AKP បន្ទាយមានជ័យ ថ្ងៃទី២២ ខែកក្កដា ឆ្នាំ២០២៥--មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តបន្ទាយមានជ័យ នាថ្ងៃទី២២ ខែកក្កដា ឆ្នាំ២០២៥ បានរៀបចំវគ្គបណ្ដុះបណ្ដាលរំលឹកស្ដីពី «ការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារ» ដល់អាជ្ញាធរឃុំ-សង្កាត់ និងការិយាល័យអប់រំក្រុង-ស្រុកទាំងអស់ក្នុងខេត្ត ដើម្បីពង្រឹងសមត្ថភាព និងការយល់ដឹងរបស់មន្ត្រីមូលដ្ឋានក្នុងការអនុវត្តកម្មវិធីជាតិដ៏សំខាន់នេះ ប្រកបដោយប្រសិទ្ធភាព និងតម្លាភាព។

ពិធីនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់លោក ហួ តុលា អគ្គនាយករងនៃមូលនិធិជាតិជំនួយសង្គម តំណាងឯកឧត្តម ស៊ឹម សុធន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកមូលនិធិជាតិជំនួយសង្គម រួមជាមួយលោក ឃូ ពៅ អភិបាលរងខេត្ត តំណាងឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងទទួលបានចូលរួមពីជនបង្គោលនៃការិយាល័យអប់រំ យុវជន និងកីឡាក្រុង-ស្រុកទាំង៩ មេឃុំ-ចៅសង្កាត់ និងអ្នកកាន់កម្មវិធីនៅតាមឃុំ-សង្កាត់យ៉ាងច្រើនកុះករ នៅសាលប្រជុំ (ក) សាលាខេត្តបន្ទាយមានជ័យ។

ថ្លែងក្នុងពិធីបើកវគ្គបណ្ដុះបណ្ដាលនេះ លោក ហួ តុលា អគ្គនាយករងនៃមូលនិធិជាតិជំនួយសង្គម បានសង្កត់ធ្ងន់ពីសារៈសំខាន់នៃកម្មវិធីជាតិជំនួយសង្គមក្នុងកញ្ចប់គ្រួសារ ដែលជាគោលនយោបាយគាំពារសង្គមដ៏សំខាន់របស់រាជរដ្ឋាភិបាលកម្ពុជា ក្នុងការជួយសម្រាលបន្ទុកជីវភាពរបស់ប្រជាពលរដ្ឋងាយរងគ្រោះ និងក្រីក្រ។ លោកបានបន្តថា ការអនុវត្តកម្មវិធីនេះទាមទារនូវកិច្ចសហការយ៉ាងជិតស្និទ្ធពីគ្រប់ភាគីពាក់ព័ន្ធ ជាពិសេសអាជ្ញាធរមូលដ្ឋាន ដើម្បីធានាថាជំនួយទៅដល់ដៃអ្នកដែលត្រូវការចាំបាច់ពិតប្រាកដ។ លោកក៏បានលើកទឹកចិត្តដល់អ្នកចូលរួមទាំងអស់ឱ្យយកចិត្តទុកដាក់ស្ដាប់ និងផ្លាស់ប្ដូរមតិយោបល់ ដើម្បីទទួលបានចំណេះដឹង និងបទពិសោធន៍ថ្មីៗក្នុងការអនុវត្តការងារប្រចាំថ្ងៃ។

ជាមួយគ្នានេះដែរ លោក ឃូ ពៅ អភិបាលរងខេត្តបន្ទាយមានជ័យ បានលើកឡើងពីការប្តេជ្ញាចិត្តរបស់រដ្ឋបាលខេត្តក្នុងការគាំទ្រ និងជំរុញការអនុវត្តកម្មវិធីជាតិជំនួយសង្គមនេះឱ្យកាន់តែមានប្រសិទ្ធភាពខ្ពស់។ ខេត្តបន្ទាយមានជ័យតែងតែយកចិត្តទុកដាក់ខ្ពស់ចំពោះសុខុមាលភាពរបស់ប្រជាពលរដ្ឋ ជាពិសេសក្រុមគ្រួសារងាយរងគ្រោះ និងងាយរងហានិភ័យ។ លោកក៏បានថ្លែងអំណរគុណចំពោះមូលនិធិជាតិជំនួយសង្គម ដែលបានរៀបចំវគ្គបណ្ដុះបណ្ដាលដ៏មានសារៈប្រយោជន៍នេះ ដើម្បីពង្រឹងសមត្ថភាពមន្ត្រីមូលដ្ឋានក្នុងការរួមចំណែកកាត់បន្ថយភាពក្រីក្រ និងលើកកម្ពស់គុណភាពជីវិតប្រជាពលរដ្ឋនៅក្នុងខេត្ត។

សូមបញ្ជាក់ថា ក្នុងអំឡុងពេលវគ្គបណ្ដុះបណ្ដាល អ្នកចូលរួមនឹងទទួលបានការបណ្ដុះបណ្ដាលរំលឹកស្ដីពីនីតិវិធីនៃការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារ រួមមានការកំណត់អត្តសញ្ញាណគ្រួសារគោលដៅ យន្តការនៃការទូទាត់ប្រាក់ជំនួយ ការតាមដាន និងវាយតម្លៃប្រសិទ្ធភាពកម្មវិធី ការដោះស្រាយបញ្ហាប្រឈមនានាដែលកើតឡើងក្នុងការអនុវត្ត។ វគ្គបណ្ដុះបណ្ដាលនេះត្រូវបានរំពឹងទុកថានឹងចូលរួមចំណែកយ៉ាងសំខាន់ក្នុងការលើកកម្ពស់ប្រសិទ្ធភាព និងតម្លាភាពនៃការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារនៅទូទាំងខេត្តបន្ទាយមានជ័យ   ធានាថាសិទ្ធិទទួលបានជំនួយសង្គមរបស់ប្រជាពលរដ្ឋត្រូវបានការពារ និងបំពេញបានពេញលេញ៕

ដោយ ឈុន សារ៉ាត