AKP ភ្នំពេញ ថ្ងៃទី២២ ខែកក្កដា ឆ្នាំ២០២៥-- ក្នុងកិច្ចប្រជុំស្តីពីការរៀបចំសន្តិសុខ សណ្តាប់ធ្នាប់ និងសុវត្ថិភាពក្នុងមូលដ្ឋានខេត្តតាកែវ កាលពីថ្ងៃទី២១ ខែកក្កដា ឆ្នាំ២០២៥ ឯកឧត្តម វ៉ី សំណាង អភិបាលខេត្តតាកែវ បានណែនាំដល់អភិបាលក្រុង ស្រុក និងសមត្ថកិច្ចពាក់ព័ន្ធត្រូវធ្វើយ៉ាងណាស្រាវជ្រាវ ទប់ស្កាត់ និងបង្រ្កាបឱ្យខាងតែបានចំពោះក្រុមជនខិលខូចដែលលួចបើកល្បែងស៊ីសងខុសច្បាប់ ជាពិសេសបទល្មើសឆបោកនៅតាមអនឡាញ ដោយបានសង្កត់ធ្ងន់ថា នៅប៉ុន្មានថ្ងៃនេះយើងឃើញមានការបង្ក្រាបបទល្មើសឆបោកតាមអនឡាញនៅជាច្រើនខេត្ត។ ដូច្នេះសូមឱ្យអាជ្ញាធរក្រុង ស្រុក និងសមត្ថកិច្ចត្រូវខិតខំស្រាវជ្រាវ និងទប់ស្កាត់កុំឱ្យមានជនឱកាសនិយមមកពួនសម្ងំរកស៊ីខុសច្បាប់ក្នុងដែនសមត្ថកិច្ចរបស់ខ្លួនឱ្យសោះ។

ឯកឧត្តមអភិបាលខេត្តបានគូសបញ្ជាក់ថា ការទប់ស្កាត់ល្បែងស៊ីសងខុសច្បាប់តាមអនឡាញ និងបទល្មើសឆបោកតាមឡនឡាញវានឹងធ្វើឱ្យក្រុងស្រុកនីមួយៗមានសន្តិសុខ សុវត្ថិភាព និងសណ្តាប់ធ្នាប់ល្អប្រសើរ ជាពិសេសបង្កើនភាពជឿជាក់របស់ក្រុមអ្នកវិនិយោទុនឱ្យចូលមកបណ្ដាក់ទុននៅក្នុងខេត្តកាន់ តែច្រើនដែលនឹងនាំឱ្យខេត្តកាន់តែមានការអភិវឌ្ឍថែមទៀត។

សូមជម្រាបជូនថា កន្លងទៅថ្មីៗនេះកម្លាំងមានសមត្ថកិច្ចបានចុះបង្ក្រាបទីតាំងអនឡាញជាបន្តបន្ទាប់ ដោយឃាត់ខ្លួនមនុស្សជាច្រើនរយនាក់ និងច្រើនសញ្ជាតិ ព្រមទាំងដកហូតបាននូវវត្ថុតាងយ៉ាងច្រើនសន្ធឹកសន្ធាប់ផងដែរ៕

ដោយ៖ ចាន់ សុភឿន (ប្រភព៖ រដ្ឋបាលខេត្តតាកែវ)