AKP ភ្នំពេញ ថ្ងៃទី១១ ខែកក្កដា ឆ្នាំ២០២៥ -- នៅក្នុងសន្និសីទសារព័ត៌មានមួយរបស់ស្ថានទូតរុស្ស៊ីប្រចាំព្រះរាជាណាចក្រកម្ពុជាកាលពីថ្ងៃទី១០ ខែកក្កដា ឆ្នាំ២០២៥ ឯកឧត្តម អាណាតូលី បូរ៉ូវីក (Anatoly Borovik) បានបញ្ជាក់ថា ឯកឧត្តម ស៊ែរហ្គេយ ឡាវរ៉ូវ (Sergey Lavrov) កំពុងចូលរួមកិច្ចប្រជុំរដ្ឋមន្រ្តីការបរទេសរុស្ស៊ី-អាស៊ាន កិច្ចប្រជុំកំពូលអាស៊ីបូព៌ា និងវេទិកាតំបន់អាស៊ាន ដែលបាននិងកំពុងធ្វើឡើងនៅថ្ងៃទី១០-១១ ខែកក្កដា ឆ្នាំ២០២៥ នៅទីក្រុងគូឡាឡាំពួរនៃប្រទេសម៉ាឡេស៊ី ដោយទីក្រុងម៉ូស្គូរំពឹងថានឹងមានកិច្ចសន្ទនាប្រកបដោយការស្ថាបនាទៅលើប្រធានបទជាច្រើននៃអន្តរកម្មជាមួយអាស៊ាននៅក្នុងវិស័យសំខាន់ៗមួយចំនួន ដូចជាវិស័យនយោបាយ និងសន្តិសុខ ពាណិជ្ជកម្ម សេដ្ឋកិច្ច វប្បធម៌ និងសង្គម។

នៅក្នុងក្របខ័ណ្ឌនៃកិច្ចប្រជុំកំពូលអាស៊ីបូព៌ា រុស្ស៊ីបន្តគាំទ្រការពង្រីកកិច្ចសហប្រតិបត្តិការជាក់ស្តែងដោយស្នើឡើងនូវគំនិតផ្តួចផ្តើមថ្មីៗ ដូចជាការបង្កើតយន្តការក្នុងតំបន់សម្រាប់ការឆ្លើយតបយ៉ាងឆាប់រហ័សចំពោះការគំរាមកំហែងនៃជំងឺរាតត្បាត និងការធានានូវកំណើនសេដ្ឋកិច្ចតាមរយៈការបង្កើនកិច្ចសហប្រតិបត្តិការក្នុងវិស័យទេសចរណ៍ និងការអភិវឌ្ឍតំបន់ដាច់ស្រយាលជាដើម។ នៅក្នុងឆ្នាំនេះ យើងស្នើអនុម័តសេចក្តីថ្លែងការណ៍របស់កិច្ចប្រជុំកំពូលអាស៊ីបូព៌ា ស្តីពីទំនាក់ទំនងក្នុងវិស័យសង្គម និងវប្បធម៌។

ឯកឧត្តមឯកអគ្គរដ្ឋទូតរុស្ស៊ីបានបញ្ជាក់ថា នៅក្នុងក្របខ័ណ្ឌនៃវេទិកាតំបន់អាស៊ាន យើងគ្រោងនឹងអនុម័តកម្មវិធីការងារសម្រាប់ឆ្នាំខាងមុខ ដែលរួមមានព្រឹត្តិការណ៍ស្តីពីប្រធានបទសំខាន់ៗមួយចំនួន ដូចជាសន្តិសុខព័ត៌មានអន្តរជាតិ ការប្រយុទ្ធប្រឆាំងនឹងការគំរាមកំហែងនៅសមុទ្រ ការប្រយុទ្ធប្រឆាំងភេរវកម្ម និងឧក្រិដ្ឋកម្មឆ្លងដែនជាដើម ហើយយើងយកចិត្តទុកដាក់ជាពិសែសដល់ការទប់ស្កាត់ការប្រើប្រាស់បច្ចេកវិទ្យាព័ត៌មាន និងទំនាក់ទំនងជាគោលបំណងឧក្រិដ្ឋកម្ម។

ក្នុងអំឡុងពេលព្រឹត្តិការណ៍អាស៊ាននោះ ឯកឧត្តម ស៊ែរហ្គេយ ឡាវរ៉ូវ ក៏គ្រោងជួបប្រជុំពិភាក្សាជាមួយឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជាផងដែរ។ នេះបើយោងតាមការបញ្ជាក់ពីស្ថានទូតរុស្ស៊ី។

ទីក្រុងម៉ូស្គូបានបន្តកត់សម្គាល់អំពីហានិភ័យដែលកំពុងតែកើនឡើងទាក់ទងនឹងការធ្វើសកម្មភាពយោធាភាវូបនីយកម្មនៅក្នុងតំបន់អាស៊ីប៉ាស៊ីហ្វិក ការពង្រីកបណ្តាញនៃយន្តការប្លុកឥណ្ឌូប៉ាស៊ីហ្វិក ការប៉ុនប៉ងរបស់ពួកអាម៉េរិកខាងជើង និងអឺរ៉ុប ដើម្បីពង្រឹងសក្តានុពលយោធារបស់អង្គការណាតូនៅអាស៊ី ការបំផ្លាញស្ថាបត្យកម្មសន្តិសុខ និងការអភិវឌ្ឍដែលត្រូវបានធ្វើឡើងនៅជុំវិញតំបន់អាស៊ាន និងការងារជាក់ស្តែងទាំងអស់នៅក្នុងទម្រង់ដែលបម្រើដល់បណ្តាប្រទេសលោកខាងលិច។ លោកបាននិយាយបន្ថែមថា យើងសូមបញ្ជាក់សារជាថ្មីនូវការទទួលស្គាល់ចំពោះមជ្ឈភាពអាស៊ានក្នុងការធានាស្ថិរភាព និងកិច្ចសហប្រតិបត្តិការបរិយាប័ន្ននៅក្នុងតំបន់៕

ដោយ៖ យា ចិន្ដាខន្ដី