AKPកំពង់ធំថ្ងៃទី១៩ ខែកក្កដា ឆ្នាំ២០២៥–

លោក លឹម សុថាត នាយសង្កាត់រដ្ឋបាលជលផលកំពង់ស្វាយក្រោមបានចូលរួមជាមួយលោកវរសេនីយ៍ទោ ស៊ុន ណារិន ប្រធានទីបញ្ជការស្រាលយោធភូមិភាគទី៤តំបន់ប្រតិបត្តិការសឹករងកំពង់ធំសហការជាមួយកម្លាំងសមត្ថកិច្ចជំនាញរដ្ឋបាលជលផលប្រចាំឃុំផាត់សណ្ដាយកាលពីថ្ងៃទី១៨ខែកក្កដាឆ្នាំ២០២៥បានចុះត្រួតពិនិត្យនិងបង្ក្រាបបទល្មើសនេសាទនៅចំណុចតាសោម ឃុំផាត់សណ្ដាយ ស្រុកកំពង់ស្វាយខេត្តកំពង់ធំ។

ជាលទ្ធផលអនុវត្តបាន០១ករណី បានរុះរើបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន÷របាំងសាច់អួនក្រឡាញឹកចំនួន០៤របាំងប្រវែង៤០០ម៉ែត្របង្គោលចំនួន២០០ដើម សាច់ឡុកចំនួន៨គ្រឿង លបលូចំនួន៨មាត់និងចាក់ព្រលែងកូនត្រីស្រស់ចម្រុះមួយចំនួនចូលទន្លេវិញ។

នៅថ្ងៃជាមួយគ្នានេះដែរលោក ហួន ផល នាយសង្កាត់រដ្ឋបាលជលផលពាមបាង បានចូលរួមជាមួយលោកអនុសេនីយ៍ឯក សុខ វណ្ណដា នាយទាហានថ្នាក់ដឹកនាំតំបន់ប្រតិបត្តិការសឹករងកំពង់ធំ យោធភូមិភាគទី៤ សហការជាមួយកម្លាំងចម្រុះ ទីបញ្ជាការស្រាលប្រចាំការ ឃុំពាមបាងស្រុកស្ទោងបានចេញប្រតិបត្តិការត្រួតពិនិត្យ និងបង្ក្រាបបទល្មើសនេសាទ នៅចំណុច ព្រែកបាឡត ក្នុងភូមិសាស្ត្របាឡតឃុំពាមបាង ស្រុកស្ទោង ខេត្តកំពង់ធំ។ ជាលទ្ធផលអនុវត្តបាន០១ ករណីដោយបានរុះរើ កាប់បំផ្លាញចោលឧបករណ៍នេសាទ ខុសច្បាប់នៅនឹងកន្លែងរួមមាន÷របាំងសាច់អូនក្រឡាញឹកចំនួន០២របាំង ប្រវែង២២០ម៉ែត្រឡុកសាច់អូនចំនួន៥គ្រឿង លូសាច់អួនចំនួន៥មាត់ បង្គោលឈើចំនួន៥៧០ដើម ចាក់លែងត្រីស្រស់ចម្រុះមួយចំនួនចូលទន្លេវិញ។

លោក គន ចាន់សីហា នាយសង្កាត់រដ្ឋបាលជលផលស្ទោង ដឹកនាំកម្លាំងសហគមន៍នេសាទស្ពានគ្រង និងសហគមន៍នេសាទនាងនយតាពីចុះបង្រ្កាបបទល្មើសជលផលក្នុងភូមិសាស្រ្តស្រុកស្ទោង ខេត្តកំពង់ធំ ជាលទ្ធផលអនុវត្តបាន០២ករណីដោយបានរុះរើ កាប់បំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន÷១.របាំងស្បៃមុងចំនួន១៥របាំង ប្រវែង៨០០ម៉ែត្រ ឡុកចំនួន១០គ្រឿង លូចំនួន១០មាត់។២.របាំងសាច់អួនក្រឡាញុឹកចំនួន៨របាំងប្រវែង១២០០មឡុកចំនួន៨គ្រឿង លូចំនួន៨មាត់ បង្គោលចំនួន៥០០ដើមនិងបានចាក់ព្រលែងត្រីស្រស់ទំងន់៤០គីឡូក្រាមចូលទន្លេវិញ។

លោក ភិន សុភា នាយសង្កាត់រដ្ឋបាលជលផលបារាយណ៍(ប្រចាំស្រុកតាំងគោក)ចូលរួមជាមួយទីបញ្ជាការស្រាលកោះរះចុះបង្ក្រាបបទល្មើសជលផលនៅចំណុចខាងលិចភូមិទួលតាមុំ,សានស្រី,ដៃវែងនិងអូលួស្ថិតក្នុងភូមិសាស្រ្តឃុំទ្រៀល ស្រុកតាំងគោក ខេត្តកំពង់ធំ ជាលទ្ធផលអនុវត្តបាន០២ករណីដោយបានរុះរើបំផ្លាញចោលឧបករណ៍នេសាទខុសច្បាប់នៅហ្នឹងកន្លែងរួមមាន÷១.របាំងសាច់អួនក្រឡាញិក០២របាំងប្រវែង១២៥ម៉ែត្រ ឡុក០២គ្រឿងលបលូ០៦មាត់។២.របាំងស្បៃមុង០៦របាំងប្រវែង៣៦៥ម៉ែត្រ ឡុក០៦គ្រឿង លបលូ០៦មាត់បង្គោល១៣៨ដើម ចាក់លែងត្រីចម្រុះទំងន់១០គីឡូក្រាមចូលទន្លេវិញ។

ដោយឡែកលោក សៅ វណ្ណសិរីវុទ្ធ នាយសង្កាត់រដ្ឋបាលជលផលកំពង់ស្វាយលើ មន្ត្រីជាប់កិច្ចសន្យា និងគណៈកម្មការសហគមន៍នេសាទសាមគ្គីកំពង់គោ ចុះទប់ស្កាត់និងបង្រ្កាបបទល្មេីសជលផល នៅចំណុចបឹងព្រះស្នែង ក្នុងដែនសហគមន៍នេសាទសាមគ្គីកំពង់គោ ស្ថិតនៅក្នុងភូមិសាស្រ្តភូមិខ្សាច់ជីរស់ ឃុំកំពង់គោ ស្រុកកំពង់ស្វាយតាមការត្រួតពិនិត្យជាក់ស្តែងពុំឃើញមានអ្វីគួឱ្យកត់សម្គាល់ឡើយ៕

ដោយ៖ ស៊ុម វណ្ណា