AKP ភ្នំពេញ ថ្ងៃទី២២ ខែកក្កដា ឆ្នាំ២០២៥ -- លោកស្រី Claire Anne CONAN នាយិកាអង្គការកម្មវិធីស្បៀងអាហារពិភពលោកបានបង្ហាញនូវការពេញចិត្តចំពោះកិច្ចសហប្រតិបត្តិការដ៏ល្អប្រសើររបស់រាជរដ្ឋាភិបាលកម្ពុជា ជាពិសេសក្រសួងអប់រំ យុវជន និងកីឡា ក្នុងរយៈពេល៥ឆ្នាំកន្លងមកនេះជាមួយកម្មវិធីស្បៀងអាហារពិភពលោក  ព្រមទាំងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារក្រសួងអប់រំ យុវជន និងកីឡាក្នុងការអនុវត្តកម្មវិធីនានាប្រកបដោយប្រសិទ្ធភាព ដើម្បីលើកកម្ពស់អាហារូបត្ថម្ភ និងសុខភាពរបស់សិស្សានុសិស្ស ព្រមទាំងរួមចំណែកដល់ការកាត់បន្ថយអត្រាបោះបង់ការសិក្សា និងជំរុញការចូលរៀនរបស់កុមារ ជាពិសេសនៅតាមតំបន់ដាច់ស្រយាល និងទីជនបទ។ ការលើកឡើងរបស់លោកស្រី Claire Anne CONAN យ៉ាងដូច្នេះក្នុងឱកាសចូលជួបសម្តែងការគួរសម និងជម្រាបលា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាព្រឹកថ្ងៃទី២២ ខែកក្កដា ឆ្នាំ២០២៥ ខណៈដែលលោកស្រីបានបញ្ចប់បេសកកម្មនៅកម្ពុជា។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះលោកស្រី Claire Anne CONAN ចំពោះកិច្ចខិតខំប្រឹងប្រែង និងការលះបង់របស់លោកស្រីក្នុងការបម្រើបេសកកម្មនៅកម្ពុជា ព្រមទាំងបានវាយតម្លៃខ្ពស់ចំពោះតួនាទីរបស់អង្គការកម្មវិធីស្បៀងអាហារពិភពលោកក្នុងការគាំទ្រវិស័យអប់រំ និងអាហារូបត្ថម្ភនៅកម្ពុជាអស់រយៈពេលជាច្រើនឆ្នាំកន្លងមកនេះសំដៅបន្តពង្រីក និងបង្កើនភាពជាម្ចាស់លើកម្មវិធីអាហារូបត្ថម្ភតាមសាលារៀន ឆ្លើយតបនឹង "គោលនយោបាយស្បៀងអាហារតាមសាលារៀន ២០២៤-២០៣៥" ដែលបានដាក់ចេញដោយរាជរដ្ឋាភិបាលកម្ពុជា កាលពីឆ្នាំ២០២៤ សបញ្ជាក់ពីឆន្ទៈដ៏មោះមុតក្នុងការវិនិយោគលើធនធានមនុស្ស និងអនាគតរបស់កុមារកម្ពុជា ហើយថា ក្រសួងអប់រំ យុវជន និងកីឡា នឹងបន្តសហការយ៉ាងជិតស្និទ្ធជាមួយដៃគូអភិវឌ្ឍន៍ទាំងអស់ ដើម្បីធានានូវចីរភាព និងប្រសិទ្ធភាពនៃកម្មវិធីទាំងនេះ។

តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់លោកស្រីនាយិកា និងភាគីពាក់ព័ន្ធចំពោះសមិទ្ធផលដែលសម្រេចបានជាច្រើនក្នុងរយៈពេល៥ឆ្នាំនេះ ដែលបានរួមចំណែកយ៉ាងសំខាន់ដល់ការអភិវឌ្ឍវិស័យអប់រំ និងធនធានមនុស្សនៅកម្ពុជា ព្រមទាំងគូសបញ្ជាក់អំពីភាពរីកចម្រើនគួរឱ្យកត់សម្គាល់នៃកម្មវិធីអាហារូបត្ថម្ភតាមសាលារៀន ដែលបានពង្រីកវិសាលភាពគ្របដណ្តប់កាន់តែទូលំទូលាយ ក្លាយជាគំរូមួយដ៏ល្អសម្រាប់ការវិនិយោគលើសុខភាព និងការសិក្សារបស់កុមារ៕

ដោយ៖ ចាន់ សុភឿន (ប្រភព៖ ក្រសួងអប់រំ)