AKP ភ្នំពេញ ថ្ងៃទី២២ ខែកក្កដា ឆ្នាំ២០២៥-- អបអរសាទរ កសិករសមាជិកនៃសហគមន៍កសិកម្មទំនើបនៅស្រុកបារាយណ៍ ខេត្តកំពង់ធំ ដែលបានជ្រើសដាំស្រូវសែនក្រអូបក្នុងរដូវកាលនេះ ចំណេញច្រើនជាងអ្នកដាំស្រូវអូអឹមជិត ១ ០០០ ០០០ រៀលក្នុង១ហិកតា។ នេះជាការលើកឡើងរបស់ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិម្ម រុក្ខាប្រមាញ់ និងនេសាទ កាលពីថ្ងៃទី២១ ខែកក្កដា ឆ្នាំ២០២៥។

ឯកឧត្តមអនុរដ្ឋលេខាធិការបានបន្តថា មួយផ្នែកធំនៃផលចំណេញនេះ ដោយសារតែស្រូវសែនក្រអូបកំពុងលក់ចេញក្នុងតម្លៃ១២៧០រៀលក្នុង១គីឡូក្រាម ខ្ពស់ជាងថ្លៃស្រូវអូអឹមក្នុងរង្វង់៤៥០ រៀល បើទោះបីជាស្រូវអូអឹមមានទិន្នផលខ្ពស់ជាងក៏ដោយ។ មួយផ្នែកទៀតបានមកពីការកាត់បន្ថយការចំណាយលើធាតុចូល និងថ្លៃការប្រាក់ ជាពិសេសទទួលបានចំណេញពីថ្លៃជីរហូតដល់ទៅ៣០ ០០០រៀលក្នុងបាវ បើធៀបនឹងថ្លៃដែលកសិករដែលទិញជីរៀងៗខ្លួន។ រដូវកាលក្រោយនឹងមានសមាជិកចូលថ្មីបន្ថែមទៀត ដែលធ្វើឱ្យផ្ទៃដីផលិតកម្មរបស់សហគមន៍ហក់ឡើងពី ១ ០០០ ហិកតា រហូតដល់៥ ០០០ហិកតា។

អត្ថប្រយោជន៍នៃការចងក្រងគ្នាជាសហគមន៍កសិកម្មទំនើប ការរើសពូជយុទ្ធសាស្ត្ររបស់កម្ពុជាមកដាំ និងការចុះកិច្ចសន្យាទិញលក់ទុកជាមុន ព្រមទាំងបានណែនាំឱ្យសហគមន៍ត្រៀមផែនការឱ្យបានច្បាស់លាស់សម្រាប់ផលិតកម្មនៅរដូវកាលបន្ទាប់ ជាពិសេសការត្រៀមទុន ពូជ និងទីផ្សារ។ ក្រសួងកសិកម្មនឹងសហការជាមួយក្រសួងធនធានទឹក សិក្សារៀបចំប្រព័ន្ធស្រោចស្រពគោល ដើម្បីធានាឱ្យបានថា ការធ្វើផលិតកម្មស្រូវនៅក្នុងតំបន់នេះមានទឹកគ្រប់គ្រាន់ទៅតាមតម្រូវការជាក់ស្តែង៕

ដោយ ណយ នឿន