AKP បន្ទាយមានជ័យ ថ្ងៃទី១១ ខែកក្កដា ឆ្នាំ២០២៥ -- បញ្ហាប្រឈម និងសំណូមពរជាច្រើនពីប្រជាពលរដ្ឋក្នុងឃុំសំបួរ ស្រុកមង្គលបូរី ខេត្តបន្ទាយមានជ័យ ត្រូវបានលើកឡើងយ៉ាងទូលំទូលាយនៅក្នុងវេទិកាសាធារណៈរបស់ក្រុមការងាររាជរដ្ឋាភិបាលចុះមូលដ្ឋានឃុំសំបួរ។ វេទិកានេះបានផ្ដល់ឱកាសឱ្យប្រជាពលរដ្ឋបង្ហាញពីកង្វល់របស់ខ្លួនដោយផ្ទាល់ ក្នុងគោលបំណងឱ្យថ្នាក់ដឹកនាំ មន្ទីរជំនាញ និងក្រុមការងាររាជរដ្ឋាភិបាលចុះមូលដ្ឋាន បានដឹងឮ និងជួយស្វែងរកដំណោះស្រាយសមស្រប។

ពិធីដ៏មានសារៈសំខាន់នេះត្រូវបានប្រារព្ធធ្វើឡើងនាព្រឹកថ្ងៃសុក្រ ទី១១ ខែកក្កដា ឆ្នាំ២០២៥ នៅបរិវេណវត្តសំបួរមាស ស្ថិតក្នុងឃុំសំបួរ ស្រុកមង្គលបូរី ខេត្តបន្ទាយមានជ័យ ក្រោមអធិបតីភាពរបស់ ឯកឧត្តម ស្រី វុឌ្ឍី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកមង្គលបូរី ដោយមានការអញ្ជើញចូលរួមពី លោក ឃៅ វេន ប្រធានក្រុមការងាររាជរដ្ឋាភិបាលចុះមូលដ្ឋានឃុំសំបួរ និងជាប្រធានមជ្ឈមណ្ឌល, លោក ឡៅ សំពរ អនុប្រធានមន្ទីរព័ត៌មានខេត្ត និងជាអនុប្រធានក្រុមការងាររាជរដ្ឋាភិបាលចុះមូលដ្ឋានឃុំសំបួរ ព្រមទាំងលោក លោកស្រីសមាជិកក្រុមប្រឹក្សាឃុំ អភិបាលរងស្រុក មេឃុំ មេភូមិ មេបញ្ជាការរងគ្រប់កងឯកភាព និងមន្ទីរ អង្គភាពពាក់ព័ន្ធជាច្រើនរូបទៀត។

ក្នុងឱកាសនោះ ឯកឧត្តម ស្រី វុឌ្ឍី បានមានប្រសាសន៍គន្លឹះជាច្រើន ដែលឆ្លុះបញ្ចាំងពីការយកចិត្តទុកដាក់ខ្ពស់របស់រាជរដ្ឋាភិបាលចំពោះសុខទុក្ខរបស់ប្រជាពលរដ្ឋនៅមូលដ្ឋាន និងបានលើកឡើងថា វេទិកាសាធារណៈនេះគឺដើម្បីបើកទូលាយនូវច្រកទំនាក់ទំនងរវាងរដ្ឋាភិបាល និងប្រជាពលរដ្ឋ ឱ្យមានភាពជិតស្និទ្ធ និងងាយស្រួលក្នុងការបញ្ចេញមតិយោបល់ ក៏ដូចជាលើកឡើងពីបញ្ហាប្រឈមនានាដែលពួកគាត់កំពុងជួបប្រទះ។ រាល់សំណូមពរ និងបញ្ហាដែលបានលើកឡើងដោយប្រជាពលរដ្ឋ នឹងត្រូវបានកត់ត្រា និងយកទៅពិភាក្សាដោះស្រាយដោយក្រុមការងារ ក៏ដូចជាបញ្ជូនទៅកាន់ស្ថាប័នពាក់ព័ន្ធនានា ដើម្បីស្វែងរកដំណោះស្រាយប្រកបដោយប្រសិទ្ធភាព និងឆាប់រហ័ស។

