AKP ភ្នំពេញ ថ្ងៃទី២២ ខែកក្កដា ឆ្នាំ២០២៥-- ឯកឧត្ដម ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សរាជធានីភ្នំពេញបានបញ្ជាក់ដល់អាជ្ញាធរខណ្ឌដូនពេញ ត្រូវរៀបចំសណ្តាប់ធ្នាប់ និងបរិស្ថានឱ្យបានស្អាតនៅតាមផ្លូវឌឿងហែម ក្នុងមូលដ្ឋានខ្លួនកុំចាំដល់ពេលមានអាសន្ន ដូចជាភ្លើងឆេះ ឡានទឹកចូលអន្ដរាគមអតបានទើបរៀបចំនោះ។ ឯកឧត្ដម ឃួង ស្រេង បានបញ្ជាក់បែបនេះក្នុងពិធីជួបសំណេះសំណាលជាមួយសមាជិកសមាជិកាគណបក្សប្រជាជនកម្ពុជាសង្កាត់ផ្សារថ្មីទី២ ខណ្ឌដូនពេញ នៅរសៀលថ្ងៃអង្គារ ទី២២ ខែកក្កដា ឆ្នាំ២០២៥។

ក្នុងឱកាសនោះ ចៅសង្កាត់ផ្សារថ្មីទី២បានបញ្ជាក់ថា សមិទ្ធផលការងារ និងកិច្ចការពារសន្តិសុខ សុវត្ថិភាពជូនប្រជាពលរដ្ឋ ជាមួយការស្នើសុំការជួយស្ថាបនាជណ្តើររួមរបស់ប្រជាពលរដ្ឋ កម្ពស់៤ទៅ៥ជាន់ ចំនួន៧ខ្សែ ដែលមានសភាពចាស់ទ្រុឌទ្រោម។ ជាមួយការប្តេជ្ញាចិត្ត ក្នុងការកសាងសមាជិកបក្សឱ្យមានសន្ទុះខ្លាំងឡើងទៅតាមផែនការដែលបក្សបានដាក់ចុះ ដើម្បីឈានទៅយកជ័យជម្នះក្នុងការបោះឆ្នោត នៅឆ្នាំ២០២៧-២០២៨ខាងមុខនេះ។

ឯកឧត្ដម ឃួង ស្រេង បានលើកឡើងថា ប្រធានគណៈកម្មាធិការគណបក្សប្រជាជនកម្ពុជា ខណ្ឌដូនពេញ ត្រូវពិនិត្យមើលពីតម្រូវការចាំបាច់របស់ប្រជាពលរដ្ឋនៅក្នុងមូលដ្ឋាន ដូចជាការបំពាក់អំពូលភ្លើងនៅតាមផ្លូវឌឿងហែម តាមជណ្តើរឡើងរួម ជួសជុលផ្លូវ ដាក់លូជាដើម។ចំពោះការស្នើសុំជួសជុលជណ្តើររួមរបស់ប្រជាពលរដ្ឋចំនួន៧ខ្សែ យើងត្រូវតែជួសជុលជូនពួកគាត់ហើយ។ ការរៀបចំសណ្តាប់ធ្នាប់និងបរិស្ថាននៅតាមផ្លូវឌឿងហែមក៏ជាការងារដែលត្រូវតែធ្វើ។យើងមិនមែនមិនឱ្យពួកគាត់លក់ដូនោះទេ តែការលក់ដូរត្រូវតែមានសណ្តាប់ធ្នាប់ និងបរិស្ថានល្អ គឺលក់ដូរហើយ គ្មានសំរាម ហើយនៅពេលមានអគ្គិភ័យកើតឡើងរថយន្តអគ្គិភ័យអាចចូលទៅបាញ់ពន្លត់បាន។

ឯកឧត្ដម ឃួង ស្រេង បានបន្តថា គណបក្សប្រជាជនកម្ពុជាទទួលបានជ័យជម្នះរហូតមកគឺ ដោយសារយើងមានថ្នាក់ដឹកនាំឆ្នើមនោះ គឺសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជានិងបន្តមកសម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជានិងជានាយករដ្ឋមន្ត្រី និងដោយមានការចូលរួម ដែលមិនអាចខ្វះបានពីសមាជិក សមាជិកាបក្សនៅតាមមូលដ្ឋាននេះឯង។ មហិច្ឆតាដ៏ធំរបស់គណបក្សប្រជាជនកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន និងបន្តមកសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី គឺចង់ឱ្យប្រទេសកម្ពុជាក្លាយជាប្រទេសអ្នកមាននៅឆ្នាំ២០៥០ ដែលជាក្តីស្រមៃរបស់ប្រជាជននៅលើពិភពលោក។ យើងពិតជាទៅដល់ដោយប្រទេសយើងម្ចាស់ការលើសេដ្ឋកិច្ចខ្លួនឯងតាមផ្លូវទឹកលែងពឹងពាក់ដង្ហើមគេដកទៀត ហើយក្រោយយើងមានព្រែកជីកហ្វូណនតេជោ។ គម្រោងព្រែកជីកហ្វូណនតេជោនេះ សម្តេចអគ្គមហាសេនាបតីតេជោ ហ៊ុន សែន ជាអ្នកផ្ដួចផ្ដើមគំនិតកសាងហើយត្រូវបានបើកការដ្ឋានសាងសង់កាលពីថ្ងៃទី០៥ ខែសីហា ឆ្នាំ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា៕

ដោយ សួស  សំរិត