AKP ភ្នំពេញ ថ្ងៃទី២០ ខែកក្កដា ឆ្នាំ២០២៥

ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន និងជាប្រធានលេខាធិការដ្ឋាននៃក្រុមការងារចំពោះកិច្ចរៀបចំយុទ្ធនាការនិយាយថាទេចំពោះព័ត៌មានក្លែងក្លាយបានថ្លែងថា គណៈកម្មការប្រឆាំងព័ត៌មានក្លែងក្លាយ នៃក្រសួងព័ត៌មាន ក្នុងត្រីមាសទី២ ឆ្នាំ២០២៥ បានរកឃើញព័ត៌មានក្លែងក្លាយមានចំនួន ៨៧៣ ករណី។ សម្រាប់ក្នុងឆមាសទី១ ឆ្នាំ២០២៥ គណៈកម្មការប្រឆាំងព័ត៌មានក្លែងក្លាយ នៃក្រសួងព័ត៌មាន បានកត់ត្រាព័ត៌មានក្លែងក្លាយសរុបចំនួន ១ ៧៥៧ ករណី ដែលចំនួននេះមានការកើនឡើងចំនួន ជាង១៥% បើធៀបនឹងរយៈពេលដូចគ្នាកាលពីឆ្នាំ២០២៣។

ឯកឧត្ដម ទេព អស្នារិទ្ធ បានមានប្រសាសន៍ថា ដូច្នេះយុទ្ធនាការបានដើរតួនាទីយ៉ាងសំខាន់និងបានទប់ស្កាត់ការពារកុំឱ្យព័ត៌មានក្លែងក្លាយបង្កគ្រោះថ្នាក់ដល់ប្រជាពលរដ្ឋ ជាពិសេសយុវវ័យ ដែលកម្ពុជាមានចំនួនប្រមាណ ៦៦ភាគរយនៃចំនួនប្រជាជនសរុប ដោយយុទ្ធនាការបានចុះទៅផ្សព្វផ្សាយដោយផ្ទាល់ដល់សិស្សានុសិស្សតាមសាលារៀន តាមសហគមន៍ និងតាមភូមិឃុំដែលប្រជាពលរដ្ឋរស់នៅក្នុងមូលដ្ឋានរាជធានី ខេត្តកំពុងប្រើបណ្តាញសង្គមសម្រាប់ការទទួលព័ត៌មាន។ ឯកឧត្ដមបានលើកឡើងថា យុទ្ធនាការបានលើកទឹកចិត្តឱ្យមានការចូលរួមពីសាធារណជនតាមរយៈលើកកម្ពស់ការផ្សព្វផ្សាយតែព័ត៌មានពិត តាមក្រមសីលធម៌វិជ្ជាជីវៈ មានប្រភពព័ត៌មានច្បាស់លាស់ មានភាពត្រឹមត្រូវអាចទុកចិត្តបាន ជាពិសេសតាមរយៈការលើកទឹកចិត្តឱ្យម្នាក់ៗចូលរួមទប់ស្កាត់ និងឈានទៅបញ្ចប់ចរាចរណ៍ព័ត៌មានក្លែងក្លាយក្នុងសង្គម ជាពិសេសការចូលរួមពី សំណាក់អ្នកបង្កើតមាតិកាលើបណ្តាញសង្គម អ្នកសារព័ត៌មាន និងពលរដ្ឋគ្រប់មជ្ឈដ្ឋានដែលជាអ្នកប្រើប្រាស់បណ្តាញសង្គមត្រូវចូលរួមទាំងអស់គ្នា ដើម្បីកម្ពុជាគ្មានព័ត៌មានក្លែងក្លាយ។ 

