AKP ភ្នំពេញ ថ្ងៃទី១១ ខែកក្កដា ឆ្នាំ២០២៥-- ឯកឧត្តម ជួន ប៊ិតថុល អនុរដ្ឋលេខាធិការ និងជានាយកគម្រោង ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានដឹកនាំគណៈប្រតិភូធនាគារនីហរ័ណអាហរ័ណចិន (China-Eximbank) ចុះពិនិត្យជាក់ស្តែងវឌ្ឍនភាពការងារសាងសង់នៃគម្រោងអភិវឌ្ឍន៍អាងទឹកដងកាំបិត មានទីតាំងស្ថិតក្នុងស្រុកសណ្តាន់ ខេត្តកំពង់ធំ កាលពីថ្ងៃព្រហស្បតិ៍ ទី១០ ខែកក្កដា ឆ្នាំ២០២៥។

គម្រោងអភិវឌ្ឍន៍អាងទឹកដងកាំបិតប្រើរយៈពេលសាងសង់ចំនួន៤៨ខែ ការអនុវត្តបានចាប់ផ្តើមកាលពីថ្ងៃទី០៨ ខែធ្នូ ឆ្នាំ២០២៣ និងគ្រោងបញ្ចប់នៅខែតុលា ឆ្នាំ២០២៧។ ហេដ្ឋារចនាសម្ព័ន្ធសំខាន់ៗនៃគម្រោងមានទំនប់ប្រវែង ២៦៨០ម៉ែត្រ ក្នុងនោះទំនប់ដីខាងឆ្វេងប្រវែង១១៣៦ម៉ែត្រ ទំនប់បេតុងប្រវែង៥០ម៉ែត្រ ទំនប់បង្ហៀរទឹកប្រវែង៣០៦ម៉ែត្រ និងទំនប់ដីខាងស្តាំប្រវែង១១៨៨ម៉ែត្រ។

ឯកឧត្តមបានបញ្ជាក់ឱ្យដឹងថា គិតត្រឹមថ្ងៃទី១០ ខែកក្កដា ឆ្នាំ២០២៥ វឌ្ឍនភាពការងារសម្រេចបានប្រមាណ៦៣,២% ក្នុងនោះ៖ ទី១. សំណង់បង្ហៀរទឹកដំណាក់កាលទី១សម្រេចបាន ១០០% ទី២. សំណង់បង្ហៀរទឹកដំណាក់កាលទី២សម្រេចបាន៦០% ទី៣. សំណង់មិនបង្ហៀរសម្រេចបាន៥៥% ទី៤. ទំនប់ដីខាងឆ្វេងសម្រេចបាន៩៥% ទី៥. ទំនប់ដីខាងស្តាំសម្រេចបាន៧០% និងទី៦. ទ្វារទឹកដំណាក់កាលទី១សម្រេចបាន១០០%។

ក្រោយពេលសាងសង់រួច គម្រោងនេះនឹងផ្តល់អត្ថប្រយោជន៍ជូនដល់ប្រជាកសិករចំនួន២៥០០០គ្រួសារ ស្មើនឹង៨៥៣០០នាក់ ស្ថិតក្នុងស្រុកបារាយណ៍ ស្រុកកំពង់ស្វាយ ស្រុកប្រាសាទសំបូរ ស្រុកសណ្តាន់ ស្រុកសន្ទុក និងស្រុកស្ទោង ខេត្តកំពង់ធំ ព្រមទាំងមានសក្តានុពលផ្តល់ទឹកស្រោចស្រពលើផ្ទៃដីស្រែនៅផ្នែកខាងក្រោមប្រមាណ ១៣១ ៣២៣ហិកតា ហើយថែមទាំងបង្កើនទិន្នផលស្រូវពី៤តោន ទៅ៥,៤ តោន/ហិកតា និងរួមចំណែកផងដែរក្នុងការផ្គត់ផ្គង់ទឹកស្អាត និងកាត់បន្ថយទឹកជំនន់៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក និងឧតុនិយម)