AKP ភ្នំពេញ ថ្ងៃទី២១ ខែកក្កដា ឆ្នាំ២០២៥-- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា កាលពីរសៀលថ្ងៃទី២០ ខែកក្កដា ឆ្នាំ២០២៥ បានអញ្ជើញបិទការប្រឡងកម្មវិធីអភិវឌ្ឍន៍ខួរក្បាលកុមារអាឡូហាអន្តរជាតិ ឆ្នាំ២០២៥ ដោយបានស្វាគមន៍យ៉ាងកក់ក្តៅចំពោះសិស្សានុសិស្សជាតិ និងអន្តរជាតិទាំងអស់ដែលបានចូលរួមក្នុងការប្រកួត ALOHA Metal Arithmetic International នៅកម្ពុជានាឱកាសនេះ ព្រមទាំងបានវាយតម្លៃខ្ពស់ចំពោះក្រុមការងារ ALOHA Metal Arithmetic ជាតិ និងអន្តរជាតិ ដែលបានយកអស់កម្លាំងកាយចិត្តរៀបចំការប្រឡង Metal Arithmetic កម្រិតអន្តរជាតិនេះនៅកម្ពុជាដោយជោគជ័យ និងបានរៀបចំកម្មវិធីដំណើរទស្សនកិច្ចនានាពាក់ព័ន្ធនឹងវិស័យអប់រំសម្រាប់សិស្សានុសិស្សអន្តរជាតិមកពីជាង៤០ប្រទេស ដើម្បីសិក្សាស្វែងយល់ពីវប្បធម៌ និងតំបន់ទេសចរណ៍នៅកម្ពុជា។ 

ឯកឧត្តមបានលើកឡើងថា ការប្រកួតប្រជែងគណិតវិទ្យានៅកម្ពុជានេះមិនត្រឹមតែជួយបង្កើនសមត្ថភាពខួរក្បាលលើការគណនា និងការវិភាគប៉ុណ្ណោះទេ ថែមទាំងផ្តល់ឱកាសដល់សិស្សឱ្យសិក្សាយ៉ាងស៊ីជម្រៅអំពីវប្បធម៌ អរិយធម៌ និងភាពរីកចម្រើនរបស់កម្ពុជា។ ឯកឧត្តមណ្ឌិតសភាចារ្យ ឧបនាយករដ្ឋមន្ត្រីបានកោតសរសើរចំពោះទេពកោសល្យ និងសមត្ថភាពរបស់សិស្សានុសិស្សជាតិ និងអន្តរជាតិទាំងអស់ដែលចូលរួមក្នុងការប្រកួតប្រជែងគណិតវិទ្យាយ៉ាងស្វិតស្វាញ ដោយគូសបញ្ជាក់ថា ទោះជាលទ្ធផលនៃការប្រកួតជោគជ័យ ឬបរាជ័យ តែភាពក្លាហានរបស់ក្មួយៗក្នុងការចូលរួមប្រកួត ដើម្បីសាកល្បងសមត្ថភាពខ្លួនឯង ស្វែងរកចំណេះដឹង និងបណ្ដុះស្មារតីប្រកួតប្រជែងប្រកបដោយសុខភាពល្អ និងភាពវាងវៃនឹងជម្រុញទឹកចិត្តក្មួយៗឱ្យបន្តខិតខំប្រឹងប្រែងរៀនសូត្រកាន់តែខ្លាំងក្លាថែមទៀត ជាពិសេសផ្នែកគណិតវិទ្យា ដើម្បីអាចឈានទៅកម្រិតកាន់តែខ្ពស់ ហើយជឿជាក់យ៉ាងមុតមាំថាក្មួយៗទាំងអស់នឹងទទួលបានបទពិសោធន៍ដ៏មានតម្លៃពីកម្មវិធីនេះ ដែលជាទុនដ៏សំខាន់ក្នុងការបន្តអភិវឌ្ឍន៍ចំណេះដឹងសម្រាប់អនាគតនៃការសិក្សាដ៏វែងឆ្ងាយខាងមុខទៀត។

ក្នុងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានវាយតម្លៃខ្ពស់ចំពោះស្ថាបនិក ក្រុមប្រឹក្សាភិបាលនៃកម្មវិធីអភិវឌ្ឍន៍ខួរក្បាលកុមារអាឡូហាអន្តរជាតិ មាតាបិតា អ្នកអាណាព្យាបាល និងភាគីពាក់ព័ន្ធទាំងអស់ចំពោះកិច្ចខិតខំប្រឹងប្រែងចូលរួមយ៉ាងសកម្មជាមួយរាជរដ្ឋាភិបាលក្នុងបុព្វហេតុអភិវឌ្ឍន៍ធនធានមនុស្សនៅកម្ពុជា ព្រមទាំងលើកកម្ពស់ភាពជាអ្នកដឹកនាំរបស់កម្ពុជាក្នុងឧត្តមភាពអប់រំ និងសូមឱ្យការប្រកួតប្រជែងជាអន្តរជាតិមួយនេះ ក្លាយជាស្ពានផ្សារភ្ជាប់វប្បធម៌ ទំនាក់ទំនង សាមគ្គីភាព ការយល់ដឹងពីគ្នា ការគោរពគ្នាទៅវិញទៅមក និងការបង្កើតនូវអនុស្សាវរីយ៍ដ៏មានតម្លៃរវាងគ្នា ជាពិសេសស្វែងយល់ពីភាពចម្រុះនៃវប្បធម៌ជាតិ ដែលជាមូលដ្ឋានគ្រឹះដ៏សំខាន់សម្រាប់ការកសាងសហគមន៍មួយប្រកបដោយសន្តិភាព សុខដុមរមនា វិបុលភាព និងការអភិវឌ្ឍ។

សូមជម្រាបជូនថា កម្មវិធី ALOHA Mental Arithmetic គឺជាការបង្រៀនពីរបៀបគិតលេខដោយប្រើម៉ាស៊ីនគិតលេខ ABACUS ដើម្បីជួយបណ្តុះសមត្ថភាពនៃការចងចាំ និងអភិវឌ្ឍន៍ខួរក្បាលកុមារ តាមរយៈការហ្វឹកហាត់ក្បួនគិតលេខបែបរហ័ស និងស៊ីជម្រៅដោយផ្តោតលើប្រសិទ្ធភាព ភាពត្រឹមត្រូវ និងការផ្ចង់អារម្មណ៍។ កម្មវិធី អាឡូហា នព្វន្តគណិត (ALOHA Mental Arithmetic Program) ត្រូវបានបែងចែកជាពីរផ្នែកគឺ ផ្នែកសម្រាប់កុមារតូចៗ អាយុ៥ ទៅ៧ឆ្នាំ មាន១០កម្រិត និងផ្នែកសម្រាប់កុមារធំ អាយុ៨ ទៅ១៣ឆ្នាំ មាន៨កម្រិត៕

ដោយ៖ ចាន់ សុភឿន (ប្រភព៖ ក្រសួងអប់រំ)