AKP កណ្ដាល ថ្ងៃទី១១ ខែកក្កដា ឆ្នាំ២០២៥-- ឯកឧត្តម នូ សាខន ប្រធានក្រុមប្រឹក្សាខេត្ត បានស្នើដល់មន្ទីរ អង្គភាពជុំវិញខេត្ត ត្រូវដោះស្រាយសំណើសំណូមពរដែលទទួលបានពីប្រជាពលរដ្ឋ ដែលនៅសេសសល់ឱ្យបានឆាប់រហ័សជៀសវាងនៅសេសសល់បង្កផលលំបាក់ក្នុងវេទិការថ្មី ពីព្រោះរដ្ឋបាលខេត្តគ្រោងនឹងរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនៅក្នុងអំឡុងខែ១១ ខាងមុខនេះហើយ ។

នេះជាការលើកឡើងរបស់ឯកឧត្តមប្រធានក្រុមប្រឹក្សាក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត លើកទី១ អាណត្តិទី៤ ឆ្នាំ២០២៥ នារសៀលថ្ងៃទី១០ ខែកក្កដា ឆ្នាំ២០២៥ ដោយមានការចូលរួមពីឯកឧត្តម គួច ចំរើន អភិបាលនៃគណៈអភិបាលខេត្តកណ្ដាល ព្រមទាំងមានការអញ្ជើញចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត មន្ទីរ-អង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។ 

ឯកឧត្តម នូ សាខន បានធ្វើការក្រើនរំលឹកដល់អាជ្ញាធរក្រុង-ស្រុក និងមន្ទីរការងារខេត្ត ត្រូវយកចិត្តទុកដាក់ខ្ពស់ចំពោះពលករដែលត្រឡប់មកពីក្រៅប្រទេស ជាពិសេសប្រទេសថៃ ត្រូវចុះសាកសួរសុខទុក្ខមានទំនាក់ទំនងជាមួយពួកគាត់ មន្ទីរការងារត្រូវខិតខំជួយរកការងារជូនពួកគាត់នៅតាមបណ្ដារោងចក្រ សហគ្រាសនានា ទៅតាមសមត្ថភាព និងជំនាញរបស់ពួកគាត់។

ដោយសារមានរបៀបវារៈជាច្រើននៅក្នុងកិច្ចប្រជុំនាពេលនេះ ឯកឧត្តមប្រធានក្រុមប្រឹក្សាខេត្តបានជំរឱ្យអង្គប្រជុំទាំងមូល ត្រូវបង្កើនការយកចិត្តទុកដាក់ក្នុងការពិនិត្យ ពិភាក្សា អនុម័ត និងចូលរួមដោះស្រាយឱ្យបានល្អិតល្អន់ ទៅតាមរបៀបវារៈនីមួយៗដែលបានដាក់ចេញ ដោយស្មារតីទទួលខុសត្រូវខ្ពស់ ដើម្បីឆ្លើយតបទៅតាមតម្រូវការ របស់ប្រជាពលរដ្ឋ សភាពការណ៍របស់រដ្ឋបាលខេត្ត និងស្របតាមគោលការណ៍ដែលរាជរដ្ឋាភិបាលបានដាក់ចុះ។ ជាពិសេសសមាជិកក្នុងអង្គប្រជុំទាំងអស់ត្រូវរួមគ្នាពិនិត្យ និងបំពេញបន្ថែមលើចំណុចដែរខ្វះខាត លើរបាយការណ៍សំខាន់ៗដែលបានដាក់ឆ្លងក្នុងកិច្ចប្រជុំ។ ជាងនេះទៅទៀត តាមបណ្ដាមន្ទីរអង្គភាពជុំវិញខេត្ត ត្រូវយកចិត្តទុកដាក់ក្នុងការអនុវត្តភារកិច្ចទៅតាមប្រតិទិនការងាររបស់ខ្លួន ស្របទៅតាមផែនការដែលរដ្ឋបាលខេត្តបានដាក់ចុះឱ្យទទួលបានជោគជ័យ មានប្រសិទ្ធភាព និងប្រសិទ្ធផលខ្ពស់។

ក្នុងកិច្ចប្រជុំនេះ ឯកឧត្តម គួច ចំរើន បានជម្រាបជូនដល់ក្រុមប្រឹក្សាខេត្ត ក៏ដូចជាអង្គប្រជុំទាំងមូល អំពីសេចក្តីព្រាងផែនការយុទ្ធសាស្ត្រថវិការសម្រាប់ឆ្នាំ (២០២៦-២០២៨) របស់រដ្ឋបាលខេត្តកណ្តាល និងការគ្រប់គ្រង ចំណូល-ចំណាយ ថវិកា ឆ្នាំ២០២៦ របស់រដ្ឋបាលខេត្តកណ្តាល ព្រមទាំងចំណូលបានមកពីសារពើពន្ធសម្រាប់រយៈពេល៦ខែ។

ឯកឧត្តមអភិបាលខេត្តបានបញ្ជាក់ថា នៅពេលរដ្ឋបាលខេត្តបានកិច្ចប្រជុំពិភាក្សាលំអិតជាមួយបណ្ដាមន្ទីរអង្គភាពពាក់ព័ន្ធអំពី ផែនការយុទ្ធសាស្ត្រថវិការសម្រាប់ឆ្នាំ (២០២៦-២០២៨) និងការគ្រប់គ្រង ចំណូល-ចំណាយ ថវិកា ឆ្នាំ២០២៦ របស់រដ្ឋបាលខេត្តកណ្តាលបានរួចរាល់ នឹងដាក់ឆ្លងឱ្យក្រុមប្រឹក្សាធ្វើការពិនិត្យ និងអនុម័តនៅក្នុងកិច្ចប្រជុំនាពេលខាងមុខនេះ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)