AKP ភ្នំពេញ ថ្ងៃទី១១ ខែ កក្កដា ឆ្នាំ ២០២៥ -- កម្ពុជាកំពុងត្រៀមរៀបចំសន្និសីទកំពូលស្តីពីប្រព័ន្ធផ្សព្វផ្សាយអាស៊ីលើកទី២០ (20th Asia Media Summit) នៅលើទឹកដីអង្គរ ក្នុងខេត្តសៀមរាប ដែលនឹងត្រូវរៀបចំធ្វើឡើងនាចុងខែកក្កដា ឆ្នាំ២០២៥ខាងមុខ។ នេះជាការរៀបចំធ្វើម្ចាស់ផ្ទះលើកទីពីរ បន្ទាប់ពីធ្វើជាម្ជាស់ផ្ទះលើកទី១ ដែលកម្ពុជាបានរៀបចំសន្និសីទកំពូលស្តីពីប្រព័ន្ធផ្សព្វផ្សាយព័ត៌មានលើកទី១៦ នៅក្នុងឆ្នាំ២០១៩ ដោយនៅពេលនោះមានអ្នកចូលរួមប្រមាណជិត៤០០នាក់ មកពីបណ្តាប្រទេសចំនួន៤៣។

បើតាមការបញ្ជាក់របស់អនុប្រធានអចិន្ត្រៃយ៍លេខាធិការដ្ឋានរៀបចំសន្និសីទកំពូលស្តីពីប្រព័ន្ធផ្សព្វផ្សាយអាស៊ីលើកទី២០ បានឱ្យដឹងថា រហូតមកដល់ពេលនេះ លេខាធិការដ្ឋានបានប្រជុំពិភាក្សា ដោយបានបង្កើតគណៈកម្មការចំនួន៤ សម្រាប់ទទួលខុសត្រូវលើការងារតាមផ្នែកនីមួយៗ និងបានចុះពិនិត្យមើលទីតាំងសម្រាប់រៀបចំសន្និសីទកំពូលបានរួចរាល់ផងដែរ ដើម្បីទទួលបដិសណ្ឋារកិច្ចស្វាគមន៍ភ្ញៀវដែលនឹងអញ្ជើញមកចូលរួមក្នុងព្រឹត្ដិការណ៍ដ៏មានសារសំខាន់នេះនៅក្នុងខេត្ដសៀមរាប។

ឯកឧត្តម ប៉ាង ណាត អនុរដ្ឋលេខាធិការក្រសួងព័ត៌មាន និងជាអនុប្រធានអចិន្ត្រៃយ៍លេខាធិការដ្ឋានរៀបចំសន្និសីទកំពូលស្តីពីប្រព័ន្ធផ្សព្វផ្សាយអាស៊ីលើកទី២០ បានថ្លែងឱ្យដឹងថា នៅថ្ងៃទី២១ ដល់ថ្ងៃទី២៤ ខែ កក្កដា ឆ្នាំ ២០២៥ខាងមុខនេះ កម្ពុជានឹងធ្វើជាម្ចាស់ផ្ទះនៃការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ និងកិច្ចប្រជុំពាក់ព័ន្ធនៅខេត្តសៀមរាប។ ឯកឧត្តមបានបញ្ជាក់ឱ្យដឹងថា ការរៀបចំសន្និសីទកំពូលស្តីអំពីប្រព័ន្ធផ្សាព្វផ្សាយនៅអាស៊ីប៉ាស៊ីហ្វិកនេះដែរ កម្ពុជាក៏ធ្លាប់ធ្វើជាម្ចាស់ផ្ទះរៀបចំម្តងរួចមកហើយ ពោលគឺការៀបចំសន្និសីទកំពូលលើកទី១៦ ឬហៅថា AMS16 ដែលកាលនោះយើងបានរៀបចំនៅខេត្តសៀមរាបនេះផងដែរ។ឯកឧត្ដមអនុរដ្ឋលេខាធិការបានបន្ដថា មកដល់ពេលនេះ ក្រសួងព័ត៌មាន បាននិងកំពុងរៀបចំនូវព្រឹត្ដិការណ៍មួយនេះ និងបានរៀបចំគណៈកម្មាធិការមួយ ដោយមានឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មានជាប្រធាន ហើយក្នុងគណៈកម្មាធិការនេះ ក៏មានអនុគណៈកម្មការចំនួន៤ និងលេខាដ្ឋានចំនួន១។

