AKP សៀមរាប ថ្ងៃទី ២១ ខែ កក្កដា ឆ្នាំ ២០២៥--ឯកឧត្តម កឹម គុណវឌ្ឍន៍ រដ្ឋលេខាធិការក្រសួងព័ត៌មានបានបញ្ជាក់ថា ការបើកសន្និសីទកំពូលស្តីពីប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នៅលើទឹកដីអង្គរ ខេត្តសៀមរាប នាថ្ងៃទី២១ ខែ  កក្កដា ឆ្នាំ ២០២៥ ដែលជាថ្ងៃទី១នេះបានចាប់ផ្តើមធ្វើឡើងដោយបើកសិក្ខាសាលាចំនួន៧ព្រមៗគ្នា ក្នុងនោះបានផ្តោតលើសារៈសំខាន់ ទៅលើការវិវឌ្ឍនៃយុគសម័យឌីជីថល ការវិវឌ្ឍលើវិស័យបញ្ញាសិម្បនិម្មិត(AI)ជាដើម។

ថ្លែងប្រាប់ក្រុមអ្នកសារព័ត៌មាន នាព្រឹកថ្ងៃទី ២១ ខែកក្កដា ឆ្នាំ ២០២៥ នៅសណ្ឋាគារសុខា ខេត្ដសៀមរាម ឯកឧត្តម កឹម គុណវឌ្ឍន៍ រដ្ឋលេខាធិការក្រសួងព័ត៌មានបានឱ្យដឹងថា ក្នុងសិក្ខាសាលានាព្រឹកថ្ងៃនេះដែរនឹងមានវាគ្មិនមកពីបណ្តាប្រទេសសំខាន់ៗពិសេសជាសម្ព័ន្ធភាពនិងដៃគូសំខាន់ៗរបស់វិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក(AIDB) ដែលក្នុងនោះនឹងធ្វើបទបង្ហាញនិងពន្យល់អ្នកចូលរួមទាំងអស់បានយល់ និងបានចំណេះដឹងក្នុងពិធីនេះផ្ទាល់តែម្តង។ ឯកឧត្តមរដ្ឋលេខាធិការបានចាត់ទុកថានេះ ពិតជាមានសារៈសំខាន់សម្រាប់អ្នកចូលរួមក្នុងការបានទទួលនូវចំណេះដឹងថ្មីៗនៃការវិវឌ្ឍនៃបច្ចេកវិទ្យាទំនើបថ្មីៗដល់អ្នកចូលរួម។

សូមជម្រាបជូនថា សន្និសីទកំពូលស្តីពី ប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នៅលើទឹកដីអង្គរ ខេត្តសៀមរាប ចាប់ផ្តើមនៅថ្ងៃទី២១ ខែ កក្កដា ឆ្នាំ ២០២៥ នៅសណ្ឋាគារសុខា ខេត្ដសៀមរាប។ ការរៀបចំសន្និសីទធ្វើម្ចាស់ផ្ទះលើកទី២នេះ បន្ទាប់ពីកម្ពុជាបានរៀបចំសន្និសីទលើកទី១ ស្តីពីប្រព័ន្ធផ្សព្វផ្សាយអាស៊ីលើកទី១៦ នៅក្នុងឆ្នាំ២០១៩ ដោយនៅពេលនោះគឺមានអ្នកចូលរួមប្រមាណជាង៦០០នាក់ មកពីបណ្តាប្រទេសចំនួន៤៣។

បើតាម ឯកឧត្តម នេត្រ ភក្ត្រា រដ្ឋមន្រ្តី ក្រសួងព័ត៌មានបានថ្លែងបញ្ជាក់ឱ្យដឹងផងដែរថា សន្និសីទកំពូលប្រព័ន្ធផ្សព្វផ្សាយអាស៊ីលើកទី២០នេះ គឺដើម្បីពង្រឹងទៅលើក្របខ័ណ្ឌនៃការទូតព័ត៌មានចំពោះការទូតព័ត៌មាន គឺសំដៅទៅលើវិស័យព័ត៌មាន និងសោតទស្សន៍។ ឯកឧត្ដមបានលើកឡើងថា ចំពោះកិច្ចសហប្រតិបត្តិការនេះ ក្រសួងព័ត៌មាន ក្នុងនាមជាសេនាធិការរបស់រាជរដ្ឋាភិបាល គឺត្រូវចាំបាច់រុញតភ្ជាប់ក្នុងតំបន់ និងពិភពលោកតែម្តង ពីព្រោះបញ្ហាដែលជួបប្រទះរួម គឺព័ត៌មានក្លែងក្លាយ ហើយហានិភ័យនៃការកើនឡើងនៃព័ត៌មានកែ្លងក្លាយដែលបង្កើតឡើងដោយបញ្ញាសិប្បនិម្មិត (AI)។