ឯកឧត្ដមអ្នកនាំពាក្យបានឱ្យដឹងទៀតថា ដូច្នេះ យុទ្ធនាការបានដើរតួនាទីយ៉ាងសំខាន់និងបានទប់ស្កាត់ការពារកុំឱ្យព័ត៌មានក្លែងក្លាយបង្កគ្រោះថ្នាក់ដល់ប្រជាពលរដ្ឋ ជាពិសេសយុវវ័យ ដែលកម្ពុជាមានចំនួនប្រមាណ ៦៦ភាគរយ នៃចំនួនប្រជាជនសរុប ដោយយុទ្ធនាការបានចុះទៅផ្សព្វផ្សាយដោយផ្ទាល់ដល់សិស្សានុសិស្សតាមសាលារៀន តាមសហគមន៍ និងតាមភូមិឃុំដែលប្រជាពលរដ្ឋរស់នៅក្នុងមូលដ្ឋានរាជធានី ខេត្តកំពុងប្រើបណ្តាញសង្គមសម្រាប់ការទទួលព័ត៌មាន។ ទន្ទឹមនេះ យុទ្ធនាការបានលើកទឹកចិត្តឱ្យមានការចូលរួមពីសាធារណជនតាមរយៈលើកកម្ពស់ការផ្សព្វផ្សាយតែព័ត៌មានពិត តាមក្រមសីលធម៌វិជ្ជាជីវៈ មានប្រភពព័ត៌មានច្បាស់លាស់ មានភាពត្រឹមត្រូវអាចទុកចិត្តបាន ជាពិសេសតាមរយៈការលើកទឹកចិត្តឱ្យម្នាក់ៗចូលរួមទប់ស្កាត់ និងឈានទៅបញ្ចប់ចរាចរណ៍ព័ត៌មានក្លែងក្លាយក្នុងសង្គម ជាពិសេសការចូលរួមពី សំណាក់អ្នកបង្កើតមាតិកាលើបណ្តាញសង្គម អ្នកសារព័ត៌មាន និងពលរដ្ឋគ្រប់មជ្ឈដ្ឋានដែលជាអ្នកប្រើប្រាស់បណ្តាញសង្គមត្រូវចូលរួមទាំងអស់គ្នាដើម្បីកម្ពុជាគ្មានព័ត៌មានក្លែងក្លាយ។

ឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មានបានថ្លែងបញ្ជាក់ថា៖ «យុទ្ធនាការបាននិងកំពុងបន្តធ្វើដំណើរទៅដល់គ្រប់ច្រកល្ហកក្នុងរាជធានី ខេត្ត ដើម្បីផ្តល់សុវត្ថិភាពព័ត៌មានក្នុងសហគមន៍ និងសង្គមជាតិទាំងមូលនិងការពារពលរដ្ឋពីគ្រោះថ្នាក់ដែលអាចបណ្តាលមកពីព័ត៌មានក្លែងក្លាយ ការប្រឌិត កាឡៃព័ត៌មាន បំភ្លៃការពិត បង្កការភាន់ច្រឡំ និងឆបោកក្នុងសង្គម ដើម្បីកេងចំណេញផ្នែកនយោបាយ ទាញយកប្រយោជន៍សេដ្ឋកិច្ចសម្រាប់តែបុគ្គល ឬក្រុមតូចណាមួយ។ យុទ្ធនាការនេះ ត្រូវបានដឹកនាំធ្វើឡើងស្របនឹងកាលៈទេសៈបច្ចុប្បន្ន ដែលកម្ពុជាក៏ដូចជាបណ្តាប្រទេសដទៃទៀតក្នុងតំបន់និងលើពិភពលោកកំពុងសស្រាក់សស្រាំ និងសហការពួតដៃប្រយុទ្ធប្រឆាំងនឹងព័ត៌មានក្លែងបន្លំ(Disinformation) ព័ត៌មានបំភ្លៃ(Malinformation) និងព័ត៌មានក្លែងក្លាយដែលកំពុងចរាចរក្នុងសង្គម ជាពិសេសតាមរយៈបណ្តាញសង្គម»។ ឯកឧត្ដមបានបញ្ជាក់ថា តាមរយៈលទ្ធផលនៃការអនុវត្តទាំងនេះ យុទ្ធនាការបានលើកកម្ពស់កម្រិតអក្ខរកម្មព័ត៌មាន និងប្រព័ន្ធផ្សព្វផ្សាយរបស់ប្រជាពលរដ្ឋយើង