ឯកឧត្ដមអនុប្រធានអចិន្ត្រៃយ៍លេខាធិការដ្ឋានរៀបចំសន្និសីទកំពូលបានថ្លែងបញ្ជាក់ផងដែរថា៖ «ដោយក្នុងអនុគណៈកម្មការចំនួន៤នេះទី១អនុគណៈកម្មការសណ្តាប់ធ្នាប់ និងសង្រ្គោះបន្ទាន់ ដើម្បីយើងទទួលគណៈប្រតិភូ។ យើងត្រូវតែមានការងារសណ្តាប់ធ្នាប់ មានការងារសង្រ្គោះបន្ទាន់ដោយយថាហេតុណាមួយ។អនុគណៈកម្មការមួយទៀតគឺអនុគណៈកម្មការ និងបដិសណ្ឋារកិច្ច។ នៅក្នុងរៀបចំកម្មវិធីនីមួយៗគឺយើងមិនអាចចោលបានទេនូវទំនៀមទម្លាប់របស់យើងក៏ដូចជាបណ្តាប្រទេសផ្សេងៗទៀតដែលជាម្ចាស់ផ្ទះរៀបចំ។ អនុគណៈកម្មការទី៣គឺអនុគណៈកម្មការខ្លឹមសារ និងឯកសារ។ អនុគណៈកម្មការទី៤ គឺអនុគណៈកម្មការព័ត៌មាន និងផ្សព្វផ្សាយ។ មួយទៀតគឺលេខាធិការដ្ឋាន ដែលជាសេនាធិការផ្ទាល់ក្នុងការធ្វើកិច្ចការជំនួសឱ្យគណៈកម្មការរៀបចំនេះតែម្តង។»

ឯកឧត្តម ប៉ាង ណាត ក៏បានបញ្ជាក់ឱ្យដឹងផងដែរថា ចាប់ពីថ្ងៃទី២៧ ខែមីនា ឆ្នាំ ២០២៥កន្លងមកនេះគឺអនុគណៈកម្មការទាំងអស់បានខិតខំប្រឹងប្រែងធ្វើកិច្ចការងាររបស់ខ្លួន បើទោះបីយ៉ាងណា ក្នុងចំណោមអនុគណៈកម្មការដែលសំខាន់ជាងគេគឺលេខាធិការដ្ឋានមួយដែលជាជំនួយការផ្ទាល់ ហើយអនុគណៈកម្មការខ្លឹមសារ និងឯកសារ គឺមានការពិភាក្សាដើម្បីសំដៅធ្វើយ៉ាងណាឱ្យសន្និសីទកំពូលដែលរៀបចំនៅចុងខែកក្កដានេះប្រព្រឹត្តទៅដោយរលូន ដោយបានប្រជុំពិភាក្សាជាច្រើនលើកច្រើនសារជាមួយផ្ទៃក្នុងផង និងជាមួយវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក(AIBD) ផងដែរ។ ឯកឧត្តមបានរំលេចដែរថា ក្នុងការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី១៦ ក្នុងឆ្នាំ ២០១៩កន្លងមក មានអ្នកចូលរួមជាង៤០០នាក់ ទៅជិត៥០០នាក់ និងការរៀបចំសន្និសីទលើកទីពីរនៅកម្ពុជានេះដែរ តាមការប៉ាន់ប្រមាណនឹងមានច្រើនលើសពីការរៀបចំលើកទី១ ដោយសារគ្រាន់តែសមាជិករបស់វិទ្យាស្ថាន AIBD មានទៅជិតដល់៥០អង្គភាព ហើយបើតាមការប៉ាន់ប្រមាណរបស់អង្គភាពនេះដែររំពឹងថានឹងមានអ្នកចូលរួមលើសពីជាង៤០០នាក់ និងជិត៥០០នាក់ផងដែរ។ ឯកឧត្ដមបានជម្រាបជូនថា សម្ករាប់អ្នកចូលរួមក្នុងសន្និសីទនេះទាំងអស់សុទ្ធតែមន្រ្តីសំខាន់ៗក្នុងប្រព័ន្ធផ្សព្វផ្សាយ ដែលជាអ្នកប្រកបរបរអាជីវកម្មក្នុងប្រព័ន្ធផ្សព្វផ្សាយ ថ្នាក់ដឹកនាំធ្វើការសម្រេចចិត្ដ អ្នកជំនាញវិជ្ជាជីវៈផ្នែកប្រព័ន្ធផ្សព្វផ្សាយ និយ័តករ អ្នកជំនាញ និងភាគីពាក់ព័ន្ធដែលបានធ្វើកិច្ចសហប្រតិបត្តិការនៅក្នុងតំបន់អាស៊ីប៉ាស៊ីហ្វិក រួមទាំងការចូលរួមរបស់​ដៃគូ AIBD ផងដែរ។