ពាក់ព័ន្ធនឹងការរៀបចំសន្និសីទកំពូលនេះដែរ ឯកឧត្តម ប៉ាង ណាត អនុរដ្ឋលេខាធិការក្រសួងព័ត៌មានបានគូសបញ្ជាក់ថា ការរៀបចំសន្និសីទកំពូលស្តីអំពី ប្រព័ន្ធផ្សាព្វផ្សាយនៅអាស៊ីប៉ាស៊ីហ្វិក លើកនេះ ក្រសួងព័ត៌មានក៏បានរៀបចំគណៈកម្មការមួយ ដោយមានឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានជាប្រធាន ហើយក្នុងគណៈកម្មាធិការនេះមានអនុគណៈកម្មការចំនួន៤ និងលេខាដ្ឋានចំនួន១។ ឯកឧត្ដមបានបន្ដថា ក្នុងអនុគណៈកម្មការចំនួន៤នេះ រួមមាន ទី១ អនុគណៈកម្មការសណ្តាប់ធ្នាប់ និងសង្រ្គោះបន្ទាន់ ដើម្បីយើងទទួលគណៈប្រតិភូ ហើយយើងត្រូវតែមានការងារសណ្តាប់ធ្នាប់ មានការងារសង្រ្គោះបន្ទាន់ដោយ យថាហេតុណាមួយ។ អនុគណៈកម្មការមួយទៀតគឺអនុគណៈកម្មការ និងបដិសណ្ឋារកិច្ច។ ឯកឧត្តមបានលើកឡើងថា នៅក្នុងរៀបចំកម្មវិធីនីមួយៗគឺយើងមិនអាចចោលបានទេនូវទំនៀមទម្លាប់របស់យើងក៏ដូចជាបណ្តាប្រទេសផ្សេងៗទៀតដែលជាម្ចាស់ផ្ទះរៀបចំ។ ចំពោះអនុគណៈកម្មការទី៣គឺអនុគណៈកម្មការខ្លឹមសារ និងឯកសារ និងអនុគណៈកម្មការទី៤គឺអនុគណៈកម្មការព័ត៌មាន និងផ្សព្វផ្សាយ ហើយមួយទៀតគឺលេខាធិការដ្ឋាន ដែលជាសេនាធិការផ្ទាល់ក្នុងការធ្វើកិច្ចការជំនួសឱ្យគណៈកម្មការរៀបចំនេះតែម្តង។

ឯកឧត្តម ប៉ាង ណាត ក៏បានរម្លឹកផងដែរថា ការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី១៦ ក្នុងឆ្នាំ ២០១៩កន្លងមក មានអ្នកចូលរួមជាង៤០០ទៅ៥០០នាក់ និងការរៀបចំលើកទីពីរនេះដែរតាមការប៉ាន់ប្រមាណនឹងមានច្រើនលើសពីលើកទី១ដោយសារគ្រាន់តែសមាជិករបស់ AIBD មានទៅជិតដល់៥០អង្គភាព។ ឯកឧត្ដមបានបន្ដថា បើតាមការប៉ាន់ប្រមាណរបស់អង្គភាពនេះដែររំពឹងថានឹងមានអ្នកចូលរួមលើសពីជាង៤០០ ទៅជាង៥០០នាក់ ហើយអ្នកចូលរួមទាំងអស់សុទ្ធតែមន្រ្តីសំខាន់ៗក្នុងប្រព័ន្ធផ្សព្វផ្សាយ ដែលជាអ្នកប្រកបរបរប្រព័ន្ធផ្សព្វផ្សាយ ថ្នាក់ដឹកនាំ អ្នកជំនាញវិជ្ជាជីវៈផ្ទាល់តែម្តង។

ឯកឧត្តម អនុរដ្ឋលេខាធិការបានថ្លែងឱ្យដឹងដែរថា ក្នុងព្រឹត្តិការណ៍នេះដែរនឹងមានព្រឹត្តិការណ៍អមជាច្រើនទាំងមុននិងក្រោយអង្គសន្នីសីទ។ ក្រៅពីនេះក៏មានអង្គសិក្ខាសាលាអម សរុបចំនួន៧ ដែលធ្វើឡើងនៅថ្ងៃទី ២១ ខែ កក្កដា ឆ្នាំ២០២៥ ក្នុងនោះ រួមមានដូចជា អង្គសិក្ខាសាលាស្តីពី “ឱកាស និង បញ្ហាប្រឈមដែលពាក់ព័ន្ធនឹងប្រព័ន្ធផ្សព្វផ្សាយដែលដើរតួនាទីដោយបច្ចេកវិទ្យា AI”, ទី២ សិក្ខាសាលាក្រោមប្រធានបទ “ការគ្រប់គ្រងផ្នែកបន្ទប់ផ្សាយព័ត៌មានទៅតាមប្រព័ន្ធឌីជីថល”, សិក្ខាសាលាទី៣ក្រោមប្រធានបទ “ការផ្លាស់ប្តូរ និង ការបង្កើតមាតិកាប្រព័ន្ធផ្សព្វផ្សាយតាមរយៈឧបករណ៍ និងបច្ចេកវិទ្យា AI, សិក្ខាសាលាទី៤ ក្រោមប្រធានបទ “អនាគតនៃការផ្សាយ និងការចែកចាយប្រព័ន្ធផ្សព្វផ្សាយ ការធ្វើពាណិជ្ជកម្ម និងការប្រឈម”។ សិក្ខាសាលាទី៥ក្រោមប្រធានបទ”តួនាទីការផ្សព្វផ្សាយនៅក្នុង ការជូនដំណឹងជាមុនអំពីគ្រោះអាសន្ន។ សិក្ខាសាលាទី៦ ក្រោមប្រធានបទ “តួនាទីនៃការជូនព័ត៌មាននៅក្នុងការប្រយុទ្ធប្រឆាំងព័ត៌មានក្លែងក្លាយ និងសិក្ខាសាលាទី៧ក្រោមប្រធានបទ “តួនាទីរបស់ ITU នៃការផ្សព្វផ្សាយជាមុននូវគ្រោះអាសន្នប្រកបទៅដោយប្រសិទ្ធភាព ។ ទាំងនេះជាព្រឹត្តិ្កការណ៍កើតមុនអង្គសន្និសីទ ឬសិក្ខាសាលាអម ដែលនឹងចាប់ផ្តើមឡើង៕

ដោយ៖ មករា រូបថត៖ ឃុត សៅ