AKP ភ្នំពេញ ថ្ងៃទី១៥ ខែកក្កដា ឆ្នាំ២០២៥ -- សហភាពអឺរ៉ុប កាលពីថ្ងៃច័ន្ទបានកោតសរសើរចំពោះកិច្ចខិតខំប្រឹងប្រែងរបស់ប្រទេសអាមេនីក្នុងការជំរុញស្ថិរភាពនៅកូកាស៊ីសខាងត្បូង រួមទាំងការជំរុញរបស់ខ្លួនសម្រាប់ការធ្វើឱ្យមានប្រក្រតីភាពឡើងវិញជាមួយតួកគី និងកិច្ចព្រមព្រៀងសន្តិភាពដ៏សំខាន់ជាមួយអាស៊ែរបៃហ្សង់។

ប្រធានគណៈកម្មការអឺរ៉ុប លោកស្រី អ៊ូស៊ុលឡា វ៉ុន ដឹ ឡេយេន (Ursula von der Leyen) និងប្រធានក្រុមប្រឹក្សាអឺរ៉ុប លោក អេនតូនីញ៉ូ កូស្តា (Antonio Costa) បានជួបជាមួយនាយករដ្ឋមន្ត្រីអាមេនី លោក នីកូឡ ប៉ាស៊ីនយ៉ាន់ (Nikol Pashinyan) នៅទីក្រុងប្រ៊ុចសែលស៍ ដើម្បីពិភាក្សាអំពីការអភិវឌ្ឍក្នុងតំបន់ និងធ្វើឱ្យទំនាក់ទំនងរវាងសហភាពអឺរ៉ុប-អាមេនីកាន់តែស៊ីជម្រៅ។

លោកស្រី​ វ៉ុន ដឹ ឡេយេន បានស្វាគមន៍សេចក្តីព្រាងសន្ធិសញ្ញាសន្តិភាពរបស់ប្រទេសអាមេនីជាមួយអាស៊ែរបៃហ្សង់ ដោយបានហៅវាថា «ជាពេលវេលាដ៏អស្ចារ្យ» មួយនៅក្នុងប្រវត្តិសាស្ត្រក្នុងតំបន់។ លោកស្រីបាននិយាយថា «វានឹងនាំមកនូវការបញ្ចប់អរិភាពដែលមានជាច្រើនទសវត្សរ៍កន្លងមក។ ខ្ញុំសង្ឃឹមថា សន្ធិសញ្ញានេះអាចត្រូវបានចុះហត្ថលេខាក្នុងពេលឆាប់ៗនេះតាមដែលអាចធ្វើទៅបាន»។

លោក ប៉ាស៊ីនយ៉ាន់ បានរំលឹកឡើងវិញនូវការប្តេជ្ញាចិត្តរបស់ទីក្រុងយេរេវ៉ាន់ចំពោះកំណែទម្រង់លទ្ធិប្រជាធិបតេយ្យ និងការធ្វើសមាហរណកម្មកាន់តែជិតស្និទ្ធជាមួយសហភាពអឺរ៉ុប។

លោក កូស្តា បាននិយាយបន្ថែមថា «យើងកំពុងធ្វើការងារដើម្បីឱ្យមានភាពជាដៃគូកាន់តែស៊ីជម្រៅ និងទូលំទូលាយជាមួយអាមេនី ហើយយើងចង់អភិវឌ្ឍន៍ទំនាក់ទំនងរបស់យើង»។

នៅក្នុងសេចក្តីថ្លែងការណ៍រួមមួយ មេដឹកនាំសហភាពអឺរ៉ុបបានបញ្ជាក់ពីការគាំទ្រចំពោះអធិបតេយ្យភាព បូរណភាពទឹកដី និងគន្លងប្រជាធិបតេយ្យរបស់ប្រទេសអាមេនី។

ពួកគេបានស្វាគមន៍ចំពោះវឌ្ឍនភាពថ្មីៗនៃការធ្វើសេរីភាវូបនីយកម្មទិដ្ឋាការ និងបានគូសបញ្ជាក់ពីច្បាប់ដែលបានអនុម័តថ្មីរបស់ប្រទេសអាមេនី ដែលចាប់ផ្តើមដំណើរការសមាហរណកម្មអឺរ៉ុបរបស់ប្រទេសនេះ៕

ដោយ៖ យា ចិន្ដាខន្ដី (ប្រភព៖ AA-AKP)