AKP បន្ទាយមានជ័យ ថ្ងៃទី២១ ខែកក្កដា ឆ្នាំ២០២៥--

ស្រុកព្រះនេត្រព្រះ ខេត្តបន្ទាយមានជ័យ បានក្លាយជាទីតាំងដ៏សំខាន់មួយសម្រាប់យុទ្ធនាការផ្សព្វផ្សាយស៊ីជម្រៅស្តីពីការញែកសំណល់ និងកាត់បន្ថយប្លាស្ទិក ដែលរៀបចំឡើងនាព្រឹកថ្ងៃទី២១ ខែកក្កដា ឆ្នាំ២០២៥នេះ។ យុទ្ធនាការនេះមានគោលបំណងលើកកម្ពស់ការយល់ដឹង និងជំរុញការចូលរួមរបស់ប្រជាពលរដ្ឋ ជាពិសេសយុវជន ក្នុងការគ្រប់គ្រងសំណល់ប្រកបដោយប្រសិទ្ធភាព និងកាត់បន្ថយការប្រើប្រាស់ប្លាស្ទិក ដើម្បីបរិស្ថានស្អាត និងនិរន្តរភាព។

យុទ្ធនាការដ៏មានសារៈសំខាន់នេះបានប្រារព្ធធ្វើឡើងនៅបរិវេណសាលាស្រុកព្រះនេត្រព្រះ ក្រោមអធិបតីភាពរបស់ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកព្រះនេត្រព្រះ រួមជាមួយ ឯកឧត្តម ប៉ាក សុខារ៉ាវុធ អនុរដ្ឋលេខាធិការក្រសួងបរិស្ថាន និងជាប្រធានគណៈកម្មាធិការដឹកនាំគម្រោង UN PAGE កម្ពុជា។ ពិធីនេះក៏មានការអញ្ជើញចូលរួមពីលោក លោកស្រី គណៈប្រតិភូអមដំណើរ អភិបាល អភិបាលរងស្រុក ប្រធាន អនុប្រធានមន្ទីរអង្គភាពពាក់ព័ន្ធ លោកគ្រូ អ្នកគ្រូ ព្រមទាំងសិស្សានុសិស្សចំនួន២៥០នាក់ មកពីវិទ្យាល័យចំនួន០៥ ក្នុងស្រុកព្រះនេត្រព្រះ ដែលបានបង្ហាញពីស្មារតីទទួលខុសត្រូវខ្ពស់ចំពោះបញ្ហាបរិស្ថាន។

ថ្លែងក្នុងពិធីនោះ ឯកឧត្តម គង់ ច័ន្ទវាសនា បានគូសបញ្ជាក់ពីសារៈសំខាន់នៃការញែកសំណល់ និងកាត់បន្ថយប្លាស្ទិកថា ជាកិច្ចការចាំបាច់ដើម្បីការពារបរិស្ថានធម្មជាតិ កាត់បន្ថយការបំពុល និងលើកកម្ពស់សុខភាពសាធារណៈ។ ឯកឧត្តមបានលើកទឹកចិត្តឱ្យប្រជាពលរដ្ឋគ្រប់រូប ជាពិសេសសិស្សានុសិស្ស ចូលរួមយ៉ាងសកម្មក្នុងការអនុវត្តន៍សកម្មភាពទាំងនេះ ដោយចាប់ផ្តើមពីទម្លាប់ប្រចាំថ្ងៃនៅតាមគេហដ្ឋាន និងសាលារៀន និងបានសង្កត់ធ្ងន់ថា «ការញែកសំណល់ត្រឹមត្រូវ គឺជាជំហានដំបូងដ៏សំខាន់ឆ្ពោះទៅរកការគ្រប់គ្រងសំណល់ប្រកបដោយនិរន្តរភាព ហើយការកាត់បន្ថយការប្រើប្រាស់ប្លាស្ទិក គឺជួយកាត់បន្ថយសម្ពាធលើបរិស្ថានយ៉ាងធំធេង»។

ចំណែក ឯកឧត្តម ប៉ាក សុខារ៉ាវុធ បានលើកឡើងពីផលប៉ះពាល់ធ្ងន់ធ្ងរនៃសំណល់ប្លាស្ទិកទៅលើប្រព័ន្ធអេកូឡូស៊ី ជីវចម្រុះ និងសុខភាពមនុស្ស និងបានពន្យល់ពីគម្រោង UN PAGE កម្ពុជា ដែលផ្តោតលើការអភិវឌ្ឍន៍សេដ្ឋកិច្ចបៃតង និងការការពារបរិស្ថាន។ ឯកឧត្តមបានអំពាវនាវឱ្យមានការផ្លាស់ប្តូរផ្នត់គំនិត និងអាកប្បកិរិយា ដោយបន្តជំរុញការប្រើប្រាស់ផលិតផលដែលអាចប្រើឡើងវិញបាន និងចូលរួមក្នុងយុទ្ធនាការកាត់បន្ថយប្លាស្ទិកគ្រប់រូបភាព។ ឯកឧត្តមបានបញ្ជាក់ថា «ការការពារបរិស្ថាន មិនមែនជាបន្ទុកនោះទេ តែជាការវិនិយោគសម្រាប់អនាគតរបស់យើងទាំងអស់គ្នា»។

