AKP ភ្នំពេញថ្ងៃទី២០ ខែកក្កដា ឆ្នាំ ២០២៥–

រដ្ឋបាលខេត្តពោធិ៍សាត់ សហការជាមួយមន្ទីរកសិកម្ម រុក្ខាប្រមាញ់ និងនេសាទខេត្ត ថ្ងៃទី១៩ ខែកក្កដា ឆ្នាំ២០២៥ បានប្រារព្ធទិវាមច្ឆជាតិ ១ កក្កដា ឆ្នាំ២០២៥ ដោយបានលែងកូនត្រី និងត្រីមេពូជនៅស្រះជំរកត្រីសហគមន៍នេសាទបឹងកំពែង ស្ថិតក្នុងឃុំព្រងិល ស្រុកភ្នំក្រវាញ ។

ត្រីដែលបានលែងនោះ ជាប្រភេទកូនត្រីចម្រុះប្រមាណ ៣០.០០០ក្បាល និងត្រីមេពូជចំនួន១០០គីឡូក្រាម ក្នុងនោះរួមមាន កូនត្រីឆ្អិន កូនត្រីប្រា កូនត្រីពោធិ៍ អណ្ដើក កង្កែប និងត្រីមេ មានត្រីក្រាញ់  រៀល ឆ្អិន និងត្រីប្រាជាដើម ដើម្បីបង្កើនផលស្តុកធម្មជាតិក្នុងបឹងជម្រកត្រីធម្មជាតិឱ្យសម្បូរឡើងវិញ ជាប្រយោជន៍ដល់ប្រជាពលរដ្ឋក្នុងតំបន់ត្រីធម្មជាតិ ក៏ដូចក្នុងខេត្ត។

ក្នុងឱកាសនេះ ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់បានលើកឡើងថា ទិវាមច្ឆជាតិត្រូវបានប្រារព្ធធ្វើជារៀងរាល់ឆ្នាំស្របតាមច្បាប់ស្តីពីជលផល ហើយក្នុងឆ្នាំនេះរដ្ឋបាលខេត្តបានរៀបចំនៅស្រះជំរកត្រីសហគមន៍នេសាទបឹងកំពែង ក្នុងគោលបំណងបំផុសប្រជាពលរដ្ឋចូលរួមចំណែកការពារ អភិរក្ស និងអភិវឌ្ឍន៍វិស័យជលផល ក្នុងទិសដៅធានានិរន្តរភាពនៃធនធានជលផលដើម្បីផលប្រយោជន៍សេដ្ឋកិច្ច-សង្គម និងបរិស្ថាន។

ឯកឧត្ដមអភិបាលខេត្តបានបន្តថា បច្ចុប្បន្ននេះរដ្ឋបាលខេត្តពោធិ៍សាត់ បាន និងកំពុងខិតខំប្រឹងប្រែងជំរុញអនុវត្តយ៉ាងសកម្មនូវយុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាល ជាពិសេសកម្មវិធីគោលនយោបាយអាទិភាពទី៥ និងទី៦ និងផែនការអភិវឌ្ឍន៍វិស័យកសិកម្ម ដើម្បីបង្កើនល្បឿនអភិវឌ្ឍន៍វិស័យកសិកម្មឱ្យក្លាយជាកម្លាំងចលករដ៏រឹងមាំក្នុងការធានាសន្តិសុខស្បៀង ចូលរួមទ្រទ្រង់កំណើនសេដ្ឋកិច្ច និងលើកស្ទួយជីវភាពប្រជាកសិករប្រកបដោយនិរន្តរភាព។ ឯកឧត្តមបានស្នើឱ្យបងប្អូនប្រជាពលរដ្ឋគ្រប់រូបយល់ថា ការគ្រប់គ្រងធនធានធម្មជាតិប្រកបដោយប្រសិទ្ធភាព និងនិរន្តរភាពត្រូវផ្សារភ្ជាប់ការធ្វើអាជីវកម្មទៅនឹងការអភិរក្សជលផល ការធ្វើវារីវប្បកម្ម និងការពារបរិស្ថាន គឺជាបញ្ហាដែលមានសារៈសំខាន់ និងមានតម្លៃបំផុតសម្រាប់ទ្រទ្រង់ជីវិតមនុស្ស សត្វ រុក្ខជាតិ និងជីវចម្រុះផ្សេងៗទៀតជាច្រើន ។ ដូច្នេះត្រូវប្តេជ្ញារួមគ្នាការពារ អភិរក្ស និងគ្រប់គ្រងធនធានជលផលធម្មជាតិដែលមានតម្លៃធំធេងនេះឱ្យខាងតែបាន ដើម្បីរក្សាជាកេរ្តិ៍ដំណែលដល់កូនចៅយើងជំនានក្រោយៗទៀត។

បើតាមមន្ទីរកសិកម្ម រុក្ខាប្រមាញ់ និងនេសាទខេត្តពោធិ៍សាត់បានឱ្យដឹងថា ក្នុងខេត្តពោធិ៍សាត់មានសហគមន៍នេសាទចំនួន៣៥ ដែលបានបង្កើតឡើងក្នុងក្រុង-ស្រុកទាំង៧ និងមានការទទួលស្គាល់ដោយក្រសួងកសិកម្ម រុក្ខាប្រមាញ់ និងនេសាទ។ សហគមន៍ទាំងអស់បានចូលរួមយ៉ាងសកម្មក្នុងការការពារ និងអភិរក្សធនធានជលផលនៅក្នុងខេត្ត ហើយចំពោះការអភិរក្សធនធានជលផលមកដល់បច្ចុប្បន្ននេះ កន្លែងអភិរក្សជលផលក្នុងខេត្តពោធិ៍សាត់មាន៦កន្លែង ដែលមានផ្ទៃដីសរុប២២.៩៥០ហិកតា និងបានបង្កើតស្រះជម្រកត្រីបានចំនួន៣៣កន្លែង។ ផលនេសាទទឹកសាបក្នុងឆមាសទី១ ឆ្នាំ២០២៥នេះ ខេត្ត សម្រេចបានចំនួន៣១.៦០០តោន មានការកើនឡើងជាង១.២០០តោន បើធៀបនឹងឆ្នាំ២០២៤ និងទទួលបានផលពីវារីវប្បកម្ម/ចិញ្ចឹមត្រីតាមស្រះ និងតាមបែរចំនួន១៣.០៤២តោនផងដែរ៕

ដោយ៖ ចាន់ សុភឿន (ប្រភព៖ រដ្ឋបាលខេត្តពោធិ៍សាត់)