AKP បន្ទាយមានជ័យថ្ងៃទី ២០ ខែកក្កដា ឆ្នាំ ២០២៥–

 ឯកឧត្ដមនាយឧត្តមសេនីយ៍ កែ គឹមយ៉ាន ឧត្តមក្រុមប្រឹក្សាផ្ទាល់ព្រះមហាក្សត្រ និងជាអ្នកតំណាងរាស្ត្រមណ្ឌលខេត្តបន្ទាយមានជ័យ រួមជាមួយលោកជំទាវ ឧកញ៉ា សិរីករុណា បុទុមរតន៍ បណ្ឌិត ម៉ៅ ម៉ាល័យ កែ គឹមយ៉ាន បាននាំយកបច្ច័យ និងសម្ភារៈបរិក្ខារជាច្រើន ប្រគេនព្រះសង្ឃនៅតាមបណ្ដាវត្តព្រំដែន ក្នុងភូមិសាស្ត្រខេត្តបន្ទាយមានជ័យ ចំនួន ៣១ វត្ត។ ពិធីដ៏មានអត្ថន័យនេះ ត្រូវបានប្រារព្ធឡើងនៅថ្ងៃអាទិត្យ ១០ រោច ខែអាសាឍ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី ២០ ខែកក្កដា ឆ្នាំ ២០២៥នេះ។

ក្នុងឱកាសដ៏ថ្លៃថ្លានេះ ឯកឧត្ដមនាយឧត្តមសេនីយ៍ កែ គឹមយ៉ាន បានមានប្រសាសន៍ទៅកាន់ព្រះសង្ឃ គណៈកម្មការវត្ត និងពុទ្ធបរិស័ទចំណុះជើងវត្តយ៉ាងកក់ក្ដៅ។ ឯកឧត្តមបានគូសបញ្ជាក់អំពីសារៈសំខាន់នៃព្រះពុទ្ធសាសនា ដែលជាសាសនារបស់រដ្ឋ និងជាគ្រឹះដ៏រឹងមាំសម្រាប់សន្តិភាព សីលធម៌ និងការអភិវឌ្ឍសង្គមជាតិ។

ឯកឧត្ដមបានលើកឡើងថា "ថ្ងៃនេះ យើងពិតជារីករាយក្រៃលែង ដែលបានមកចូលរួមក្នុងពិធីដ៏មានន័យនេះ ដើម្បីនាំយកបច្ច័យ និងសម្ភារៈនានា មកប្រគេនព្រះសង្ឃគ្រប់ព្រះអង្គ និងសម្រាប់ទ្រទ្រង់ដល់វត្តអារាមទាំងអស់ ដែលស្ថិតនៅតាមបណ្ដោយព្រំដែនរបស់យើង។ វត្តអារាមមិនត្រឹមតែជាទីកន្លែងសម្រាប់ប្រតិបត្តិធម៌ប៉ុណ្ណោះទេ ប៉ុន្តែក៏ជាមជ្ឈមណ្ឌលនៃការអប់រំ សីលធម៌ និងជាទីកន្លែងផ្ដល់នូវភាពស្ងប់ស្ងាត់ផ្លូវចិត្តដល់ប្រជាពលរដ្ឋផងដែរ។"

ឯកឧត្ដមបានបន្តទៀតថា "យើងខ្ញុំទាំងអស់គ្នា យល់ច្បាស់ពីការលំបាក និងតម្រូវការរបស់វត្តអារាមជាពិសេសនៅតាមតំបន់ព្រំដែន ដែលទាមទារនូវការយកចិត្តទុកដាក់ខ្ពស់។ ការផ្ដល់ជូននៅថ្ងៃនេះ គឺជាផ្នែកមួយនៃការរួមចំណែករបស់យើង ក្នុងការលើកកម្ពស់វិស័យព្រះពុទ្ធសាសនា និងជួយសម្រាលបន្ទុកមួយចំនួនដល់ព្រះសង្ឃ និងគណៈកម្មការវត្ត ក្នុងការថែរក្សា និងអភិវឌ្ឍន៍វត្តឲ្យកាន់តែមានភាពរីកចម្រើន។"
ក្នុងន័យនេះ ឯកឧត្ដមបានសង្កត់ធ្ងន់លើតួនាទីរបស់ព្រះសង្ឃក្នុងការផ្សព្វផ្សាយនូវព្រះធម៌ និងការអប់រំប្រជាពលរដ្ឋ ឲ្យប្រកាន់ខ្ជាប់នូវគន្លងធម៌ រស់នៅដោយសុខដុមរមនា និងចូលរួមចំណែកក្នុងការកសាងសង្គមជាតិ។ ឯកឧត្តមក៏បានថ្លែងអំណរគុណយ៉ាងជ្រាលជ្រៅដល់ព្រះសង្ឃគ្រប់ព្រះអង្គ ដែលបានលះបង់កម្លាំងកាយចិត្ត ដឹកនាំពុទ្ធបរិស័ទឲ្យដើរលើផ្លូវត្រូវ និងបានរួមចំណែកយ៉ាងសកម្មក្នុងការរក្សាសន្តិភាព និងស្ថិរភាពសង្គម។

ឯកឧត្ដមនាយឧត្តមសេនីយ៍ កែ គឹមយ៉ាន ក៏បានឆ្លៀតឱកាសអំពាវនាវដល់ពុទ្ធបរិស័ទទាំងអស់ បន្តគាំទ្រ និងចូលរួមចំណែកក្នុងការកសាង និងថែរក្សាវត្តអារាមរបស់ខ្លួនឲ្យបានគង់វង្ស ដើម្បីជាប្រយោជន៍ដល់កូនចៅជំនាន់ក្រោយ និងដើម្បីជាសក្ខីភាពនៃវប្បធម៌ និងអរិយធម៌ដ៏ផូរផង់របស់ខ្មែរ។

សូមបញ្ជាក់ថា ពិធីប្រគេនបច្ច័យ និងសម្ភារៈបរិក្ខារនៅថ្ងៃនេះ គឺជាការបង្ហាញពីទឹកចិត្តជ្រះថ្លារបស់ឯកឧត្ដមនាយឧត្តមសេនីយ៍ កែ គឹមយ៉ាន និងលោកជំទាវ ឧកញ៉ា បណ្ឌិត ម៉ៅ ម៉ាល័យ កែ គឹមយ៉ាន ចំពោះវិស័យព្រះពុទ្ធសាសនា និងជាគំរូដ៏ល្អមួយសម្រាប់សប្បុរសជនដទៃទៀត ក្នុងការចូលរួមចំណែកថែរក្សា និងលើកស្ទួយវិស័យសាសនានៅកម្ពុជាឲ្យកាន់តែរីកចម្រើន៕

ដោយ៖ ឈុន សារ៉ាត