ដើម្បីឱ្យក្លាយជាពលរដ្ឋឌីជីថលល្អ គឺប្រើប្រាស់ព័ត៌មានបានត្រឹមត្រូវនិងដោយទទួលខុសត្រូវ ជាពិសេសពេលប្រើបណ្តាញសង្គម ដោយចេះបែងចែករវាងព័ត៌មានពិត និងព័ត៌មានក្លែងក្លាយ ឬព័ត៌មានបែបបំពុលសង្គម គ្មានប្រភពច្បាស់លាស់ តួយ៉ាងប្រភពពីក្រៅប្រទេសមួយចំនួនដែលមិនអាចទុកចិត្តបានឡើយ ព្រោះមានចរិកនយោបាយជាតិនិយមជ្រុល ក្រុមដែលមិនស្រឡាញ់សន្តិភាព និងមិនគោរពច្បាប់/ច្បាប់អន្តរជាតិក្នុងការដោះស្រាយវិបត្តិ ឬព័ត៌មានដែលមានប្រភពពី MMO មួយចំនួនដែលប្រើបណ្តាញសង្គមសម្រាប់បង្កើតព័ត៌មានក្លែងក្លាយ បង្កចលាចល បង្ខូចកេរ្តិ៍ឈ្មោះ ជេរប្រមាថ ប៉ះពាល់ដល់សិទ្ធិ និងបង្កើតហានិភ័យ ការខាតបង់ប្រាក់កាស ប៉ះពាល់កិត្តិយស និងបង្កគ្រោះថ្នាក់ដល់អ្នកដទៃ ជាពិសេសក្រុមជនងាយរងគ្រោះ។ ឯកឧត្តមអ្នកនាំពាក្យបានបញ្ជាក់បន្ថែមថា៖ «យុទ្ធនាការបាននិងកំពុងមានដំណើរការយ៉ាងសកម្ម ដោយទទួលបានការគាំទ្រពីសាធារណជនគ្រប់ទិសទី រីឯការអនុវត្តតាមបណ្តារាជធានីខេត្តមានការចូលរួមយ៉ាងផុលផុសពីថ្នាក់ដឹកនាំ មន្ត្រីរាជការ អាជ្ញាធរក្នុងមូលដ្ឋាន និងតួអង្គពាក់ព័ន្ធដែលបានធ្វើឱ្យយុទ្ធនាការនេះកំពុងប្រែក្លាយជាចលនាជាតិក្នុងការទប់ស្កាត់ និងលុបបំបាត់ព័ត៌មានក្លែងក្លាយពីសង្គមយើង»។

បើតាមឯកឧត្ដម ទេព អស្នារិទ្ធ ចាប់តាំងពីដើមខែមេសា ឆ្នាំ២០២៥មក យុទ្ធនាការនិយាយថាទេចំពោះព័ត៌មានក្លែងក្លាយ ដែលដឹកនាំដោយក្រសួងព័ត៌មាន និងសម្របសម្រួលការអនុវត្តក្នុងបណ្តារាជធានី ខេត្ត ដោយមន្ទីរព័ត៌មាន មាន ដំណើរការយ៉ាងសកម្ម ដោយទទួលបានការគាំទ្រពីសាធារណជនគ្រប់ទិសទី រីឯការអនុវត្តតាម បណ្តារាជធានី ខេត្ត មានការចូលរួមយ៉ាងផុលផុសពីថ្នាក់ដឹកនាំ មន្ត្រីរាជការ អាជ្ញាធរក្នុងមូលដ្ឋាន និងតួអង្គពាក់ព័ន្ធ ដែលបានធ្វើឱ្យយុទ្ធនាការនេះកំពុងប្រែក្លាយជាចលនាជាតិក្នុងការទប់ស្កាត់ និងលុបបំបាត់ ព័ត៌មានក្លែងក្លាយពីសង្គមយើង។ ឯកឧត្ដមបានបន្ដទៀតថា លទ្ធផលត្រីមាសដំបូងគឺពីខែមេសា ដល់មិថុនា ឆ្នាំ២០២៥ នៃការអនុវត្ត