AKP ភ្នំពេញ ថ្ងៃទី២២ ខែកក្កដា ឆ្នាំ២០២៥-- ឯកឧត្តម ធៀង វណ្ណដារ៉ុង អនុរដ្ឋលេខាធិការក្រសួងវប្បធម៌ និងវិចិត្រសិល្បៈ បានថ្លែងថា វគ្គបណ្តុះបណ្តាលសម្រាប់មន្រ្តីក្របខ័ណ្ឌវប្បធម៌គឺបានផ្អែកលើគោលនយោបាយ និងយុទ្ធសាស្រ្តកែទម្រង់របស់រាជរដ្ឋាភិបាលកម្ពុជា ក្នុងការ កសាងគោលនយោបាយស្តីពីធនធានមនុស្សគ្រប់វិស័យជំនាញ សំដៅបង្កើនគុណភាព ប្រសិទ្ធភាព ភាពស័ក្តិសិទ្ធិ និងជំនឿទុកចិត្ត។

ថ្លែងក្នុងពិធីបើកវគ្គបណ្តុះបណ្តាលស្តីពីគរុកោសល្យ វិធីសាស្រ្តនៃការបង្រៀន និងការគ្រប់គ្រងថ្នាក់រៀន (ជំហានទី៣ ក្រុមទី២)  ដែលរៀបចំឡើងដោយសាលាបណ្តុះបណ្តាលក្របខ័ណ្ឌវប្បធម៌ នាថ្ងៃទី២២ ខែ កក្កដា ឆ្នាំ ២០២៥ ឯកឧត្តម ធៀង វណ្ណដារ៉ុង បានឱ្យដឹងថាការសិក្សាលើមុខវិជ្ជាស្តីពី «គរុកោសល្យ វិធីសាស្រ្តនៃការបង្រៀន និងការគ្រប់គ្រងថ្នាក់រៀន (ជំហានទី៣ ក្រុមទី២)» នាពេលនេះ ក្រសួងវប្បធម៌ និងវិចិត្រសិល្បៈ មានបំណងចង់ផ្តល់ទស្សនទានក្នុងវិស័យរដ្ឋបាលអប់រំនាពេលបច្ចុប្បន្ន និងទៅអនាគតឱ្យមន្រ្តីរាជការ លោកគ្រូអ្នកគ្រូ នៃសាលាមធ្យមវិចិត្រសិល្បៈទាំង១០២រូប បន្តរៀនសូត្រ ពង្រឹងសមត្ថភាពនិងធ្វើទំនើបកម្ម ផ្នែករដ្ឋបាលសិក្សា និងផ្លាស់ប្តូរផ្នត់គំនិតពីការបង្រៀនតាមបែប «តំណរពូជ» មកបង្រៀនតាមបែបវិធីសាស្រ្តថ្មី នាសម័យបច្ចុប្បន្ន ដើម្បីអនុញ្ញាតឱ្យសិស្សទទួលបាននូវបែបផែនថ្មីតាមវិធីសាស្រ្តនាសម័យទំនើប ដោយលោកគ្រូ អ្នកគ្រូបង្រៀនទៅតាមប្លង់មេរៀន កិច្ចតែងការបង្រៀន និងតាមជំហានច្បាស់លាស់ ដែលធ្វើឱ្យគុណភាពនៃការអប់រំកាន់តែមានប្រសិទ្ធភាព និងរក្សាបានតម្លៃនៃជំនាញវិជ្ជាជីវៈមរតកដូនតាខ្មែរផងដែរ។

ឯកឧត្តមបានលើកឡើងដោយបញ្ជាក់បន្ថែមថា បើទោះបីជាវគ្គនេះមានរយៈពេលខ្លីក៏ពិតមែន ប៉ុន្តែសាលាបណ្តុះបណ្តាលក្របខ័ណ្ឌវប្បធម៌ មានកិច្ចសហការជាមួយសាស្រ្តាចារ្យ ដែលទទួលបានបណ្តុះបណ្តាលពីក្រសួងអប់រំ យុវជន និងកីឡា ក្នុងការជ្រើសរើស និងសម្រិតសម្រាំងមុខវិជ្ជាស្នូលសំខាន់ៗ ដើម្បីផ្តល់ចំណេះដឹងដល់សិក្ខាកាម ក្នុងរយៈពេល៤ថ្ងៃនេះ។ វគ្គបណ្តុះបណ្តាលនេះ សាលាបានផ្តោតជាសំខាន់ទៅលើវិធីសាស្ត្រ អនុវត្តន៍ ទៅលើមុខវិជ្ជាសំខាន់ៗចំនួន ២ រួមមាន៖ ១. ការអភិវឌ្ឍប្លង់នៃមុខវិជ្ជាសិក្សា និង២. ការអភិវឌ្ឍមុខវិជ្ជាកិច្ចតែងការបង្រៀន ដែលអនុញ្ញាតឱ្យសិក្ខាកាមកាន់តែមានភាពស្ទាត់ជំនាញក្នុងការគ្រប់គ្រងម៉ោងសិក្សា រៀបចំបានយ៉ាងល្អនៃគម្រោងលម្អិតមេរៀន គ្រប់គ្រងបាននូវខ្លឹមសារ និងអនុវត្តបាននូវជំហានទាំង ៥ នៅក្នុងកិច្ចតែងការបង្រៀន ដែលនឹងជំរុញឱ្យការបង្រៀនកាន់តែមានគុណភាព និងប្រសិទ្ធភាពខ្ពស់។

ឯកឧត្តមអនុរដ្ឋលេខាធិការបានមានប្រសាសន៍ថា នៅក្នុងគោលនយោបាយធនធានមនុស្ស ដែលរាជរដ្ឋាភិបាលកម្ពុជាបានដាក់ចេញ គឺដើម្បីរួមចំណែកជួយដល់គ្រឹះស្ថានអប់រំ ក្នុងការពង្រឹងការគ្រប់គ្រងនិងការអភិវឌ្ឍធនធានមនុស្ស ដែលនឹងធ្វើឱ្យប្រសើរឡើងនូវប្រសិទ្ធភាពការងារ និងការផ្តល់សេវាអប់រំប្រកប ដោយគុណភាពល្អ អាចទុកចិត្តបាន និងឆ្លើយតបទាន់ពេលវេលាទៅនឹងតម្រូវការទីផ្សារការងារ៕

ដោយ៖ មករា