AKP កំពង់ធំ ថ្ងៃទី១១ ខែកក្កដា ឆ្នាំ២០២៥-- ឯកឧត្តម នួន ផារ័ត្ន អភិបាលនៃគណៈអភិបាលខេត្តកំពង់ធំ បានមានប្រសាសន៍ថា រដ្ឋបាលខេត្តបានខិតខំប្រឹងប្រែងប្រែក្លាយទឹកដីខេត្តកំពង់ធំឱ្យក្លាយជាទីមនោរម្យសម្រាប់គោលដៅអភិវឌ្ឍន៍សេដ្ឋកិច្ចសង្គមជឿនលឿនជូនបងប្អូនប្រជាពលរដ្ឋ ក្នុងឱកាសដែលឯកឧត្តម និងឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម បានអញ្ជើញជាអធិបតីក្នុងសិក្ខាសាលាស្ដីពីការត្រៀមខ្លួនសម្រាប់ឱកាសការងារអាជីវកម្មថ្មីនៅខេត្តកំពង់ធំ កាលពីថ្ងៃទី១០ ខែកក្កដា ឆ្នាំ២០២៥ ដោយមានការចូលរួមពីឯកឧត្តម លោកជំទាវ ឧកញ៉ា លោក លោកស្រី ថ្នាក់ដឹកនាំមន្ទីរអង្គភាពពាក់ព័ន្ធ ម្ចាស់អាជីវកម្មក្នុងខេត្តកំពង់ធំ និងសិស្សនិស្សិតប្រមាណ២៥០នាក់។

ឯកឧត្តម នួន ផារ័ត្ន បានសម្តែងការស្វាគមន៍យ៉ាងកក់ក្តៅចំពោះការខិតខំប្រឹងប្រែងរបស់ឯកឧត្តមបណ្ឌិតអគ្គនាយក និងក្រុមការងារដែលបានរៀបចំសិក្ខាសាលាស្តីពីការត្រៀមខ្លួនសម្រាប់ឱកាសអាជីវកម្មថ្មីដ៏មានសារៈសំខាន់ នៅក្នុងខេត្តកំពង់ធំនាពេលនេះ។ សហគ្រិនវ័យក្មេងគឺជាកម្លាំងសំខាន់ក្នុងការជំរុញសេដ្ឋកិច្ចឱ្យមានភាពរីកចម្រើនធនធានថ្មី និងច្នៃប្រឌិតសម្រាប់ពេលអនាគត ជាពិសេសទទួលបានយុទ្ធសាស្ត្រ ក្នុងការធ្វើអាជីវកម្មស្របតាមបរិការណ៍នៃការរីកចម្រើនផ្នែកបច្ចេកវិទ្យាឌីជីថល ដែលជំរុញឱ្យការប្រកបមុខរបរ ឬអាជីវកម្មលើគ្រប់វិស័យរបស់រដ្ឋបាលខេត្តកំពង់ធំឱ្យកាន់តែមានវឌ្ឍនភាពសម្បូរបែបគួរជាទីពេញចិត្តរបស់បងប្អូនប្រជាពលរដ្ឋបន្ថែមទៀត។ រដ្ឋបាលខេត្តបានខិតខំប្រែក្លាយទឹកដីខេត្តកំពង់ធំនេះឱ្យក្លាយជាទីមនោរម្យសម្រាប់គោលដៅអភិវឌ្ឍសេដ្ឋកិច្ចសង្គមជឿនលឿន ជូនបងប្អូនប្រជាពលរដ្ឋ សំដៅឆ្ពោះទៅសម្រេចឱ្យបាននូវកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ ដែលដឹកនាំដោយសម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ទន្ទឹមនឹងនេះ ឯកឧត្តមបណ្ឌិត កៅ ថាច បានលើកឡើងថា សហគ្រិនមិនត្រឹមតែកសាងធុរកិច្ចទេ ប៉ុន្តែថែមទាំងកំពុងតែចូលរួមកសាងប្រទេសជាតិ ក្នុងកម្មវិធីយុវជនគណបក្ស ថ្នាក់កណ្តាល ផ្នែកសហគ្រិនវ័យក្មេង ដែលរៀបចំសិក្ខាសាលាស្តីពី ការត្រៀមខ្លួនសម្រាប់ឱកាសអាជីវកម្មថ្មីក្នុងពេលនេះ។ ឯកឧត្តមបណ្ឌិតបានកោតសរសើរ និងវាយតម្លៃខ្ពស់ដល់សមាគមសហគ្រិនវ័យក្មេង ដែលបានខិតខំអស់ពីកម្លាំងកាយចិត្តក្នុងការរៀចំកម្មវិធីនេះឡើង ដើម្បីផ្តល់ជាវេទិកាសម្រាប់កិច្ចពិភាក្សាក្នុងការត្រៀមខ្លួនសម្រាប់អាជីវកម្មថ្មី ចំពេលដែលសេដ្ឋកិច្ចសកលមានភាពមិនប្រាកដប្រជាខ្ពស់ និងសេដ្ឋកិច្ចកម្ពុជាកំពុងងើបឡើងវិញ និងបានបង្ហាញឱ្យឃើញអំពីសារៈសំខាន់នៃវិស័យសហគ្រិនភាព ដែលដើរតួជាកម្លាំងចលករមួយ ក្នុងការជំរុញកំណើនសេដ្ឋកិច្ចជាតិ តាមរយៈការអភិវឌ្ឍន៍ផ្នែកសង្គមសេដ្ឋកិច្ច ការបង្កើតឱកាសការងារថ្មី។

