AKP ភ្នំពេញ ថ្ងៃទី១១ ខែកក្កដា ឆ្នាំ២០២៥ -- ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុតិ្តធម៌ បានអះអាងថា ការធ្វើច្បាប់ដកសញ្ជាតិគឺដើម្បីបន្សុទ្ធនូវទឹកចិត្តស្នេហាជាតិ របស់ប្រជាពលរដ្ឋខ្មែរចំពោះជាតិ មាតុភូមិ និងប្រជាជនរបស់ខ្លួន ឱ្យបានពិតប្រាកដ កុំឱ្យមិនគប់គិតបរទេសបំផ្លាញប្រយោជន៍ប្រទេសកំណើតខ្លួនឯង។

នៅក្នុងសន្និសីទសារព័ត៌មាន បន្ទាប់ពីកិច្ចប្រជុំពិភាក្សា និងអនុម័ត សេចក្តីស្នើច្បាប់ធម្មនុញ្ញ ស្តីពី វិសោធនកម្មមាត្រា៣៣ នៃរដ្ឋធម្មនុញ្ញនៃព្រះរាជាណាចក្រកម្ពុជា ដើម្បីធ្វើច្បាប់ដកសញ្ជាតិជនជាតិខ្មែរណាដែលក្បត់ជាតិខ្លួន នាព្រឹកថ្ងៃទី១១ ខែកក្កដា ឆ្នាំ២០២៥នេះ ឯកឧត្តម ឧបនាយករដ្ឋមន្ត្រី បានបន្ថែមដោយស្នើដល់អ្នកវាយប្រហារការធ្វើវិសោធនកម្មមាត្រា៣៣នេះ ឱ្យសិក្សាស្រាវជ្រាវច្បាប់នេះនៅតាមបណ្ដាប្រទេសជាច្រើន ជៀសវាងរិះគន់ថា កម្ពុជាធ្វើច្បាប់នេះមិនស្របទៅបរិបទពិភពលោក។

ឯកឧត្តម ឧបនាយករដ្ឋមន្ត្រី បានថ្លែងថា ការលើកឡើងរបស់ក្រុមជ្រុលនិយមខ្លះលើការអនុម័តសេចក្តីស្នើច្បាប់ធម្មនុញ្ញ ស្តីពីវិសោធនកម្មមាត្រា៣៣ នៃរដ្ឋធម្មនុញ្ញា នៃព្រះរាជាណាចក្រកម្ពុជា"ដើម្បីដកសញ្ជាតិនេះ គឺជាអំពើប្រល័យពូជសាសន៍ ឯកឧត្តម គិតថា ជាការលើកឡើងដោយគ្មានមូលដ្ឋាន និងមិនបានស្រាវជ្រាវ ហើយអ្នកលើកឡើងនោះ អត់យល់ដឹងអី្វទាំងអស់។  

ឯកឧត្តម កើត រិទ្ធ ថ្លែងបញ្ជាក់ថា «ឥឡូវបើធ្វើច្បាប់ដកសញ្ជាតិ គឺជាអំពើប្រល័យពូជសាសន៍ ចុះប្រទេសជាង១៥០ ដែលមានច្បាប់ដកសញ្ជាតិហ្នឹង តើប្រទេសហ្នឹងបានប្រព្រឹត្តិអំពើប្រល័យពូជសាសន៍ឬយ៉ាងណា ? អ៊ីចឹងអ្នកខ្លះគាត់នៅក្នុងទឹកដី ដូចជា អាម៉េរិក នៅបារាំង នៅអូស្ត្រាលី ជាដើមដែលបានលើកឡើងបញ្ហាទាំងអស់នេះ គាត់ទៅស្រាវជ្រាវច្បាប់ប្រទេសហ្នឹងទៅ សួរថា ច្បាប់ប្រទេសហ្នឹងមានដកសញ្ជាតិដែរឬទេ ? ចុះបើច្បាប់ប្រទេសហ្នឹងមានដកសញ្ជាតិដែរ យើងមិនថា ប្រទេសហ្នឹងប្រព្រឹត្តិអំពើប្រល័យពូជសាសន៍ ? ផ្ទុយទៅវិញ វាមិនមែនជាការប្រព្រឹត្តិអំពើប្រល័យពូជសាសន៍ទេ ប៉ុន្តែជាការលើកកម្ពស់ជាតិសាសន៍ទៅវិញ តាមរយៈការបន្សុទ្ធនូវទឹកចិត្តស្នេហាជាតិ របស់ប្រជាពលរដ្ឋខ្មែរចំពោះជាតិ មាតុភូមិ និងប្រជាជនរបស់ខ្លួន មានន័យថា យើងដក តែត្រីស្អុយ អ៊ីចឹងប្រជាពលរដ្ឋដែលស្រឡាញ់ជាតិ គឺយើងត្រូវការពារនូវឧត្តមគតិរបស់គាត់ កុំឱ្យអ្នកដែលមិនមានឧត្តមគតិ ស្នេហាជាតិមួយនាក់ ពីរនាក់ យកមកធ្វើឱ្យប៉ះពាល់ដល់ឧត្តមគតិស្នេហាជាតិរបស់ប្រជាជាតិខ្មែរទាំងមូល»។

សូមជម្រាបជូនថា នៅលើពិភពលោក មានប្រទេសចំនួនប្រមាណ១៥០ដែលមានច្បាប់ដកសញ្ជាតិ ពោលគឺ នៅអាស៊ីមាន២៨ប្រទេស, នៅអឺរ៉ុប មាន១៨ប្រទេស។ ក្នុងនោះមានប្រទេសដែលជាបិតាប្រជាធិបតេយ្យ រួមមាន អាម៉េរិក បារាំង អង់គ្លេស អាល្លឺម៉ង់ អូស្ត្រាលី អ៊ីតាលី ប៊ែលហ្ស៊ិក សិង្ហបុរី ឥណ្ឌា និងកូរ៉េខាងត្បូង។ល។ក៏មានច្បាប់ដកសញ្ជាតិដែរ៕ 

ដោយ៖ គង់ សិរីរ័ត្ន, រូបថត៖ ហ៊ុន យុទ្ធគុណ និង សិរី ឧត្តម