AKP កំពង់ចាម ថ្ងៃទី២២ ខែកក្កដា ឆ្នាំ២០២៥ -- ស្របតាមការអំពាវនាវរបស់ឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាមក្នុងការចូលរួមលើកទឹកចិត្ត ដល់វីរកងទ័ពកម្ពុជាដែលកំពុងឈរ ជើងតាមតំបន់ជួរមុខ ការពារទឹកដីនៅតាមខ្សែបន្ទាត់ព្រំដែន(កម្ពុជា-ថៃ) នៅព្រឹកថ្ងៃទី២២ ខែកក្កដា ឆ្នាំ២០២៥ ព្រះសីលសំវរ ប៊ត តាំងឆេង ព្រះនាគមុនី មេគណខេត្តកំពង់ចាម ព្រមទាំងព្រះមន្ដ្រីសង្ឃ ក្រុង ស្រុកទាំង១០របស់ខេត្ត បាននាំអំណោយជាគ្រឿងឧបភោគ បរិភោគ និងថវិកាជូនដល់រដ្ឋបាលខេត្ត ក្រោមអធិបតីភាពឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ដោយមានការចូលរួមពីអភិបាលរងខេត្ត។

ថ្លែងក្នុងពិធីប្រគល់ និងទទួលអំណោយ ឯកឧត្តម ខ្លូត ផន ប្រធានក្រុមប្រឹក្សាខេត្ត ក្នុងនាមអភិបាលខេត្ត និងថ្នាក់ដឹកនាំនៃគណៈអភិបាលខេត្តទាំងអស់ សូមថ្លែងអំណរអរព្រះគុណដល់ព្រះនាគមុនី មេគណខេត្តកំពង់ចាម ព្រមទាំងព្រះមន្ដ្រីសង្ឃទាំងអស់ដែលបាននូវអំណោយដល់រដ្ឋបាលខេត្ត សម្រាប់ជួយដល់វីរជនកំពុងការពារទឹកដីជួរមុខនិងសូមប្រគេនពរដល់មន្ត្រីសង្សសាលាគណខេត្តកំពង់ចាម ជួបប្រទះនូវពុទ្ធពរ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ចំពោះអំណោយដែលមន្ត្រីសង្ឃសាលាគណខេត្តកំពង់ចាម ប្រគល់ជូនដល់រដ្ឋបាលខេត្តរួមមានទឹកបរិសុទ្ធចំនួន១៥១កេស ទឹកក្រូច១៣៧ កេស ទឹកត្រី ១០០ យូរ ទឹកស៊ីអីវ ១០០យូរ  មីចំនួន១៩៥កេសតូច ត្រីខ៦៥យូរ អង្ករ៩៨បេ និងថវិកា ចំនួន ២១៤០០,០០០៛៕

ដោយ ឆាយ ម៉ុត