AKP ភ្នំពេញ ថ្ងៃទី២២ ខែកក្កដា ឆ្នាំ២០២៥ -- ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញជាអធិបតីភាពដឹកនាំកិច្ចប្រជុំអន្តរក្រសួងកម្រិតជាន់ខ្ពស់ស្តីពីផែនការសកម្មភាព ២០២៥-២០២៧នៃគោលនយោបាយជាតិប្រជាជន ២០១៦-២០៣០ នៅទីស្តីការក្រសួង នាព្រឹកថ្ងៃទី២២ ខែកក្កដា ឆ្នាំ២០២៥ ដើម្បីពិនិត្យ និងពិភាក្សាសេចក្តីព្រាងផែនការសកម្មភាព ២០២៥-២០២៧ ដោយផ្តោតសំខាន់លើតារាងម៉ាទ្រីស ដែលជាស្នូលនៃផែនការសកម្មភាពនេះ។

គួររំលឹកជូនថា គោលនយោបាយជាតិប្រជាជន ២០១៦-២០៣០ ត្រូវបានប្រកាសផ្សព្វផ្សាយដាក់ឱ្យប្រើប្រាស់ជាផ្លូវការ នាថ្ងៃទី០៣ ខែឧសភា ឆ្នាំ២០១៦ ដោយបានដាក់ចេញនូវយុទ្ធសាស្ត្រគ្រប់ជ្រុងជ្រោយ ដើម្បីដោះស្រាយបញ្ហាប្រឈមនានារបស់ប្រជាជន និងការអភិវឌ្ឍ។ គោលនយោបាយនេះរៀបចំឡើងដើម្បី រួមចំណែកជាមួយប្រជាជនប្រកបដោយតុល្យភាព សមធម៌ និងធ្វើឱ្យប្រសើរឡើងនូវគុណភាពជីវិតរបស់ប្រជាជន ព្រមទាំងជំរុញការអភិវឌ្ឍសេដ្ឋកិច្ច សង្គមកិច្ច ប្រកបដោយចីរភាពឱ្យបាននៅត្រឹមឆ្នាំ២០៣០។ គោលនយោបាយជាតិប្រជាជន ២០១៦-២០៣០ ត្រូវបានប្រើប្រាស់ជាទិសដៅគោលនយោបាយដ៏សំខាន់មួយ ដើម្បីបញ្ចូលក្នុងឯកសារគោលនយោបាយផ្សេងៗរបស់រាជរដ្ឋាភិបាល ដូចជា យុទ្ធសាស្ត្របញ្ចកោណ ផែនការយុទ្ធសាស្រ្តអភិវឌ្ឍន៍ជាតិ និងក្របខ័ណ្ឌគោលនយោបាយពាក់ព័ន្ធនានា។ គោលនយោបាយនេះបានចង្អុលបង្ហាញថា ផែនការសកម្មភាពត្រូវរៀបចំជា៥ដំណាក់កាល ហើយដំណាក់កាលនីមួយៗមានក្របខ័ណ្ឌពេលវេលា៣ឆ្នាំដូចៗគ្នា។

ដោយឈរលើមូលដ្ឋាននេះ ក្រសួងផែនការដែលមានអគ្គលេខាធិការដ្ឋានប្រជាជន និងអភិវឌ្ឍន៍ ជាសេនាធិការ បានរៀបចំផែនការសកម្មភាពតាមដំណាក់កាលនីមួយៗ ដោយមានការចូលរួមសហការពីក្រសួង ស្ថាប័នអនុវត្តគោលនយោបាយ។ ផែនការសកម្មភាពរយៈពេល៣ដំណាក់កាល ត្រូវបានរៀបចំឡើង និងបានអនុវត្តប្រកបដោយជោគជ័យគួរឱ្យកត់សម្គាល់រួចមកហើយ ក្នុងរយៈពេលជិត១ទសវត្សរ៍កន្លងមកនេះ។ ជាលទ្ធផល សមិទ្ធផលសំខាន់ៗនៃការអភិវឌ្ឍ សេដ្ឋកិច្ច សង្គមកិច្ចរបស់កម្ពុជា ក្នុងរយៈពេលជិត១ទសវត្សរ៍កន្លងមកនេះ ជាសក្ខីភាពនៃការឈានទៅមុខរបស់កម្ពុជា ដែលកើតចេញមួយផ្នែកពី លទ្ធផលនៃការអនុវត្តគោលនយោបាយជាតិប្រជាជន ក្នុងរយៈពេល៣ដំណាក់កាលកន្លងមកនេះ។

ដើម្បីធានានិរន្តភាពនៃការអនុវត្តគោលនយោបាយរហូតដល់ចប់អាណត្តិ និងដើម្បីបន្តដោះស្រាយបញ្ហាប្រឈមមួយចំនួន ដែលបណ្ដាពីឥទ្ធិពលទាំងខាងក្រៅនិងខាងក្នុង ក៏ដូចជាកត្តាភាពមិនប្រាកដប្រជានៃសេដ្ឋកិច្ច និងហិរញ្ញវត្ថុពិភពលោក ការប្រកួតប្រជែងសេដ្ឋកិច្ចក្នុងតំបន់ បម្រែបម្រួលអាកាសធាតុ និងការកើនឡើងនៃជម្លោះក្នុងតំបន់ ក្រសួងផែនការដែលមានអគ្គលេខាធិការដ្ឋានប្រជាជននិងអភិវឌ្ឍន៍ជាសេនាធិការ បាននិងកំពុងបន្តបេសកកម្មសម្របសម្រួលរៀបចំផែនការសកម្មភាពដំណាក់កាលទី៤ ឆ្នាំ២០២៥-២០២៧ នៃគោលនយោបាយជាតិប្រជាជន ២០១៦-២០៣០ ជូនរាជរដ្ឋាភិបាល៕

ដោយ៖ ពេជ្រ សំអឿន (ប្រភព៖ ក្រសួងផែនការ)