AKP ភ្នំពេញ ថ្ងៃទី១៥ ខែកក្កដា ឆ្នាំ២០២៥ -- វិមានក្រឹមឡាំងបាននិយាយកាលពីថ្ងៃចន្ទថា វាមាន «សារៈសំខាន់ណាស់» សម្រាប់ប្រទេសរុស្ស៊ីដែលបេសកជនពិសេសរបស់សហរដ្ឋអាមេរិកសម្រាប់អ៊ុយក្រែន លោក ឃែត ឃែកឡូក (Keith Kellogg) បន្តកិច្ចខិតខំប្រឹងប្រែងសម្របសម្រួលរវាងទីក្រុងម៉ូស្គូ និងទីក្រុងគៀវ ក្នុងអំឡុងពេលនៃដំណើរទស្សនកិច្ចរបស់លោកទៅកាន់រដ្ឋធានីអ៊ុយក្រែន។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បានប្រាប់អ្នកសារព័ត៌មានថា «វាមានសារៈសំខាន់ណាស់សម្រាប់ពួកយើង ដែលលោក ឃែលឡូក ក្នុងនាមជាអ្នកតំណាងក្រុមការងារ (ប្រធានាធិបតីសហរដ្ឋអាមេរិក លោក ដូណាល់ ត្រាំ) បន្តកិច្ចខិតខំប្រឹងប្រែងរបស់លោកក្នុងការផ្តល់សេវាសម្របសម្រួលក្នុងក្របខ័ណ្ឌនៃដំណោះស្រាយរុស្ស៊ី-អ៊ុយក្រែន»។

ដោយ​បង្ហាញ​ថា រុស្ស៊ី​គ្មាន​ការ​រំពឹង​ទុក​ពី​ដំណើរ​ទស្សនកិច្ច​របស់​លោក ឃែលឡូក ទៅកាន់​អ៊ុយក្រែននោះ លោក ប៉េសកូវ បាន​បញ្ជាក់សារ​ជាថ្មី​អំពី​ការ​ត្រៀម​ខ្លួន​របស់ទី​ក្រុង​ម៉ូស្គូ​ក្នុង​ការ​ចូលរួម​ក្នុង​កិច្ច​ចរចា​ផ្ទាល់​ជុំ​ទី​បី​ជាមួយទី​ក្រុងគៀវ។

លោកបាននិយាយថា «វាច្បាស់ណាស់ថា ទីក្រុងគៀវមិនរួសរាន់នោះទេ។ យើងនៅតែរង់ចាំសំណើ (ពីអ៊ុយក្រែន) ចំពោះការបរិច្ឆេទនៃកិច្ចចរចា»។

ប្រតិកម្មទៅនឹងការប្រកាសរបស់លោក ត្រាំ កាលពីថ្ងៃអាទិត្យដែលថា ទីក្រុងវ៉ាស៊ីនតោននឹងបញ្ជូនគ្រាប់មីស៊ីលការពារដែនអាកាស Patriot ក្នុងចំនួនមួយមិនជាក់លាក់ទៅកាន់អ៊ុយក្រែននោះ អ្នកនាំពាក្យវិមានក្រឹមឡាំងរូបនេះបាននិយាយបន្ថែមថា ទីក្រុងម៉ូស្គូទទួលបានពីការពិតដែលថា ការផ្គត់ផ្គង់ផ្នែកយោធាអាម៉េរិកដល់អ៊ុយក្រែនបាន និងកំពុងបន្ត»។

កាល​ពី​ព្រឹក​ថ្ងៃ​ចន្ទ លោក ឃែលឡូក បានទៅ​ដល់​ទីក្រុងគៀវសម្រាប់​ដំណើរ​ទស្សនកិច្ច​រយៈ​ពេល​មួយ​សប្តាហ៍ ដែល​លោក​ត្រូវ​បាន​ស្វាគមន៍​ដោយ​លោក អេនដ្រៀវ យើម៉ាក (Andriy Yermak) ប្រធាន​ការិយាល័យ​ប្រធានាធិបតី​អ៊ុយក្រែន។

លោក យើម៉ាក បាននិយាយនៅលើបណ្តាញតេឡេក្រាមថា មានប្រធានបទជាច្រើនសម្រាប់កិច្ចពិភាក្សា ដែលរួមមានទាំងការពង្រឹងសន្តិសុខ សព្វាវុធ ការដាក់ទណ្ឌកម្ម ការការពារប្រជាជនរបស់យើង ព្រមទាំងការពង្រឹងកិច្ចសហប្រតិបត្តិការរវាងអ៊ុយក្រែន និងសហរដ្ឋអាមេរិក»៕

ដោយ៖ យា ចិន្ដាខន្ដី (ប្រភព៖ AA-AKP)