AKP ភ្នំពេញ ថ្ងៃទី១១ ខែកក្កដា ឆ្នាំ២០២៥ -- កិច្ចប្រជុំកំពូលប្រ៊ីកស៍ (BRICS) លើកទី១៧ បានប្រព្រឹត្តទៅនៅទីក្រុងរីយ៉ូដឺចាណីរ៉ូរបស់ប្រទេសប្រេស៊ីលកាលពីថ្ងៃទី៦-៧ ខែកក្កដា ឆ្នាំ២០២៥ ដោយមានការចូលរួមពីគណប្រតិភូរុស្ស៊ីដែលដឹកនាំដោយលោក ស៊ែរហ្គេយ ឡាវរ៉ូវ (Sergey Lavrov) រដ្ឋមន្ត្រីការបរទេសរុស្ស៊ី ដោយកិច្ចប្រជុំកំពូលប្រ៊ីកស៍នេះបានផ្តោតសំខាន់ទៅលើបញ្ហានៃការកែទម្រង់ប្រព័ន្ធអភិបាលកិច្ចសកលលោក និងការរក្សាសន្តិភាព និងសន្តិសុខ ជាពិសេសនៅក្នុងបរិបទភាពតានតឹងនៃស្ថានភាពនៅក្នុងតំបន់មជ្ឈិមបូព៌ានាពេលបច្ចុប្បន្ន។

នៅក្នុងសន្និសីទសារព័ត៌មានមួយកាលពីថ្ងៃទី១០ ខែកក្កដា ឆ្នាំ២០២៥ ​នៅស្ថានទូតរុស្ស៊ីនៅរាជធានីភ្នំពេញ ឯកឧត្តម អាណាតូលី បូរ៉ូវីក (Anatoly Borovik) ឯកអគ្គរដ្ឋទូតរុស្ស៊ីប្រចាំព្រះរាជាណាចក្រកម្ពុជា បានបញ្ជាក់ឱ្យដឹងថា នៅក្នុងអំឡុងពេលនៃសម័យប្រជុំក្នុងទម្រង់ Outreach/BRICS Plus អ្នកចូលរួមបានពិភាក្សាអំពីបញ្ហានៃការកែលម្អប្រព័ន្ធរូបិយវត្ថុ និងហិរញ្ញវត្ថុអន្តរជាតិ ក៏ដូចជាការអនុវត្តគំនិតផ្តួចផ្តើមមួយចំនួននៅក្នុងក្របខណ្ឌប្រ៊ីកស៍មួយចំនួន ដូចជាវេទិកាវិនិយោគថ្មី ហេដ្ឋារចនាសម្ព័ន្ធការទូទាត់ និងផ្សារហ៊ុនគ្រាប់ធញ្ញជាតិប្រ៊ីកស៍ ព្រមទាំងបានពិភាក្សាទៅលើប្រធានបទនៃបញ្ញា
សិប្បនិម្មិត (AI) ការការពារបរិស្ថាន អន្តរកម្មក្នុងបរិបទនៃសន្និសីទលើកទី៣០ នៃ
ភាគីអនុសញ្ញាក្របខ័ណ្ឌអង្គការសហប្រជាជាតិ ស្តីពីការប្រែប្រួលអាកាសធាតុ ក៏ដូចជាកិច្ចសហប្រតិបត្តិការក្នុងវិស័យសុខាភិបាលផងដែរ។

          ប្រធានបទនៃកិច្ចប្រជុំឆ្នាំនេះ គឺ «ការពង្រឹងកិច្ចសហប្រតិបត្តិការនៃសកលលោកខាងត្បូង សម្រាប់អភិបាលកិច្ចប្រកបដោយបរិយាប័ន្ននិងនិរន្តរភាពកាន់តែច្រើន»៕

ដោយ៖ យា ចិន្ដាខន្ដី