AKP បន្ទាយមានជ័យ ថ្ងៃទី១៩ ខែកក្កដា ឆ្នាំ២០២៥–

ឯកឧត្ដម កែ គឹមយ៉ាន សមាជិកគណៈអចិន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តបន្ទាយមានជ័យ បានអញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំបូកសរុបលទ្ធផលការងារដឹកនាំរបស់គណបក្សប្រចាំឆមាសទី១ ឆ្នាំ២០២៥ និងទិសដៅអនុវត្តបន្ត។ 

ពិធីដ៏សំខាន់នេះបានប្រព្រឹត្តទៅព្រឹកថ្ងៃទី១៩ ខែកក្កដា ឆ្នាំ២០២៥នេះ នៅសាលប្រជុំធំ ទីស្នាក់ការគណបក្សប្រជាជនកម្ពុជា ខេត្តបន្ទាយមានជ័យ។

ពិធីនេះក៏មានការអញ្ជើញចូលរួមពីសំណាក់ ឯកឧត្តម ឌិត ទីណា អនុប្រធានទី១ ក្រុមការងារគណបក្សចុះមូលដ្ឋានខេត្តបន្ទាយមានជ័យ, ឯកឧត្តម អ៊ុ រាត្រី ប្រធានគណៈកម្មាធិការគណបក្សខេត្ត, ឯកឧត្តម លោកជំទាវសមាជិកព្រឹទ្ធសភាអ្នកតំណាងរាស្ត្រមណ្ឌលបន្ទាយមានជ័យ, ក្រុមការងារ, សមាជិក-សមាជិកាគណបក្សទាំង៩ក្រុង-ស្រុកជិត១០០០នាក់។

ក្នុងឱកាសនោះ ឯកឧត្ដម កែ គឹមយ៉ាន បានថ្លែងនូវប្រសាសន៍ណែនាំដ៏មានតម្លៃ និងស៊ីជម្រៅ ដោយបានគូសបញ្ជាក់អំពីសមិទ្ធផលសំខាន់ៗដែលគណបក្សសម្រេចបានក្នុងឆមាសទី១ ឆ្នាំ២០២៥ ក៏ដូចជាបញ្ហាប្រឈមនានាដែលត្រូវដោះស្រាយបន្ត។ 

ឯកឧត្ដមបានសង្កត់ធ្ងន់លើសារៈសំខាន់នៃការបន្តយកចិត្តទុកដាក់ខ្ពស់លើការលើកកម្ពស់ជីវភាពរស់នៅរបស់ប្រជាពលរដ្ឋ ជាពិសេសតាមរយៈការជំរុញវិស័យកសិកម្ម ទេសចរណ៍ និងការបង្កើតការងារនៅក្នុងខេត្ត។ គណបក្សត្រូវតែបន្តឈរជើងយ៉ាងរឹងមាំជាមួយប្រជាជន ស្វែងយល់ពីតម្រូវការរបស់ពួកគាត់ និងដោះស្រាយបញ្ហាប្រឈមនានាប្រកបដោយប្រសិទ្ធភាព។

ឯកឧត្ដមបានជំរុញឱ្យថ្នាក់ដឹកនាំ និងសមាជិក-សមាជិកាគណបក្សទាំងអស់បន្តពង្រឹងសាមគ្គីភាពផ្ទៃក្នុង និងឯកភាពគ្នាឱ្យបានរឹងមាំ ដើម្បីធានាបាននូវការដឹកនាំប្រកបដោយចីរភាព និងជោគជ័យ។ ការរួបរួមគ្នាគឺជាកម្លាំងដ៏សំខាន់ក្នុងការសម្រេចបាននូវគោលដៅរួមរបស់គណបក្ស។
ជាមួយនោះឯកឧត្ដមបានកោតសរសើរចំពោះកិច្ចខិតខំប្រឹងប្រែងរបស់អាជ្ញាធរមូលដ្ឋានក្នុងការអភិវឌ្ឍហេដ្ឋារចនាសម្ព័ន្ធរូបវន្តនានា ដូចជាផ្លូវថ្នល់ ប្រព័ន្ធធារាសាស្ត្រ និងសាលារៀន ដែលបានរួមចំណែកយ៉ាងសំខាន់ក្នុងការលើកកម្ពស់សេដ្ឋកិច្ច និងសង្គមក្នុងខេត្ត។ 
ទន្ទឹមនោះ ឯកឧត្ដមបានរំលឹកដល់សមាជិកគណបក្សទាំងអស់ឱ្យត្រៀមលក្ខណៈឱ្យបានល្អប្រសើរសម្រាប់ការបោះឆ្នោតនាពេលខាងមុខ ដោយត្រូវបន្តចុះមូលដ្ឋានឱ្យបានញឹកញាប់ ជួបសំណេះសំណាលជាមួយប្រជាពលរដ្ឋ និងពន្យល់អំពីគោលនយោបាយរបស់គណបក្ស ដើម្បីទទួលបានការគាំទ្រកាន់តែច្រើន។

បន្តរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ដើម្បីធានាបាននូវបរិយាកាសអំណោយផលសម្រាប់ការអភិវឌ្ឍ និងការរស់នៅរបស់ប្រជាពលរដ្ឋ។

ឯកឧត្ដម កែ គឹមយ៉ាន បានសម្តែងនូវជំនឿមុតមាំថា ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ខេត្តបន្ទាយមានជ័យនឹងបន្តទទួលបាននូវការរីកចម្រើនលើគ្រប់វិស័យ ដើម្បីរួមចំណែកដល់ការកសាង និងអភិវឌ្ឍន៍ប្រទេសជាតិឱ្យកាន់តែរីកចម្រើនទៅមុខ៕

ដោយ៖ ឈុន សារ៉ាត