AKP កំពង់ចាម ថ្ងៃទី២២ ខែកក្កដា ឆ្នាំ២០២៥-- ដើម្បីការពារធនធានមច្ឆជាតិ ធានាបាននូវកំណើនមច្ឆជាតិក្នុងដែនធម្មជាតិ ហើយរដូវបិទនេសាទក៏ជារដូវពងញាស់កកើតកូននៃពពួកមច្ឆា កំណើតផលត្រីក្នុងបឹងធម្មជាតិ កម្លាំងខណ្ឌរដ្ឋបាលជលផលកំពង់ចាម បង្កើនការយកចិត្តទុកដាក់ខ្ពស់ចុះទប់ស្កាត់ និងបង្ក្រាបបទល្មើសជលនៅក្នុង រដូវបិទនេសាទក្នុងដែនរបស់ខ្លួន។

ជាក់ស្តែងនៅថ្ងៃទី២២ ខែកក្កដា ឆ្នាំ២០២៥ សកម្មភាពខណ្ឌរដ្ឋបាលជលផលកំពង់ចាម សហការជាមួយអធិការដ្ឋានរដ្ឋបាលជលផលមេគង្គ អាជ្ញាធរស្រុកព្រៃឈរ កម្លាំងផ្នែកសឹករងព្រៃឈរ កម្លាំងប៉ុស្តិ៍នគរបាលរដ្ឋបាលមៀន និងកម្លាំងសហគមន៍នេសាទសាមគ្គីឃុំមៀន ដោយមានការសម្របសម្រួលពីឯកឧត្តមព្រះរាជអាជ្ញានៃអយ្យការអមសាលាដំបូងខេត្តកំពង់ចាម បានចុះប្រតិបត្តិការត្រួតពិនិត្យ និងបង្រ្កាបបទល្មើសជលផល រុះរើនិងបំផ្លាញចោលនូវឧបករណ៍ខុសច្បាប់ បានចំនួន០ ២ករណី នៅចំណុចស្ទឹងជ្រៅ ឃុំមៀន ស្រុកព្រៃឈរ ខេត្តកំពង់ចាម ដោយបំផ្លាញចោលរាល់វត្ថុតាង នៅនិងកន្លែង រួមមានឧករណ៍លូស្បៃមុងចំនួន១២មាត់ របាំងស្បៃមុងប្រវែង៣៦០ម៉ែត្រ ឧករណ៍រ៉ាវចំនួន០៣មាត់ របាំងរ៉ាវប្រវែង៩០ម៉ែត្រ បង្គោលចម្រឹងសរុបចំនួន២៣០ដើម  និងចាក់លែងកូនត្រីចម្រុះចូលក្នុងបឹងធម្មវិញផងដែរ៕

ដោយ ឆាយ ម៉ុត