ក្នុងរាជធានី-ខេត្ត យុទ្ធនាការទទួលបានលទ្ធផលសំខាន់ៗដូចខាងក្រោម៖ ១) យុទ្ធនាការបានបញ្ចេញមាតិកាព័ត៌មាន និងបែបអប់រំតាមប្រព័ន្ធផ្សាយក្នុងដៃ និងឯកជន ទាំង ប្រពៃណី ទំនើប បណ្តាញសង្គម ប្រមាណ ៧ពាន់ ដង/មាតិកា។ ចំនួននេះនៅមិនគិតចំនួននៃការផ្សាយចេញបន្តពីយុទ្ធនាការ ដោយការផ្សាយឯកជនដោយពលរដ្ឋ និងសហគមន៍(users) ច្រើនទៀត។ ២) យុទ្ធនាការបានផលិតមាតិកាថ្មី (Original content ) សរុបចំនួន ប្រមាណ៨០០ សាច់រឿងថ្មី សម្រាប់ការបញ្ចេញតាមប្រព័ន្ធផ្សព្វផ្សាយ និងបណ្តាញសង្គម និងសម្រាប់ប្រើប្រាស់ក្នុង សកម្មភាព យុទ្ធនាការ តាមរយៈព្រឹត្តិការណ៍តាមទីសាធារណៈក្នុងខេត្ត/ក្រុង/ស្រុកសរុបចំនួន១៧៥លើក ដែលត្រូវ បានរៀបចំក្នុងរាជធានីភ្នំពេញ កណ្តាល កំពង់ស្ពឺ កំពង់ឆ្នាំង តាកែវ កំពត កែប ព្រះស៊ីហនុ និងកោះកុង ដោយមាន មនុស្សចូលរួមផ្ទាល់សរុបចំនួនប្រមាណ២ម៉ឺន ៣ពាន់នាក់។ ក្នុងខែកក្កដា យុទ្ធនាការ ដំណើរការដល់ព្រះស៊ីហនុ និងកោះកុង ខណៈរាជធានី-ខេត្ត ផ្សេងទៀតនៅបន្តអនុវត្តន៍សកម្មទាំងក្នុងមូលដ្ឋានផ្ទាល់ និងលើបណ្តាញផ្សាយគ្រប់ទម្រង់។ ៣) ការផ្សាយតាមបណ្តាញសង្គម យុទ្ធនាការទទួលបានការចូលមើលពីសាធារណជន សរុបប្រមាណជិតកន្លះលាន ខណៈមានការចែករំលែកបន្តជាង១សែនដង ផងដែរក្នុងសង្គមហ្វេសប៊ុក និងបណ្តាញសង្គមផ្សេងទៀត។   ៤) ការផ្សព្វផ្សាយតាមទីសាធារណៈតាមរយៈផ្ទាំងប៉ាណូធំៗសរុបចំនួន ៣៩ផ្ទាំង/ទីតាំងនៅក្នុងរាជធានីភ្នំពេញ កណ្តាល កំពង់ចាម សៀមរាប រតនគីរី ត្បូងឃ្មុំ តាកែវ ព្រះសីហនុ ស្វាយរៀង កំពង់ស្ពឺ កំពត កែប មណ្ឌលគីរី កំពង់ឆ្នាំង និងបាត់ដំបង។ ៥) ក្រោមកិច្ចសហការជាមួយក្រសួងប្រៃសណីយ៍ និងទូរគមនាគមន៍ យុទ្ធនាការបានផ្ញើសារអប់រំផ្សព្វផ្សាយតាមប្រព័ន្ធ TRC-SMS សរុបចំនួន៩សារ ទៅកាន់អ្នកប្រើប្រាស់ ទូរស័ព្ទចល័តចំនួនជាង ២៣លាន នាក់/គណនី នៅទូទាំងប្រទេស និងបានផ្សាយសារអប់ជាសំឡេង តាមរយៈ call-tune រយៈពេលបីសប្តាហ៍ក្នុងខែ មិថុនា-កក្កដា ឆ្នាំ២០២៥៕

ដោយ៖ រិទ្ធី