AKPកំពង់ធំថ្ងៃទី១៩ ខែកក្កដា ឆ្នាំ ២០២៥--

ឯកឧត្តមចាន់ យុត្ថា រដ្ឋលេខាធិការក្រសួងធនធានទឹកនិងឧតុនិយមនិងជាប្រធានក្រុមការងារចុះមូលដ្ឋានឃុំប្រឡាយនិងឃុំពពកស្រុកស្ទោង ខេត្តកំពង់ធំ បានអញ្ជើញចុះជួបសំណេះសំណាលសួរសុខទុក្ខនិងលើកទឹកចិត្តដល់សិក្សានុសិស្សជាបេក្ខជនត្រៀមប្រលងសញ្ញាបត្រមធ្យមសិក្សាទុតិយភូមិ នៃវិទ្យាល័យជាស៊ីមប្រឡាយ ដែលត្រៀមប្រលងសញ្ញាបត្រមធ្យមសិក្សាឆ្នាំនេះ។

ក្នុងឱកាសនោះឯកឧត្តមចាន់យុត្ថាបានពាំនាំការផ្ដាំផ្ញើសួរសុខទុក្ខពីសំណាក់ឯកឧត្តមថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម ដែលលោកតែងតែគិតគូរយកចិត្តទុកដាក់ខ្ពស់ដល់ វិស័យអប់រំជាពិសេសសិស្សានុសិស្សគ្រប់ ភូមិសិក្សាក៏ដូចជាពុកម៉ែបងប្អូនប្រជាពលរដ្ឋទូទាំង ស្រុកស្ទោងទាំងមូលជាពិសេសឯកឧត្តមបានកសាងនូវប្រព័ន្ធធារាសាស្ត្រនិងហេដ្ឋារចនាសម្ព័ន្ធយ៉ាងច្រើនដែលជាការរួមចំណែកយ៉ាងធំធេងក្នុងការអភិវឌ្ឍន៍ស្រុកស្ទោងសព្វថ្ងៃនេះ។

ជាមួយគ្នានេះឯកឧត្តមបានកោតសរសើរខ្ពស់ដល់លោកនាយក លោកគ្រូ អ្នកគ្រូ ដែលបានខិតខំយកចិត្តទុកដាក់ក្នុងការបង្ហាត់បង្រៀនបេក្ខជននិងសិស្សានុសិស្សអស់ពីលទ្ធភាពក្នុងការត្រៀមប្រឡងក្នុងពេលខ្លីខាងមុខនិងបានណែនាំដល់បេក្ខជនត្រៀមប្រឡងត្រូវប្រើប្រាស់ពេលវេលាដែលនៅសេសសល់ទាំងប៉ុន្មានឱ្យអស់ពីលទ្ធភាពនិងជូនពរបេក្ខជនគ្រប់រូបសូមទទួលបាននូវលទ្ធផលនិងនិទ្ទេសល្អគ្រប់ៗគ្នា។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះប្រព្រឹត្តទៅនៅថ្ងៃទី ១៨ខែសីហា ឆ្នាំ ២០២៥ខាងមុខនេះ ហើយក្នុងឱកាសនេះដែរឯកឧត្តមបានឧបត្ថម្ភរួមមាន៖១.លោកគ្រូ អ្នកគ្រូបង្រៀនវគ្គបំប៉ន ចំនួន ២លាន៧៥ម៉ឺនរៀល។២. សិស្សានុសិស្សដែលខ្វះលទ្ធភាពសម្រាប់ការធ្វើដំណើរ និងការស្នាក់នៅ ចំនួន ១៩នាក់ ក្នុងម្នាក់ៗ ១២ម៉ឺនរៀល។៣. ក្មួយៗជាបេក្ខជនប្រឡង ចំនួន ៧០នាក់ ក្នុងម្នាក់ៗ ៦ម៉ឺនរៀល។៤.លោកគ្រូ អ្នកគ្រូនៃវិទ្យាល័យ ជា ស៊ីម ប្រឡាយ ចំនួន ៣៧នាក់ ក្នុងម្នាក់ៗ ៤ម៉ឺនរៀល។៥.ក្រុមប្រឹក្សាឃុំ និងយុវជនឃុំប្រឡាយ សរុបចំនួន ២១នាក់ម្នាក់ៗចំនួន២ម៉ឺនរៀលផងដែរ៕

ដោយ៖ ស៊ុម វណ្ណា