AKP ភ្នំពេញ ថ្ងៃទី១៤ ខែកក្កដា ឆ្នាំ២០២៥ -- ប្រទេសថៃអាចបាត់បង់រហូតដល់ ២០០ពាន់លានបាត (៦,១៤ពាន់លានដុល្លារអាម៉េរិក) នៅក្នុងតម្លៃនៃការនាំចេញនៅក្នុងឆ្នាំនេះ ប្រសិនបើសហរដ្ឋអាមេរិកដាក់ពន្ធថ្មីចាប់ពី២៥% ទៅ ៣៦% ទៅលើទំនិញថៃ។ នេះបើយោងតាមការព្យាករណ៍ពីសាកលវិទ្យាល័យសភាពាណិជ្ជកម្មថៃ (UTCC)។

លោក ថាណាវ៉ាត់ ផុនវីឆៃ (Thanavath Phonvichai) ប្រធានUTCC បានកត់សម្គាល់ថា នៅតែមានឱកាសសម្រាប់ប្រទេសថៃក្នុងការចរចាទៅលើអត្រាពន្ធអនុគ្រោះបន្ថែមទៀត ដោយអាចបញ្ចុះមកនៅត្រឹម២០% មុនពេលកាតព្វកិច្ចត្រូវបានកំណត់ចូលជាធរមាននៅថ្ងៃទី០១ ខែសីហាឆ្នាំ២០២៥ ខាងមុខនេះ។ ទោះបីជាយ៉ាងណាក៏ដោយ លោកបានសង្កត់ធ្ងន់ថាកិច្ចព្រមព្រៀងចុងក្រោយជាមួយសហរដ្ឋអាមេរិកគឺនៅឆ្ងាយពីភាពជាក់លាក់។

ការព្រួយបារម្ភបន្ថែមទៀត លោកបានព្រមានថា អស្ថិរភាពនយោបាយក្នុងស្រុក ដូចជាការរំលាយសភា ឬការខកខានរបស់រដ្ឋាភិបាលក្នុងការអនុម័តថវិកាជំរុញសេដ្ឋកិច្ច អាចកាត់បន្ថយកំណើនផលិតផលក្នុងស្រុកសរុប (GDP) មួយភាគរយ។ ក្នុង​ស្ថានភាព​បែប​នេះ កំណើន​សេដ្ឋកិច្ច​របស់​ប្រទេស​ថៃ​អាច​នឹង​ធ្លាក់​ចុះ​ក្រោម ១% សម្រាប់​ឆ្នាំ​នេះ ពោល​គឺ​ស្ថិត​ក្រោម​ការ​ព្យាករពី​មុនដែលមានចំនួន ១,៧%។

ប្រសិនបើពន្ធរបស់សហរដ្ឋអាមេរិមានចាប់ពី ២៥-៣៦% នៅតែដំណើរការពេញមួយឆ្នាំនោះ UTCC បានប៉ាន់ប្រមាណថា ការនាំចេញដែលមានតម្លៃចន្លោះពី ៤០០-៦០០ពាន់លានបាតអាចនឹងរងផលប៉ះពាល់។

UTCC ក៏បានរាយការណ៍ផងដឬែរពីការធ្លាក់ចុះនៃសន្ទស្សន៍ទំនុកចិត្តអ្នកប្រើប្រាស់ដែលបានធ្លាក់ចុះដល់ ៥២,៧ នៅក្នុងខែមិថុនា ដែលជាកម្រិតទាបបំផុតក្នុងរយៈពេល ២៨ខែ ចំពេលដែលមានការធ្លាក់ចុះនៃសុទិដ្ឋិនិយមសាធារណៈ៕

ដោយ៖ យា ចិន្ដាខន្ដី (ប្រភព៖ VNA)