ជាមួយគ្នានេះ ឯកឧត្តម អនុរដ្ឋលេខាធិការបានបញ្ជាក់បន្ថែមថា ក្នុងព្រឹត្តិការណ៍នេះដែរ ក៏នឹងមានព្រឹត្តិការណ៍អមជាច្រើនទាំងមុននិងក្រោយអង្គសន្នីសីទកំពូល ហើយក្រៅពីនេះក៏មានអង្គសិក្ខាសាលាអម សរុបចំនួន៧ ដែលធ្វើឡើងនៅថ្ងៃទី ២១ ខែ កក្កដា ឆ្នាំ២០២៥។ ចំពោះអង្គសិក្ខាសាលាអមទាំងនោះរួមមានដូចជា ទី១.អង្គសិក្ខាសាលាស្តីពី “ឱកាស និង បញ្ហាប្រឈមដែលពាក់ព័ន្ធនឹងប្រព័ន្ធផ្សព្វផ្សាយដែលដើរតួនាទីដោយបច្ចេកវិទ្យា AI”, ទី២. សិក្ខាសាលាក្រោមប្រធានបទ “ការគ្រប់គ្រងផ្នែកបន្ទប់ផ្សាយព័ត៌មានទៅតាមប្រព័ន្ធឌីជីថល”, សិក្ខាសាលាទី៣ក្រោមប្រធានបទ” ការផ្លាស់ប្តូរ និង ការបង្កើតមាតិការប្រព័ន្ធផ្សព្វផ្សាយតាមរយៈឧបករណ៍ និងបច្ចេកវិទ្យាAI, សិក្ខាសាលាទី៤ ក្រោមប្រធានបទ “អនាគតនៃការផ្សាយ និងការចែកចាយប្រព័ន្ធផ្សព្វផ្សាយ ការធ្វើពាណិជ្ជកម្ម និងការប្រឈម”, សិក្ខាសាលាទី៥ក្រោមប្រធានបទ “តួនាទីនៃការផ្សព្វផ្សាយនៅក្នុង ការជូនដំណឹងជាមុនអំពីគ្រោះអាសន្ន”,  សិក្ខាសាលាទី៦ ក្រោមប្រធានបទ “តួនាទីនៃការជូនព័ត៌មាននៅក្នុងការប្រយុទ្ធប្រឆាំងព័ត៌មានក្លែងក្លាយ” និងសិក្ខាសាលាទី៧ក្រោមប្រធានបទ “តួនាទីរបស់ ITU នៃការផ្សព្វផ្សាយជាមុនអំពីគ្រោះអាសន្នប្រកបទៅដោយប្រសិទ្ធភាព”។ ឯកឧត្ដមបានលើកឡើងថា ទាំងនេះជាព្រឹត្តិ្កការណ៍កើតមុនអង្គសន្និសីទ ឬសិក្ខាសាលាអម ដែលនឹងចាប់ផ្តើមឡើង។