ឯកឧត្តមក៏បានជំរុញឱ្យប្រជាពលរដ្ឋបន្តចូលរួមយ៉ាងសកម្មក្នុងការអភិវឌ្ឍន៍មូលដ្ឋានរបស់ខ្លួន ព្រមទាំងចូលរួមថែរក្សាសន្តិភាព និងសណ្តាប់ធ្នាប់សាធារណៈ។ ឯកឧត្តមបានគូសបញ្ជាក់ពីការប្តេជ្ញាចិត្តរបស់រាជរដ្ឋាភិបាលក្នុងការខិតខំប្រឹងប្រែងដើម្បីលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង តាមរយៈការផ្ដល់សេវាសាធារណៈឱ្យបានទាន់ពេលវេលា និងមានតម្លាភាព។

ក្នុងអង្គវេទិកា ប្រជាពលរដ្ឋជាច្រើនរូបបានឆ្លៀតឱកាសថ្លែងឡើងនូវសំណូមពរ និងបញ្ហាប្រឈមផ្សេងៗដែលពួកគាត់កំពុងជួបប្រទះ។ ក្នុងចំណោមនោះ បញ្ហាដែលត្រូវបានលើកឡើងញឹកញាប់ រួមមាន បញ្ហាហេដ្ឋារចនាសម្ព័ន្ធការស្នើសុំឱ្យជួសជុល និងកែលម្អផ្លូវលំជនបទ ដែលមានសភាពខូចខាតពិបាកធ្វើដំណើរ ជាពិសេសក្នុងរដូវវស្សា។ បញ្ហាប្រព័ន្ធធារាសាស្ត្រ និងប្រព័ន្ធលូបង្ហូរទឹក ក៏ជាកង្វល់ចម្បងមួយផងដែរ ដើម្បីបង្កលក្ខណៈងាយស្រួលដល់ការងារកសិកម្ម និងទប់ស្កាត់ទឹកជំនន់។ បញ្ហាទឹកស្អាត និងអគ្គិសនី ប្រជាពលរដ្ឋមួយចំនួនបានស្នើសុំឱ្យមានការពង្រីកបណ្ដាញទឹកស្អាត និងអគ្គិសនីឱ្យបានគ្រប់គ្រាន់ទៅដល់គ្រប់ភូមិ និងគ្រប់គ្រួសារ ដើម្បីលើកកម្ពស់អនាម័យ និងជីវភាពរស់នៅ។ បញ្ហាវិស័យកសិកម្មការស្នើសុំឱ្យមានការអន្តរាគមន៍លើតម្លៃកសិផលដែលធ្លាក់ចុះ និងកង្វះទីផ្សារ។ លើសពីនេះ ក៏មានការស្នើសុំឱ្យមានការបណ្ដុះបណ្ដាលបច្ចេកទេសកសិកម្មថ្មីៗ ដើម្បីបង្កើនទិន្នផល និងគុណភាព។ បញ្ហាសុខភាពសាធារណៈ និងអប់រំ ប្រជាពលរដ្ឋក៏បានលើកឡើងពីការស្នើសុំឱ្យមានការយកចិត្តទុកដាក់បន្ថែមលើសេវាសុខភាពនៅមូលដ្ឋាន និងការពង្រីកសាលារៀនសម្រាប់កូនចៅ។ បញ្ហាសន្តិសុខ និងសណ្តាប់ធ្នាប់ បញ្ហាលួចឆក់ និងគ្រឿងញៀននៅតែជាកង្វល់មួយ ដែលប្រជាពលរដ្ឋស្នើសុំឱ្យអាជ្ញាធរបង្កើនការយកចិត្តទុកដាក់ និងបង្ក្រាបឱ្យបានទាន់ពេលវេលា។

សូមបញ្ជាក់ថាវេទិកាសាធារណៈនៅឃុំសំបួរ គឺជាសកម្មភាពដ៏សំខាន់មួយដែលបានបង្ហាញពីភាពជិតស្និទ្ធរវាងរដ្ឋាភិបាល និងប្រជាពលរដ្ឋ ក៏ដូចជាការប្ដេជ្ញាចិត្តរបស់ក្រុមការងាររាជរដ្ឋាភិបាលក្នុងការដោះស្រាយបញ្ហាប្រឈមនានាជូនប្រជាពលរដ្ឋនៅមូលដ្ឋាន។ តាមរយៈវេទិកានេះ សង្ឃឹមថា រាល់សំណូមពរ និងកង្វល់របស់ប្រជាពលរដ្ឋនឹងត្រូវបានឆ្លើយតបប្រកបដោយប្រសិទ្ធភាព និងឆាប់រហ័ស ដើម្បីរួមចំណែកដល់ការអភិវឌ្ឍមូលដ្ឋាន និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែល្អប្រសើរឡើង៕

ដោយ ឈុន សារ៉ាត