ជាមួយគ្នានេះ លោក ហឿន វីរៈ អភិបាលស្រុកព្រះនេត្រព្រះ បានថ្លែងអំណរគុណចំពោះវត្តមានដ៏ខ្ពង់ខ្ពស់របស់ថ្នាក់ដឹកនាំ និងការរៀបចំយុទ្ធនាការដ៏មានន័យនេះ។ លោកបានប្តេជ្ញាថា រដ្ឋបាលស្រុកនឹងបន្តសហការយ៉ាងជិតស្និទ្ធជាមួយក្រសួងស្ថាប័នពាក់ព័ន្ធ និងដៃគូអភិវឌ្ឍន៍ ដើម្បីពង្រឹងការងារគ្រប់គ្រងសំណល់ និងបរិស្ថានក្នុងមូលដ្ឋានស្រុកព្រះនេត្រព្រះ។ លោកបានលើកទឹកចិត្តឱ្យប្រជាពលរដ្ឋចូលរួមឱ្យបានកាន់តែច្រើន ក្នុងសកម្មភាពសម្អាតបរិស្ថាន និងអនុវត្តន៍ការញែកសំណល់នៅតាមសហគមន៍របស់ខ្លួន។

ក្នុងចំណោមសិស្សានុសិស្ស ២៥០នាក់ ដែលបានចូលរួម សិស្សជាច្រើនបានបង្ហាញពីចំណាប់អារម្មណ៍យ៉ាងខ្លាំងចំពោះប្រធានបទនេះ។ កញ្ញា សុភ័ក្ត្រ សិស្សថ្នាក់ទី១១ មកពីវិទ្យាល័យព្រះនេត្រព្រះ បានថ្លែងថា «ខ្ញុំពិតជារីករាយដែលបានចូលរួមក្នុងយុទ្ធនាការនេះ។ ខ្ញុំបានរៀនសូត្របានច្រើនអំពីរបៀបញែកសំណល់ឱ្យបានត្រឹមត្រូវ និងផលប៉ះពាល់នៃប្លាស្ទិក។ ខ្ញុំនឹងយកចំណេះដឹងនេះទៅផ្សព្វផ្សាយបន្តដល់មិត្តភក្តិ និងក្រុមគ្រួសាររបស់ខ្ញុំ»។

រីឯ លោក រតនា សិស្សថ្នាក់ទី១០ មកពីវិទ្យាល័យមួយទៀតក្នុងស្រុក បានបន្ថែមថា «ខ្ញុំនឹងចាប់ផ្តើមអនុវត្តន៍ការញែកសំណល់នៅផ្ទះ ហើយកាត់បន្ថយការប្រើប្រាស់ថង់ប្លាស្ទិក។ យើងទាំងអស់គ្នាត្រូវតែចូលរួមដើម្បីបរិស្ថានរបស់យើង»។

សូមបញ្ជាក់ថាយុទ្ធនាការផ្សព្វផ្សាយនេះ មិនមែនគ្រាន់តែជាព្រឹត្តិការណ៍មួយដងនោះទេ ប៉ុន្តែជាចំណុចចាប់ផ្តើមនៃការជំរុញឱ្យមានការផ្លាស់ប្តូរអាកប្បកិរិយាយូរអង្វែង។ តាមរយៈការអប់រំ និងការយល់ដឹង ក្តីសង្ឃឹមគឺថា ប្រជាពលរដ្ឋក្នុងស្រុកព្រះនេត្រព្រះនឹងរួមគ្នាបង្កើតទម្លាប់ល្អក្នុងការគ្រប់គ្រងសំណល់ និងកាត់បន្ថយប្លាស្ទិក ដែលនឹងរួមចំណែកយ៉ាងសំខាន់ដល់ការថែរក្សាបរិស្ថានប្រកបដោយនិរន្តរភាពសម្រាប់មនុស្សជំនាន់ក្រោយនេះគឺជាការវិនិយោគដ៏មានតម្លៃបំផុតសម្រាប់អនាគតកម្ពុជាបៃតង៕

ដោយ ឈុន សារ៉ាត