បើតាមឯកឧត្តម ប៉ាង ណាត ក្នុងសន្និសីទ្ធកំពូលនេះ AIBD ក៏នឹងមានការប្រកួតប្រជែងស្តីពីគុណភាពនៃកម្មវិធីផ្សាយរបស់ប្រទេសដែលជាសមាជិក ដើម្បីផ្តល់ពានរង្វាន់អ្នក ដែលបានចូលរួមសម្រាប់លើកទឹកចិត្ត និងបញ្ជាក់អំពីស្នាដៃដែលផលិតករ ឬ ក៏អ្នកនិពន្ធដែលបានខិតខំសរសេរទាំងវិទ្យុ ទូរទស្សន៍ និងបណ្តាញព័ត៌មានតាមគេហទំព័រជាដើម។ ក្រៅពីនេះក៏មានរៀបចំព្រឹត្តិការណ៍ដំណើរទស្សនកិច្ចទេសចរណ៍ បែបវប្បធម៌ ប្រពៃណី របស់ប្រទេសកម្ពុជា ដើម្បីឱ្យគណៈប្រតិភូស្វែងយល់ ថាតើកម្ពុជាមានការរីកចម្រើន និងមានទំនៀមទម្លាប់អ្វីខ្លះដែរ។ «ក្រៅពីនេះក៏មានព្រឹត្តិការណ៍អមមួយទៀតគឺព្រឹត្តិការណ៍ យុវជន ក្នុងនេះយើងក៏នឹងអញ្ជើញយុវជនជានិស្សិតនៅខេត្តសៀមរាបមកចូលរួមក្នុងព្រឹត្ដិការណ៍នេះផងដែរដើម្បីស្វែងយល់ពីប្រព័ន្ធផ្សព្វផ្សាយ។ សម្រាប់ព្រឹត្តិ​ការ​ណ៍​អមមួយទៀតគឺព្រឹត្តិការណ៍អមក្រោយសន្នីសីទគឺដំណើរទស្សនកិច្ចតំបន់ វប្បធម៌ និងទេសចរណ៍ដែលយើងបានត្រៀមលក្ខណៈដូចជាឱ្យអ្នកទេសចរបានទស្សនាប្រាសាទអង្គរវត្ត និងទស្សនកិច្ចកន្លែងផ្សេងៗទៀតដែលជាប្រពៃណី វប្បធម៌ និងទេសចរណ៍របស់កម្ពុជាយើង»។ នេះគឺជាការលើកឡើងបន្ថែមរបស់ឯកឧត្តម ប៉ាង ណាត អនុរដ្ឋលេខាធិការក្រសួងព័ត៌មាន និងជាអនុប្រធានអចិន្ត្រៃយ៍លេខាធិការដ្ឋានរៀបចំសន្និសីទកំពូលស្តីពីប្រព័ន្ធ​ផ្សព្វផ្សាយអាស៊ីលើកទី២០។

សូមជម្រាបជូនថា ការរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ ដែលនឹងប្រព្រឹត្តទៅចាប់ពីថ្ងៃទី២១ ដល់ទី២៤ ខែកក្កដា ឆ្នាំ២០២៥ នៅខេត្តសៀមរាប គឺក្រសួងព័ត៌មាន សហការជាមួយ វិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ីប៉ាស៊ីហ្វិក(Asia-Pacific Institute for Broadcasting Development-AIBD) ដើម្បីរួមគ្នារៀបចំសន្និសីទនេះឡើងសំដៅធ្វើយ៉ាងណាឱ្យដំណើរការដោយរលូនល្អ និងទទួលបានលទ្ធផលជោគជ័យ៕

ដោយ៖ មករា និង រិទ្ធី