AKP ភ្នំពេញ ថ្ងៃទី២១ ខែកក្កដា ឆ្នាំ២០២៥--

សាខាកាកបាទក្រហមកម្ពុជាខេត្តស្វាយរៀងបានចុះសួរសុខទុក្ខ និងនាំយកអំណោយមនុស្សធម៌ចែកជូនគ្រួសាររងគ្រោះដោយសារខ្យល់កន្ត្រាក់កាលពីល្ងាចថ្ងៃទី ២០ ខែកក្កដា ឆ្នាំ២០២៥ បណ្តាលឱ្យខូចខាតផ្ទះប្រជាពលរដ្ឋ ក្នុងស្រុកចន្ទ្រា នៅឃុំទួលស្តី និងឃុំចន្ទ្រាចំនួន៨ខ្នង ក្នុងស្រុកកំពង់រោទិ៍ នៅឃុំត្នោត និងឃុំថ្មី ចំនួន៨ខ្នង សរុបចំនួន១៦ខ្នង (ធ្ងន់៨ខ្នង មធ្យម៥ខ្នង តិចតួច៣ខ្នង)។

ក្នុងឱកាសចុះសួរសុខទុក្ខនាថ្ងៃចន្ទ ទី២១ ខែកក្កដា ឆ្នាំ២០២៥ ក្រុមការងារបានសម្តែងការសោកស្តាយចំពោះការខូចខាតទ្រព្យសម្បត្តិ ផ្ទះសំបែង ដែលបង្កដោយគ្រោះធម្មជាតិដែលមិននឹកស្មានដល់ និងបានផ្ដាំផ្ញើដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នខ្ពស់ពីសុវត្ថិភាពផ្ទាល់ខ្លួន និងក្រុមគ្រួសារ ដោយត្រូវបិទទូរទស្សន៍ ទូរស័ព្ទ រកកន្លែងដែលមានសុវត្ថិភាព នៅពេលមានភ្លៀងធ្លាក់ និងមានអនាម័យល្អក្នុងការរស់នៅត្រូវសម្អាតបរិស្ថានជុំវិញផ្ទះជាប្រចាំដើម្បីការពារពីជំងឺដង្កាត់ផ្សេងៗដែលបង្កពីកង្វះអនាម័យ និងបានសំណូមពរឱ្យអាជ្ញាធរដែនដីជួយរៀបចំផ្ទះរបស់បងប្អូនឡើងវិញដើម្បីជាជម្រកស្នាក់នៅបន្ត។

សូមជម្រាបជូនថា អំណោយដែលទទួលបានក្នុង១គ្រួសារ៖ អង្ករ៣០គក្រ មី១កេស ទឹកស៊ីអ៊ីវ ៦ដប ត្រីខ១០កំប៉ុង កន្ទេលជ័របត់១ ឃីត១កញ្ចប់ (មុង១ ភួយ១ ក្រម៉ា១ សារុង១) និងថវិកា៥ ម៉ឺនរៀល។ ដោយឡែកគ្រួសាររងគ្រោះធ្ងន់ទទួលបានបន្ថែមនូវកៅស៊ូតង់១ ធុងទឹកជ័រ១ ឆ្នាំងបាយសម្ល ២ ថវិកា២០ ម៉ឺនរៀល។ គ្រួសាររងគ្រោះតិចតួចទទួលបានថវិកា៦ម៉ឺនរៀលសម្រាប់ទិញសម្ភារជួសជុលផ្ទះឡើងវិញ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)