AKP ភ្នំពេញ ថ្ងៃទី១២ ខែកក្កដា ឆ្នាំ២០២៥–ឯកឧត្ដមបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា រសៀលថ្ងៃទី១១ ខែកក្កដា ឆ្នាំ២០២៥ បានដឹកនាំប្រតិភូក្រសួងអប់រំ យុវជន និងកីឡា អញ្ជើញចូលរួមក្នុងពិធីបើកវេទិកាសមាហរណកម្មឌីជីថល និងពិភពជាក់ស្ដែងនៃអង្គការសហប្រតិបត្តិការសៀងហៃស្ដីពីកិច្ចសហប្រតិបត្តិការក្នុងវិស័យឧស្សាហកម្ម និងអប់រំវិជ្ជាជីវៈ(2025 SCO Forum on Digital-Real Integration: Industrial Cooperation and Vocational Education) ដែលប្រព្រឹត្តទៅនៅទីក្រុងធានជីន សាធារណរដ្ឋប្រជាមានិតចិន។ កម្មវិធីនេះ ជាផ្នែកមួយនៃវេទិកាសេដ្ឋកិច្ចឌីជីថលនៃអង្គការសហប្រតិបត្តិការសៀងហៃ ឆ្នាំ២០២៥ (2025 SCO Digital Economic Forum) ដែលប្រព្រឹត្តទៅចាប់ពីថ្ងៃទី៨ ដល់ថ្ងៃទី១៤ ខែ
កក្កដា ឆ្នាំ២០២៥ នៅទីក្រុងប៉េកាំង និងទីក្រុងធានជីន សាធារណរដ្ឋប្រជាមានិតចិន។

តាមរយៈការចូលរួមថ្លែងសុន្ទរកថាបើកកម្មវិធី ឯកឧត្តមបណ្ឌិត រដ្ឋលេខាធិការ បានផ្ដល់ការវាយតម្លៃខ្ពស់ចំពោះការអនុវត្តប្រកបដោយភាពជោគជ័យរបស់ប្រទេសចិនក្នុងវិស័យឌីជីថល និងកាលានុវត្តភាពដែលកម្ពុជាអាចទាញយកបទពិសោធពីប្រទេសចិន។ តាងនាមក្រសួងអប់រំ យុវជន និងកីឡា ឯកឧត្តមបណ្ឌិតរដ្ឋលេខាធិការ បានបង្ហាញនូវជំនឿជាក់ចំពោះចក្ខុវិស័យរបស់អង្គការសហប្រតិបត្តិការសៀងហៃ ដើម្បីភាពរីកចម្រើនរួមគ្នាក្នុងវិស័យឌីជីថល និងចូលរួមកសាងសេដ្ឋកិច្ចឌីជីថលប្រកបដោយចីរភាព និងបរិយាបន្ន។

ក្នុងឱកាសនេះអង្គការសហប្រតិបត្តិការសៀងហៃ បានប្រកាសដាក់ឱ្យប្រើប្រាស់ជាផ្លូវការនូវបណ្ដាញសហប្រតិបត្តិការពហុភាគីសម្រាប់សេដ្ឋកិច្ចឌីជីថល និងការអប់រំវិជ្ជាជីវៈផដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)