AKP ភ្នំពេញ ថ្ងៃទី១៩ ខែកក្កដា ឆ្នាំ២០២៥--

ថ្នាក់ដឹកនាំក្រសួងអប់រំ យុវជន និងកីឡា និងតំណាងគណៈកម្មាធិការជាតិអូឡាំពិកកម្ពុជា (NOCC) ព្រមទាំងតំណាងមកពី៥០សហព័ន្ធកីឡាជាតិបានចូលរួមពិភាក្សារៀបចំរបាយការណ៍សិក្សាវាយតម្លៃផលប៉ះពាល់ ក្នុងការរៀបចំសេចក្តីព្រាងច្បាប់ស្តីពីអប់រំកាយ និងកីឡា ដើម្បីប្រមូលធាតុចូល មុនដាក់ឆ្លងក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី។

កិច្ចពិភាក្សាជាមួយភាគីពាក់ព័ន្ធនេះបានធ្វើឡើងនៅមជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃទី១៨ ខែកក្កដា ឆ្នាំ២០២៥ ក្រោមវត្តមានឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា។

ឯកឧត្តម វ៉ាត់ ចំរើន បានលើកឡើងថា យោងតាមការចំបាច់ សេចក្តីព្រាងច្បាប់ស្តីពីអប់រំកាយនិងកីឡាកំពុងតែត្រូវបានពិនិត្យ និងកែសម្រួល ព្រមទាំងត្រៀមដាក់ឆ្លងក្រុមប្រឹក្សាអ្នកច្បាប់នៃទីស្តីការគណៈរដ្ឋមន្ត្រី។ ក្នុងនោះដែរ របាយការណ៍សិក្សាវាយតម្លៃផលប៉ះពាល់ គឺជាឯកសារមួយក្នុងចំណោមឯកសារផ្សេងទៀត ដែលត្រូវដាក់ជូនទៅទីស្តីការគណៈរដ្ឋមន្ត្រី ភ្ជាប់ជាមួយសេចក្តីព្រាងច្បាប់។ ក្នុងន័យនេះ ដើម្បីប្រមូលធាតុចូលឱ្យបានគ្រប់ជ្រុងជ្រោយពីគ្រប់ភាគីពាក់ព័ន្ធ ក្នុងកិច្ចពិភាក្សាដើម្បីរៀបចំរបាយការណ៍វាយតម្លៃផលប៉ះពាល់ក្នុងការរៀបចំសេចក្តីព្រាងច្បាប់ស្តីពីអប់រំកាយនិងកីឡានេះ។

ឯកឧត្តមរដ្ឋលេខាធិការគូសបញ្ជាក់ថា កិច្ចពិភាក្សានេះមានគោលដៅឱ្យសេចក្តីព្រៀងច្បាប់នេះ អាចយកទៅអនុវត្តឱ្យមានប្រសិទ្ធភាពខ្ពស់ ក្រោយចូលជាធរមាន។ ដោយទទួលបានអនុសាសន៍ដ៏ខ្ពង់ខ្ពស់ពីឯកឧត្តមបណ្ឌិតសភាចា្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានពិនិត្យលើពង្រាងច្បាប់ស្តីពីអប់រំកាយ និងកីឡានេះម្តងរួចហើយ ក្នុងក្រុមការងារថ្នាក់ក្រសួង ដោយក្រសួងបានផ្ទៀងផ្ទាត់ ពិនិត្យ និងកែសម្រួលពង្រាងច្បាប់នេះជាច្រើនរួចមកហើយដែរ។ ជាមួយគ្នានេះ ក៏មានសេនាធិការផ្នែកច្បាប់ ពីនីតិកម្ម និងគណៈកម្មការកំណែទម្រង់ ដែលធ្វើឱ្យកិច្ចការរៀបចំសេចក្តីព្រាងច្បាប់ស្តីពីអប់រំកាយ និងកីឡានេះកាន់តែរឹងមាំបន្ថែមទៀត។ ក្នុងកិច្ចពិភាក្សានេះ យើងបានពិនិត្យលើ១មាត្រាម្តងៗ ទាក់ទងនឹងអង្គការសង្គមកីឡារបស់យើង ដោយយោងទៅលើគោលនយោបាយកីឡាជាតិ ដែលរាជរដ្ឋាភិបាលកម្ពុជាបានទទួលស្គាល់រួចហើយ ដោយសង្កត់ធ្ងន់លើស្វ័យភាពរបស់រដ្ឋយកចិត្តទុកដាក់គាំទ្រហិរញ្ញវត្ថុដល់សហព័ន្ធកីឡាជាតិ និងស្វ័យភាពបច្ចេកទេសរបស់សហព័ន្ធកីឡាជាតិ។ ដូច្នេះតាមរយៈពង្រាងច្បាប់នេះបានពង្រឹងបន្ថែមទៀត ស្របតាមគោលនយោបាយជាតិ។

ជាមួយគ្នានេះ ឯកឧត្តមក៏បានឱ្យតំណាងសហព័ន្ធកីឡាជាតិនានាពិនិត្យមើលលើបទប្បញ្ញត្តិរបស់សហព័ន្ធកីឡាអន្តរជាតិ ដោយសហព័ន្ធកីឡាជាតិមួយចំនួនធំមានសហព័ន្ធកីឡាអន្តរជាតិជាគោល លើកលែងតែសហព័ន្ធកីឡាជាតិខ្លះមិនមានសហព័ន្ធអន្តរជាតិជាគោលនោះទេ ដូចជាសហព័ន្ធកីឡាប្រពៃណីជាតិជាតិខ្មែរជាដើម។ ចំពោះប្រភេទកីឡាអូឡាំពិក មានបទដ្ឋានគតិយុត្តិជាអន្តរជាតិរឹងមាំរួចហើយ ដូច្នេះហើយឯកឧត្តមបានឱ្យសហព័ន្ធកីឡាជាតិមួយចំនួនចូលរួមជាមតិយោបល់ថាតើមានបញ្ហាអ្វីខ្លះជាផលប៉ះពាល់ក្នុងការងាររបស់ខ្លួនឱ្យបានផុសផុលផងដែរ៕

ដោយ  ហេង​ ណាលីន