ឯកឧត្តមបណ្ឌិត កៅ ថាច បានបញ្ជាក់ថា នៅពេលយើង និយាយអំពីពាក្យ វិនិយោគ មនុស្សភាគច្រើន នឹកឃើញភ្លាមអំពីលុយ ដូចជាប្រាក់ចំណេញមូលធន ឬផលចំណេញហិរញ្ញវត្ថុ។ ប៉ុន្តែសម្រាប់ពាក្យ វិនិយោគ សម្រាប់អនាគតមានអត្ថន័យធំធេងជាងនេះខ្លាំងណាស់ ពោលគឺអត្ថន័យនៃពាក្យ វិនិយោគ សម្រាប់អនាគត រួមបញ្ចូលទាំងថាមពល ជំនាញ គុណតម្លៃ និងចក្ខុវិស័យ ដែលសំដៅការរួមគ្នាកសាងប្រទេសជាតិឱ្យកាន់តែមានបរិយាបន្ន មានចីរភាព មានភាពប្រកួតប្រជែង និងមានភាពធន់នឹងការកត្តាខាងក្រៅជាដើម។

ជាមួយគ្នានេះដែរ ឯកឧត្តមបណ្ឌិតបានបង្ហាញការគាំទ្រដល់ការវិនិយោគសម្រាប់អនាគត តាមរយៈការផ្តល់ហិរញ្ញប្បទានសមស្របដល់សហគ្រិនវ័យក្មេង ដែលមានម៉ូឌែលអាជីវកម្ម ប្រកបដោយបរិយាបន្ន ការផ្តល់ហិរញ្ញប្បទានកសិកម្មឆ្លាតវៃ និងការកសាងភាពជាដៃគូ ជាមួយក្រសួង ស្ថាប័នជាតិ អន្តរជាតិ  វិនិយោគិន និងភ្នាក់ងារអភិវឌ្ឍន៍ ព្រមទាំងផ្តល់នូវពាក្យមួយឃ្លាថា "សហគ្រិនមិនត្រឹមតែកសាងធុរកិច្ចទេប៉ុន្តែថែមទាំងកំពុងតែចូលរួមកសាងប្រទេសជាតិ"៕

ដោយ ស៊ុម វណ្ណា