AKP កណ្ដាល ថ្ងៃទី១០ ខែកក្កដា ឆ្នាំ២០២៥-- ថ្លែងក្នុងឱកាសចុះរៀបចំសណ្ដាប់ធ្នាប់ របៀបរៀបរយនៅផ្លូវលេខ២០៥ នៅថ្ងៃទី១០ ខែកក្កដា ឆ្នាំ២០២៥ ដោយមានការអញ្ជើញចូលរួមពី មន្ទីរជំនាញពាក់ព័ន្ធ និងអាជ្ញាធរក្រុងតាខ្មៅ លោក ណុប ដារ៉ា អភិបាលរងខេត្តកណ្តាល បានថ្លែងអំណរគុណដល់ប្រជាពលរដ្ឋ ក៏ដូចជាអាជីវករដែលប្រកបរបររកស៊ីនៅតាមផ្លូវលេខ២០៥ ដែលបានចូលរួមសហការយ៉ាងល្អជាមួយអាជ្ញាធរខេត្ត ក្នុងការរៀបចំសណ្ដាប់ធ្នាប់ របៀបរៀបរយយ៉ាងល្អប្រសើរ។

លោកអភិបាលរងខេត្តកណ្តាលបានគូសបញ្ជាក់បន្ថែមថា ការចូលរួមរបស់អាវជីវករ និងប្រជាពលរដ្ឋនៅពេលនេះ បញ្ជាក់ឱ្យឃើញការចូលរួមសហការជាមួយនឹងអាជ្ញាធរ ក្នុងការរៀបចំសណ្ដាប់ធ្នាប់សោភ័ណភាពរបៀបរៀបរយ ក៏ដូចជាគំរូល្អសម្រាប់ប្រជាពលរដ្ឋនៅក្រុងតាខ្មៅ និងប្រជាពលរដ្ឋទូទាំងខេត្តកណ្ដាល ក្នុងការរៀបចំផ្លូវឱ្យមានសោភ័ណភាពល្អ របៀបរៀបរយល្អ ចៀសវាងការរំលោភលើចិញ្ចើមផ្លូវសាធារណៈ ដែលធ្វើឱ្យបាត់បង់សោភ័ណភាព របៀបរៀបរយ និងដែលបណ្ដាឱ្យមានការស្ទះចរាចរណ៍ផងដែរ។

ក្នុងឱកាសចុះពិនិត្យនេះដែរ លោក ណុប ដារ៉ា ក៏បានអំពាវនាវដល់ប្រជាពលរដ្ឋទាំងអស់សូមកុំរំលោភលើចំណីផ្លូវ ចិញ្ចើមផ្លូវ សូមរក្សាចំណីផ្លូវ ចិញ្ចើមផ្លូវ ទុកឱ្យមានរបៀបរៀបរយឱ្យបានល្អ ទុកជាគំរូដ៏ល្អដល់ប្រជាពលរដ្ឋដទៃទៀត ទន្ទឹងនឹងនោះសូមបងប្អូនចូលរួមសម្អាតនៅតាមមាត់លូកុំបោះចោលសំរាម ឬកុំបិទគម្របលូពេលភ្លៀងធ្លាក់នាំឱ្យមានការកកស្ទះលូ បណ្ដាលឱ្យទឹកស្ទះផ្លូវមុខផ្ទះបងប្អូនប្រជាពលរដ្ឋ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)