AKP កំពង់ឆ្នាំង ថ្ងៃទី២២ ខែកក្កដា ឆ្នាំ២០២៥-- ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី ទទួលបន្ទុកបេសកកម្មពិសេស និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញអធិបតីសម្ពោធដាក់អោយប្រើប្រាស់អាគារទីស្នាក់ការ សមាគមអតីតយុទ្ធជនកម្ពុជា ខេត្តកំពង់ឆ្នាំងកាលពីថ្ងៃទី២១ ខែកក្កដា ឆ្នាំ២០២៥ នៅស្រុកសាមគ្គីមានជ័យខេត្តកំពង់ឆ្នាំង ដោយមានវត្តមានឯកឧត្តមបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី និងជា​ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ ថ្នាក់ដឹកនាំសមាគមអតីតយុទ្ធជនកម្ពុជា ឯកឧត្ដម លោកជំទាវសមាជិកព្រឹទ្ធសភា រដ្ឋសភា ថ្នាក់ដឹកនាំក្រសួង ក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំកងកម្លាំង ប្រធានមន្ទីរ អង្គភាព ប្រធានក្រុមប្រឹក្សា អភិបាលក្រុងស្រុក ក្រុមប្រឹក្សាឃុំសង្កាត់ មន្ត្រីរាជការ លោកគ្រូ អ្នកគ្រូ សិស្សានុសិស្ស ប្រជាពលរដ្ឋ និងអតីតយុទ្ធជន ជាច្រើននាក់ផងដែរ។

ថ្លែងក្នុងឱកាសនោះឯកឧត្តមកិត្តិសង្គហបណ្ឌិត គន់ គីម បានលើកឡើងអំពីសមិទ្ធិផលនានាឲ្យឃើញពីការរីកចំរើន ដែលដាក់សម្ពោធអោយប្រើប្រាស់នាពេលនេះបានឧបត្ថម្ភនិងគាំទ្ររបស់រាជរដ្ឋាភិបាល មានអាគារទីស្នាក់ការ សមាគមអតីតយុទ្ធជនកម្ពុជា  ផ្លូវ ក្លោងទ្វារ ការចាក់ដីបំពេញទីធ្លា របង អណ្តូងទឹក បន្ទប់ទឹក និង ដាក់អំពូលពន្លឺព្រះអាទិត្យ ដែលសមិទ្ធផលទាំងអស់នេះ គឺបានកើតចេញពីអំណោយដ៏ថ្លៃថ្លា របស់សម្ដេចតេជោ ហ៊ុន សែន, សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្ដេចបវរធិតីនាយករដ្ឋមន្ដ្រីនៃព្រះរាជានាចក្រកម្ពុជា និងលោកជំទាវបណ្ឌិត ជូនចំពោះ អតីតយុវជននិងនិវត្តន៍ជនខេត្តកំពង់ឆ្នាំង។

ទន្ទឹមនឹងនេះឯកឧត្តមបានពំាំនាំនូវប្រសាសន៍ផ្តាំផ្ញើរ ពីសំណាក់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងសម្តេចកិត្តិព្រឹទ្ធបណ្ឌិត ព្រមទាំង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជានាចក្រកម្ពុជា និង លោកជំទាវបណ្ឌិត តែងតែយកចិត្តទុកដាក់គិតគូរពីសុខទុក្ខ និងជីវភាពរស់នៅរបស់បងប្អូនអតីតយុទ្ធជនយើងនៅគ្រប់ពេលវេលា ព្រោះបងប្អូន អតីតយុទ្ធជន គឺជាអ្នកដែលបានរួមចំណែក ជាមួយសម្តេចតេជោធ្វើ ឲ្យប្រទេសជាតិយើងមានសុខសន្តិភាព និងការអភិវឌ្ឍន៍រីកចម្រើនរុងរឿងដូចសព្វថ្ងៃនេះ ។អតីតយុទ្ធជនគឺជាអ្នកដែលមានគុណបំណាច់ចំពោះជាតិមាតុភូមិ ជានិមិត្តរូបនៃស្មារតីលះបង់ ធ្វើពលីកម្មដើម្បីជាតិ និងជាអ្នកស្នេហាជាតិពិតប្រាកដ ដោយស្តែងចេញពីសកម្មភាពជាក់ស្តែងរបស់ខ្លួន។

ក្នុងបរិបទនេះឯកឧត្តមកិត្តិសង្គហបណ្ឌិតបានផ្ដាំផ្ញើដល់បងប្អូនប្រជាពលរដ្ឋទាំងអស់ សូមនាំគ្នាខិតខំថែរក្សាអនាម័យបរិស្ថានឱ្យបានស្អាត មិនត្រូវធ្វើការចោលសំរាមពាសវាលពាសកាល ឬធ្វើការចោលសំរាមចាក់ចូលនៅតាមដងស្ទឹង អូរប្រឡាយគ្មានរបៀបរៀបរយនេះឡើយ ព្រោះវាបង្កឱ្យមានមេរោគនៅក្នុងទឹកបង្កហានិភ័យពេលដែលយកទឹកទៅប្រើប្រាស់ ឬបង្កឱ្យមានសត្វល្អិត រុយរោម ឬមានក្លិនស្អុយ ធ្វើឱ្យប៉ះពាល់ដល់សុខភាពរបស់បងប្អូន ក៏ដូចជាធ្វើឱ្យខូចសោភ័ណភាពទៀតផងដែរ។ កូនចៅរបស់ខ្លួន ត្រូវចៀសផុតឲ្យឆ្ងាយពីគ្រឿងញ្ញាណ ហើយត្រូវបន្តណែនាំដល់កូនចៅរបស់ខ្លួន។ ត្រូវចូលរួមគោរពច្បាប់ចរាចរណ៍ផ្លូវគោក ត្រូវពាក់មួកសុវត្ថិភាព ពាក់ខ្សែក្រវ៉ាត់ឱ្យបានត្រឹមត្រូវ រាល់ពេលធ្វើដំណើរទៅកាន់ទីកន្លែងណាមួយមិនថាទីជិតឬទីឆ្ងាយនោះទេ។ 

ក្នុងឱកាសនោះដែរ ឯកឧត្តម លោកជំទាវ លោក លោកស្រី បាននាំយកអំណោយដ៏ថ្លៃថ្លា របស់សម្ដេចតេជោ ហ៊ុន សែន, សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និង សម្ដេចបវរធិបតីនាយករដ្ឋមន្ដ្រី និងលោកជំទាវបណ្ឌិត ជូនចំពោះ អតីតយុវជន និងនិវត្តន៍ជន ចំនួន ១០០នាក់ ដោយម្នាក់ៗទទួលបាន អង្ករ១បាវ, ទឹកសុទ្ធ១កេះ, មី១កេះ, ត្រីខ១យួរ, ទឺកស៊ីអ៊ីវ១យួរ, ទឹកត្រី១យួរ និងថវិកាមួយចំនួនផងដែរ៕

ដោយ៖  បៃ ស៊ីថុន