AKP ភ្នំពេញ ថ្ងៃទី១១ ខែកក្កដា ឆ្នាំ២០២៥ -- យោធាបាននិយាយថា យ៉ាងហោចណាស់ភេរវករ ២៤នាក់ដែលសង្ស័យត្រូវបានសម្លាប់នៅក្នុងប្រតិបត្តិការនាពេលថ្មីៗនេះនៅក្នុងតំបន់ភាគឦសានរបស់ប្រទេសនីហ្សេរីយ៉ា។

លោក រូបេន កូវ៉ាន់ហ្គីយ៉ា (Reuben Kovangiya) អ្នកនាំពាក្យកងទ័ពសម្រាប់ប្រតិបត្តិការយោធាបានប្រាប់ប្រព័ន្ធផ្សព្វផ្សាយនៅទីក្រុងម៉ៃឌូហ្គូរី រដ្ឋប័រណូ កាលពីថ្ងៃពុធថា ប្រតិបត្តិការប្រឆាំងភេរវកម្មថ្ងៃទី៤-៩ ខែកក្កដា នៅក្នុងរដ្ឋអាដាម៉ាវ៉ា និងរដ្ឋប័រណូដែលត្រូវបានផ្តល់ជំនួយដោយក្រុមអ្នកប្រមាញ់នៅក្នុងតំបន់បានប្រមូលផ្តុំកន្លែងលាក់ខ្លួន និងជំរុំនៃក្រុមភេរវករដែល     សង្ស័យ។

លោកបានមានប្រសាសន៍ថា ជោគជ័យនៃប្រតិបត្តិការនេះបានបង្ហាញពីភាពរឹងមាំ និងការរួមផ្សំគ្នារវាងកងទ័ព និងកងកម្លាំងគាំទ្រក្នុងតំបន់។

តំបន់ភាគឦសាននៃប្រទេសនីហ្សេរីយ៉ាបានរងការវាយប្រហារយ៉ាងខ្លាំងពីសំណាក់ក្រុមភេរវករ រួមទាំងក្រុមបូកូហារ៉ាម (Boko Haram) និងក្រុមរដ្ឋអ៊ីស្លាមនៅអាហ្វ្រិកខាងលិច (ISWAP)។ ក្រុម ISWAP គឺជាក្រុមបំបែកខ្លួនពីក្រុម Boko Haram ។

កាលពីចុងខែមេសា ប្រធានាធិបតីនីហ្សេរីយ៉ា លោក បូឡា ទីនូប៊ូ (Bola Tinubu) បានបញ្ជាឱ្យរៀបចំឡើងវិញជាបន្ទាន់នូវយុទ្ធសាស្រ្តសន្តិសុខជាតិ ដើម្បីដោះស្រាយការវាយប្រហារប្រដាប់អាវុធដែលកំពុងកើនឡើង៕

ដោយ៖ មូល មិនា (ប្រភព៖ ស៊ីនហួ)