា គឺដើម្បីធ្វើការពិគ្រោះយោបល់នយោបាយជុំទី៤ រវាងរដ្ឋមន្ត្រីការបរទេសនៃប្រទេសជាមិត្តទាំងពីរ។ បន្ថែមពីនេះ គឺស្វែងរកឱកាសសហការជាមួយកម្ពុជាលើវិស័យកសិកម្ម ទេសចរ សេដ្ឋកិច្ច ការដោះមីន ជាពិសេសវិស័យអប់រំ។

ឯកឧត្តមបានថ្លែងថា៖ “យើងមានការផ្លាស់ប្ដូរនិស្សិតល្អណាស់តាំងពីសម័យសូវៀត។ ឥឡូវនេះ យើងផ្តល់អាហារូបករណ៍ដល់និស្សិតកម្ពុជាជារៀងរាល់ឆ្នាំ ហើយយើងផ្តល់អាហារូបករណ៍ចំនួន ១០០ទៅប្រទេសផ្សេងៗ រួមទាំងកម្ពុជាផងដែរ។ យើងសង្ឃឹមថា និស្សិតកម្ពុជាកាន់តែច្រើននឹងទទួលបានអត្ថប្រយោជន៍ពីអាហារូបករណ៍នេះ ហើយពួកគេនឹងបានសិក្សានៅសាកលវិទ្យាល័យឈានមុនគេរបស់អាស៊ែបៃហ្សង់ ដែលភាគច្រើនមានកម្រិតអប់រំថ្នាក់អន្តរជាតិ”។ 

ជាមួយគ្នានេះដែរ ឯកឧត្តមបានបញ្ជាក់ថា ក្នុងជំនួបជាមួយក្រសួងការបរទេសកម្ពុជា ភាគីទាំងពីរបានកំណត់កិច្ចសហការសំខាន់ៗ ដើម្បីពង្រឹងទំនាក់ទំនងរបស់ប្រទេសទាំងពីរបន្ថែម ដោយក្នុងនោះគឺការផ្លាស់ប្ដូររវាងប្រជាជន និងប្រជាជន។ ចំពោះការផ្លាស់ប្ដូររវាងប្រជាជន និងប្រជាជន រវាងកម្ពុជា និងអាស៊ែបៃហ្សង់ គឺមានការផ្លាស់ប្ដូរវាងបណ្ឌិតសភាការទូត និងការផ្លាស់ប្ដូរតាមរយៈការអប់រំ។

ឯកឧត្តមថ្លែងថា៖ “យើងបានទទួលអ្នកការទូតមកពីក្រសួងការបរទេសកម្ពុជា ចូលរួមសិក្ខាសាលា និងការបណ្ដុះបណ្ដាលផ្សេងៗ ដែលរៀបចំដោយរដ្ឋមន្ត្រីក្រសួងការបរទេស និងបណ្ឌិតសភាការទូតរបស់យើង ដែលពួកគេបានសិក្សាលើវិស័យផ្សេងៗរួមទាំងទំនាក់ទំនងអន្តរជាតិផងដែរ។ ហើយយើងបានអញ្ជើញមន្ត្រីការទូតមកពីរដ្ឋមន្ត្រីក្រសួងការបរទេសគ្រប់ប្រទេសរួមទាំងកម្ពុជា ដែលនេះជាផ្នែកមួយនៃកម្មវិធីពង្រឹងការទូតបរទេស ដែលយើងធ្វើជារៀងរាល់ឆ្នាំ”។ 

ដោយចំពោះការផ្លាស់ប្ដូរតាមរយៈការអប់រំ ឯកឧត្តមបានលើកឡើងថា វាជាផ្នែកមួយនៃកម្មវិធីជំនួយ ដែលអាស៊ែបៃហ្សង់បានផ្ដល់អាហារូបករណ៍ជារៀងរាល់ឆ្នាំរយៈពេល ៥ឆ្នាំ ចំពោះនិស្សិតទាំងអស់ មកពីជុំវិញពិភពលោករួមទាំងកម្ពុជាផងដែរ។

ឯកឧត្តមថ្លែងថា៖ “យើងមិនមានកូតាសម្រាប់សិស្សនៅតាមប្រទេសនីមួយៗទេ ប៉ុន្តែសម្រាប់អាហារូបករណ៍ គឺយើងជ្រើសរើសបេក្ខជនដោយឈរលើមូលដ្ឋានប្រកួតប្រជែង ហើយជ្រើសរើសបេក្ខជនដែលមានជំនាញល្អ និងប្រវត្តិល្អបំផុត។ កាលពីមុន យើងមាននិស្សិតមកពីប្រទេសកម្ពុជាដូចគ្នា ខ្ញុំមិនអាចនិយាយបានថាពួកគេសិក្សាជំនាញណាទេ ព្រោះខ្ញុំមិនមានព័ត៌មាននេះ ប៉ុន្តែជាទូទៅ យើងលើកទឹកចិត្តឱ្យសិស្សកាន់តែច្រើន”។ 

ឯកឧត្តមបានគូសបញ្ជាក់ថា សាកលវិទ្យាល័យមួយចំនួនរបស់អាស៊ែបៃហ្សង់ គឺស្ថិតក្នុងចំណាត់ថ្នាក់ពិភពលោក និងជាប់ចំណាត់ថ្នាក់ខ្ពស់ ដូច្នេះហើយលោកជឿជាក់ថា ប្រសិនបើប្រៀបធៀបតម្លៃ និងការចំណាយផ្សេងៗ ការសិក្សានៅអាស៊ែបៃហ្សង់គឺជាសំណើរដ៏ល្អមួយ។ 

ឯកឧត្តមថ្លែងថា៖ “វាជាសំណើដែលមានតម្លៃល្អណាស់ សម្រាប់ប្រជាជនដែលមកសិក្សានៅទីនេះ។ ដូច្នេះ យើងគ្រោងនឹងឲ្យរដ្ឋមន្ត្រីក្រសួងអប់រំរបស់យើង ទាក់ទងនឹងរដ្ឋមន្ត្រីក្រសួងអប់រំកម្ពុជា ដើម្បីឲ្យពួកគេសហការគ្នាយ៉ាងជិតស្និទ្ធដើម្បីសម្រួលដល់ការផ្លាស់ប្តូរនេះ”។

គួរបញ្ជាក់ដែរថា ឯកឧត្តម Elnur Mammadov បានធ្វើដំណើរទស្សនកិច្ចមកកាន់កម្ពុជារយៈពេល២ថ្ងៃ ចាប់ពីថ្ងៃទី២១ដល់ថ្ងៃទី២២ ខែកក្កដា ឆ្នាំ២០២៥។ ប្រទេសកម្ពុជា-អាស៊ែបៃហ្សង់ បានផ្សារភ្ជាប់ទំនាក់ទំនងការទូតជាមួយគ្នាអស់រយៈពេលជាង៣០ឆ្នាំមកហើយ៕

ដោយ៖ ស្រីពេជ្រ