AKP បន្ទាយមានជ័យ ថ្ងៃទី២១ ខែកក្កដា ឆ្នាំ២០២៥--កាលពីថ្ងៃអាទិត្យ ទី២០ ខែកក្កដា ឆ្នាំ២០២៥ ប្រាសាទតាមាន់ធំ ក្នុងស្រុកបន្ទាយអំពិល ខេត្តឧត្តរមានជ័យ បានក្លាយជាចំណុចកណ្តាលនៃចលនាជាតិនិយមដ៏ផុសផុលមួយ ដោយមានប្រជាពលរដ្ឋខ្មែររាប់ពាន់នាក់មកពីបណ្តារាជធានីខេត្តនានា ក្នុងព្រះរាជាណាចក្រកម្ពុជា បានសម្រុកទៅទស្សនាប្រាង្គប្រាសាទបុរាណមួយនេះ។ ព្រឹត្តិការណ៍នេះ ដែលប្រព្រឹត្តទៅចាប់ពីព្រឹក ដល់ម៉ោង៣៖០០រសៀល មិនត្រឹមតែបង្ហាញពីការចាប់អារម្មណ៍យ៉ាងខ្លាំងចំពោះបេតិកភណ្ឌវប្បធម៌ជាតិប៉ុណ្ណោះទេ ថែមទាំងជាសញ្ញានៃការលើកទឹកចិត្តយ៉ាងធំធេងដល់កងកម្លាំងជួរមុខដែលកំពុងឈរជើងការពារបូរណភាពទឹកដីផងដែរ។

យោងតាមរបាយការណ៍ពីមន្ទីរព័ត៌មានខេត្តឧត្តរមានជ័យ ចរាចរណ៍នៅតាមបណ្តោយផ្លូវពីប្រាសាទតាក្របី ឆ្ពោះទៅកាន់ប្រាសាទតាមាន់ធំ បានកកស្ទះអស់រយៈពេលជាងកន្លះម៉ោង ដោយសារតែវត្តមានដ៏ច្រើនកុះកររបស់ភ្ញៀវទេសចរជាតិ ដែលជាសមាជិកមហាគ្រួសារ ABC។ ការជួបជុំគ្នាដ៏ធំនេះ ត្រូវបានអមដោយពាក្យស្លោកដ៏កងរំពងថា "១០០០០នាក់ ១០០០០បេះដូង ៥សែនព្រលឹងវិញ្ញាណ ៣លានឥណ្ឌូចិន" ដែលបង្ហាញយ៉ាងច្បាស់ពីស្មារតីសាមគ្គីភាព ភាពរឹងមាំ និងកម្លាំងរួមរបស់ប្រជាពលរដ្ឋកម្ពុជាក្នុងការការពារ និងថែរក្សាបេតិកភណ្ឌរបស់ខ្លួន។ វត្តមានរបស់ប្រជាពលរដ្ឋ និងព្រះសង្ឃយ៉ាងច្រើនកុះករ បានឆ្លុះបញ្ចាំងពីការយល់ដឹងកាន់តែស៊ីជម្រៅអំពីតម្លៃនៃបេតិកភណ្ឌវប្បធម៌ជាតិ និងការគាំទ្រដល់កងកម្លាំងប្រដាប់អាវុធដែលកំពុងបំពេញបេសកកម្មយ៉ាងសកម្មនៅតំបន់ព្រំដែន។

ប្រជាពលរដ្ឋ និងព្រះសង្ឃ ភ្ញៀវទេសចរជាច្រើនបានសម្តែងក្តីរំភើបរីករាយ និងមោទកភាពយ៉ាងខ្លាំងចំពោះសម្រស់ និងតម្លៃប្រវត្តិសាស្ត្រនៃប្រាសាទតាមាន់ធំ និងតាក្របី។ ពួកគេបានលើកឡើងថា ការមកទស្សនានេះ មិនត្រឹមតែជាការកម្សាន្តប៉ុណ្ណោះទេ ប៉ុន្តែជាការចូលរួមចំណែកក្នុងការបង្ហាញការគាំទ្រដល់ទាហានខ្មែរ និងជាការរំលឹកដល់កម្លាំងរួបរួមរបស់ជាតិ។ ព្រះសង្ឃមួយអង្គបានមានសង្ឃដីកាថា "ការនិមន្តមកទីនេះ គឺដើម្បីបួងសួងសុំសេចក្តីសុខសេចក្តីចម្រើនដល់ប្រទេសជាតិ និងលើកទឹកចិត្តកូនចៅខ្មែរទាំងអស់ឲ្យបន្តថែរក្សាវប្បធម៌ដូនតា"។ សម្រាប់កងកម្លាំងជួរមុខដែលឈរជើងការពារនៅតំបន់ប្រាសាទតាមាន់ធំបានបង្ហាញថា វត្តមានរបស់ប្រជាពលរដ្ឋរាប់ពាន់នាក់នេះ បានក្លាយជាកម្លាំងចលករដ៏សំខាន់ និងជាការលើកទឹកចិត្តយ៉ាងធំធេង។ ទាហានម្នាក់បានថ្លែងទាំងទឹកមុខញញឹមថា "ពួកខ្ញុំពិតជារំភើបខ្លាំងណាស់ពេលឃើញបងប្អូនប្រជាពលរដ្ឋមកលេងច្រើនបែបនេះ។ វាបង្ហាញថាពួកគាត់មិនបានបំភ្លេចពួកខ្ញុំទេ ហើយវាធ្វើឱ្យពួកខ្ញុំកាន់តែមានកម្លាំងចិត្តការពារទឹកដីឱ្យបានគង់វង្ស"។

ប្រាសាទតាមាន់ធំដែលជាស្ថាបត្យកម្មដ៏អស្ចារ្យនៃសម័យអង្គរ មានសក្តានុពលដ៏ធំធេងក្នុងការទាក់ទាញភ្ញៀវទេសចរជាតិ និងអន្តរជាតិ។ ទីតាំងភូមិសាស្ត្ររបស់ប្រាសាទនេះ ដែលស្ថិតនៅជិតព្រំដែនកម្ពុជា-ថៃ ក៏បានផ្តល់នូវឱកាសដ៏ល្អសម្រាប់ការអភិវឌ្ឍទេសចរណ៍វប្បធម៌ និងប្រវត្តិសាស្ត្រ។ ព្រឹត្តិការណ៍នេះបានបង្ហាញយ៉ាងច្បាស់ថា ប្រាសាទតាមាន់ធំ មិនត្រឹមតែជាទីតាំងប្រវត្តិសាស្ត្រប៉ុណ្ណោះទេ ប៉ុន្តែក៏ជាមជ្ឈមណ្ឌលនៃការរួបរួមជាតិ និងជាទីតាំងដ៏មានអត្ថន័យសម្រាប់ការអប់រំយុវជនជំនាន់ក្រោយអំពីឫសគល់នៃវប្បធម៌ខ្មែរ។ តាមរយៈព្រឹត្តិការណ៍នេះ អាចឃើញថាប្រាសាទតាមាន់ធំបានដើរតួនាទីយ៉ាងសំខាន់ក្នុងការបណ្តុះស្មារតីស្នេហាជាតិ និងការយល់ដឹងអំពីបេតិកភណ្ឌវប្បធម៌របស់កម្ពុជា ខណៈពេលដំណាលគ្នានោះ ក៏បានផ្តល់នូវកម្លាំងចិត្ត និងការគាំទ្រដែលមិនអាចកាត់ថ្លៃបានដល់កងកម្លាំងការពារជាតិផងដែរ៕

ដោយ ឈុន សារ៉ាត