AKPកំពង់ធំ ថ្ងៃទី១៩ ខែកក្កដា ឆ្នាំ២០២៥--

រដ្ឋបាលខេត្តកំពង់ធំ បើកកិច្ចប្រជុំស្តីពីកិច្ចប្រជុំពិនិត្យការអនុវត្តកិច្ចសន្យាវិនិយោគរមណីយដ្ឋានស្ទឹងជីនិត ដើម្បីបន្តទាក់ទាញភ្លៀវទេសចរណ៍បន្ថែម។

រដ្ឋបាលខេត្តកំពង់ធំកាលពីថ្ងៃទី១៨ខែកក្កដាឆ្នាំ២០២៥បានបើកកិច្ចប្រជុំស្តីពីកិច្ចប្រជុំពិនិត្យការអនុវត្តកិច្ចសន្យាវិនិយោគរមណីយដ្ឋានស្ទឹងជីនិត ក្រោមអធិបតីភាព លោកស្រី លំ គន្ធារី អភិបាលរងខេត្តនិងលោក ហ៊ីម លីម៉េង អភិបាលរងខេត្តនៃគណៈអភិបាលខេត្តកំពង់ធំ ព្រមទាំងមន្ទីរពាក់ព័ន្ធ លោកអភិបាលស្រុក លោកស្រីមេឃុំនិងសហគ្រាសវិនិយោគផងដែរ។

បន្ទាប់ពីបានពិភាក្សានិងផ្លាស់ប្តូរយោបល់យ៉ាងផុលផុសរួចមក អង្គប្រជុំបានសម្រេចលទ្ធផលដូចខាងក្រោម៖
ទី១. រដ្ឋបាលខេត្តកំពង់ធំនិងសហគ្រាស ប៉ែន ម៉ានី សម្រេចលុបកិច្ចសន្យាវិនិយោគដោយយកទីតាំងមកអភិវឌ្ឍននិងកែលម្អឡើងវិញ។ទី២.សម្ភារៈនិងថវិការនៅសល់ វិនិយោគកន្លងមករដ្ឋបាលខេត្តឯកភាពប្រគល់ជូនសហគ្រាសប៉ែន ម៉ានី ដោយត្រូវរុះរើយ៉ាងយូររយៈពេលមួយខែដើម្បីឱ្យក្រុមការងារចូលរៀបចំអភិវឌ្ឍន។ទី៣.ប្រគល់ទីតាំងមរណីយដ្ឋានស្ទឹងជីនិតជូនទៅមន្ទីរធនធានទឹក រដ្ឋបាលស្រុកបារាយណ៍និងរដ្ឋបាលឃុំបល្ល័ង្ក ជាអ្នកគ្រប់គ្រងជាបណ្តោះអាសន្ន។

រដ្ឋបាលខេត្តកំពង់ធំសូមថ្លែងអំណរគុណយ៉ាងជ្រៀលជ្រៅ ចំពោះសហគ្រាស ប៉ែន ម៉ានីដែលតែងតែចូលរួមសហការសម្របសម្រួលនិងចូលរួមគោរពតាមគោលការណ៍ នៃការអភិវឌ្ឍនរបស់រាជរដ្ឋាភិបាល រក្សាសន្តិភាពក្នុងយុទ្ធសាស្រ្តឈ្នះៗ ទាំងអស់គ្នា។ 
សូមបញ្ជាក់ថា រមណីយដ្ឋានស្ទឹងជីនិតឬហៅថា"ទំនប់១មករា"នឹងត្រូវធ្វើការអភិវឌ្ឍនកែលំអរបន្ថែមក្នុងគោលបំណង អាចទាក់ទាញភ្លៀវទេសចរណ៍កាន់តែប្រសើរឡើងក៏ដូចជាប្រព័ន្ធធារាសាស្រ្តផងដែរ៕

ដោយ៖ ស៊ុម វណ្ណា