AKP ភ្នំពេញ ថ្ងៃទី១១ ខែកក្កដា ឆ្នាំ២០២៥ -- ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡាបានវាយតម្លៃខ្ពស់ចំពោះគណៈគ្រប់គ្រង លោកគ្រូ អ្នកគ្រូ និងអង្គការពាក់ព័ន្ធទាំងអស់ ដែលបានជួយគាំទ្រ និងចូលរួមចំណែកក្នុងការអភិវឌ្ឍគុណភាពអប់រំកម្រិតមត្តេយ្យសិក្សានៅកម្ពុជា ដូចជាការអនុវត្តកម្មវិធីសិក្សា "រៀនតាមរយៈការលេង" ក៏ដូចជាការរៀបចំពិព័រណ៍ស្នាដៃសិស្សកម្រិតមត្តេយ្យសិក្សា ដើម្បីឱ្យពួកគេបានបង្ហាញពីសមត្ថភាព ទេពកោសល្យ និងស្នាដៃច្នៃប្រឌិតរបស់ខ្លួន ព្រមទាំងបានលើកឡើងពីសារៈសំខាន់នៃការលូតលាស់របស់កុមារតូចក្នុងរយៈពេល១០០០ថ្ងៃដំបូង ដែលជាពេលវេលាមួយដែលខួរក្បាលរបស់ពួកគេកំពុងលូតលាស់លឿន ហើយទាមទារឱ្យមានការថែទាំឱ្យបានម៉ត់ចត់ ទទួលបានអាហារូបត្ថម្ភគ្រប់គ្រាន់ និងពេញលេញតាំងពីនៅក្នុងពោះម្ដាយ ដើម្បីកាត់បន្ថយអត្រាមរណភាពមាតា និងធានាបាននូវការលូតលាស់ខួរក្បាលប្រកបដោយប្រសិទ្ធភាព។ ការលើកឡើងរបស់ឯកឧត្តមបណ្ឌិតសភាចារ្យ ហង់ជួន ណារ៉ុន ដូចនេះក្នុងឱកាសអញ្ជើញចុះពិនិត្យការរៀន និងបង្រៀននៅសាលាមត្តេយ្យសិក្សាធនធានក្រុងបាត់ដំបង ខេត្តបាត់ដំបង នាព្រឹកថ្ងៃទី១១ ខែកក្កដា ឆ្នាំ២០២៥នេះ។

ជាមួយនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកឡើងថា មាតាបិតា អ្នកអាណាព្យាបាលគួរតែយកចិត្តទុកដាក់ខ្ពស់លើការផ្ដល់នូវអន្តរសកម្មភាព និងការរំញោចនានាដល់កុមារតូច ដើម្បីចៀសវាងការទុកចោលដែលអាចប៉ះពាល់ដល់ការអភិវឌ្ឍរបស់ពួកគេ។ ដូចនេះការបញ្ជូនកុមារទៅចូលរៀននៅកម្រិតមត្តេយ្យសិក្សាដែលគ្រូបង្រៀនមានវិជ្ជាជីវៈច្បាស់លាស់ គឺមានសារៈសំខាន់ណាស់ ដែលនឹងជួយជំរុញដល់ការលូតលាស់ផ្នែកសង្គម បញ្ញា អារម្មណ៍ និងកាយសម្បទារបស់ពួកគេតាមរយៈសកម្មភាពរៀន និងកការលេងជាក្រុមជាដើម ដែលជាមូលដ្ឋានគ្រឹះដ៏រឹងមាំសម្រាប់ដំណាក់កាលសិក្សាបន្ទាប់។

សូមជម្រាបជូនថា សាលាមត្តេយ្យសិក្សាធនធានក្រុងបាត់ដំបងគឺជាសាលារដ្ឋ ដែលមានកម្មវិធីចម្រុះ ដូចជាកម្មវិធីរៀនតាមរយៈការលេង រៀនតាមប្រធានបទសិក្សាលម្អិត និងកម្មវិធីរៀនតាមបែបឌីជីថល។ សាលាមានកម្មវិធីជាច្រើនទៀតដូចជា កម្មវិធីអាហារពេលព្រឹកដែលផ្តល់អាហារូបត្ថម្ភសម្រាប់កុមារ គឺមានគោលបំណងកាត់បន្ថយកង្វះអាហាររូបត្ថម្ភសម្រាប់កុមារ កម្មវិធីសិក្សាក្រៅម៉ោង ថ្នាក់ភាសាចិន អង់គ្លេស កម្មវិធីសិក្សាពីបំណិនរកចំណូល តន្រ្តី និងសិល្បៈ។ កន្លងមកនេះ សាលាត្រូវបានទទួលស្គាល់គុណភាពអប់រំ ដោយទទួលបានជ័យលាភីជាច្រើន និងទទួលបានចំណាត់ថ្នាក់លេខ២ជាអង្គភាពផ្តល់សេវាសាធារណៈគំរូផ្នែកអប់រំទូទាំងប្រទេសសម្រាប់ឆ្នាំ ២០២៣-២០២៤៕

ដោយ៖ ចាន់ សុភឿន (ប្រភព៖ ក្រសួងអប់រំ)