AKPបន្ទាយមានជ័យ ថ្ងៃទី២១ខែកក្កដា ឆ្នាំ២០២៥--ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជាបានគូសបញ្ជាក់អំពី គុណបំណាច់ដ៏ធំធេងរបស់អតីតយុទ្ធជន និងនិវត្តជន ដែលសុទ្ធតែជាអ្នកជួយជាតិ និងជាអ្នកស្ថាបនាជាតិរហូតមកទល់បច្ចុប្បន្ន។

ការថ្លែងយ៉ាងដូច្នេះក្នុងឱកាសឯកឧត្តមកិត្តិសង្គហបណ្ឌិត គន់ គីម អញ្ជើញជាអធិបតីក្នុងពិធីសម្ពោធទីស្នាក់ការសមាគមអតីតយុទ្ធជនខេត្តបន្ទាយមានជ័យកាលពីថ្ងៃទី២០ខែកក្កដាឆ្នាំ២០២៥ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា។ 

ក្នុងឱកាសនោះឯកឧត្តមកិត្តិសង្គហបណ្ឌិត គន់ គីម បានថ្លែងអំណរគុណយ៉ាងជ្រាលជ្រៅចំពោះ គុណបំណាច់របស់អតីតយុទ្ធជន ដែលបានតស៊ូពលីកម្មគ្រប់ដំណាក់កាលនៃសង្គ្រាម រួមទាំងសង្គ្រាមផ្ទៃក្នុង រហូតដល់ការបញ្ចប់សង្គ្រាមដោយជោគជ័យក្រោម នយោបាយឈ្នះ-ឈ្នះ របស់សម្ដេចតេជោ ហ៊ុន សែន ដែលឯកឧត្តមបានចាត់ទុកជា បិតាស្ថាបនិកសន្តិភាព។ ឯកឧត្តមបានបញ្ជាក់ថា បើគ្មានការដឹកនាំរបស់សម្ដេចតេជោ និងការចូលរួមចំណែកពីយុទ្ធជន យុទ្ធនារីទេ ប្រទេសកម្ពុជាក៏ពុំអាចមានសុខសន្តិភាពពេញលេញដូចសព្វថ្ងៃនេះបានដែរ។

ឯកឧត្តមបានរំលឹកពី វីរភាពអង់អាចក្លាហានរបស់អតីតយុទ្ធជនគ្រប់ជំនាន់ ក្នុងការរួមចំណែកធានាឱ្យប្រទេសកម្ពុជាមាន សុខសន្តិភាព ស្ថិរភាព និងការអភិវឌ្ឍជាតិ រហូតមកដល់សព្វថ្ងៃ។ ឯកឧត្តមបានសង្កត់ធ្ងន់ថា «គឺមានការរួមចំណែកពីអតីតយុទ្ធជន និងនិវត្តជន ទើបមានប្រទេសកម្ពុជាដ៏រុងរឿង»។

ក្នុងនាមជាអគ្គលេខាធិការសមាគមអតីតយុទ្ធជនកម្ពុជា ឯកឧត្តមបានថ្លែងថា ដោយមើលឃើញពីការរួមចំណែកដ៏ធំធេងទាំងអតីតយុទ្ធជន និងនិវត្តជន សម្ដេចតេជោ ហ៊ុន សែន ប្រធានសមាគម បានសម្រេច បញ្ចូលអតីតយុទ្ធជន និងនិវត្តជន ឱ្យមកក្រោមឆ័ត្រតែមួយ និងដឹកនាំដោយផ្ទាល់ពីសម្ដេចតេជោ។

ជាមួយនោះឯកឧត្តមក៏បានគូសបញ្ជាក់ផងដែរថា រាជរដ្ឋាភិបាលនីតិកាលទី៧ នៃរដ្ឋសភា ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងជាអនុប្រធានទី១ សមាគមអតីតយុទ្ធជនកម្ពុជា បានបន្តយកចិត្តទុកដាក់ជាប់ជានិច្ច ទាំងការផ្ដល់អត្ថប្រយោជន៍ផ្សេងៗ ក៏ដូចជាការដោះស្រាយជីវភាពរស់នៅដល់អតីតយុទ្ធជនណាដែលជួបការលំបាក ដោយផ្ដល់ ផ្ទះ និងដីសម្បទានសង្គមកិច្ច ដើម្បីជួយដល់ជីវភាពរស់នៅប្រចាំថ្ងៃឱ្យកាន់តែប្រសើរ។

ទន្ទឹមនោះ ឯកឧត្តមកិត្តិសង្គហបណ្ឌិត គន់ គីម បាននាំយក ការផ្ដាំផ្ញើសាកសួរសុខទុក្ខ ពីសម្ដេចអគ្គមហាសេនាបតីតេជោ ហ៊ុន សែន, សម្ដេចកិត្តិព្រឹទ្ធបណ្ឌិត ប៊ុន រ៉ានី, សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ពេជ ចន្ទមុន្នី។

 ឯកឧត្តមក៏បានប្រគល់អំណោយជូនអតីតយុទ្ធជនចំនួន ១៥០នាក់ ដែលម្នាក់ៗទទួលបាន អង្ករ ២៥គីឡូក្រាម, ថវិកា ៥ម៉ឺនរៀល, ទឹកត្រី ១យួរ, ទឹកស៊ីអ៊ីវ ១យួរ, ទឹកសុទ្ធ ១យួរ, មី ១កេស និងសារុង ១។

ឯកឧត្តមបានជូនពរដល់អតីតយុទ្ធជន និងនិវត្តជនទាំងអស់ សូមរក្សាសុខភាពឱ្យបានល្អ ដើម្បីបន្តទទួលបានការយកចិត្តទុកដាក់ និងអត្ថប្រយោជន៍បន្ថែមទៀតពីរាជរដ្ឋាភិបាល៕

ដោយ៖ ឈុនសារ៉ាត