AKP ភ្នំពេញ ថ្ងៃទី១០ ខែកក្កដា ឆ្នាំ២០២៥-- រដ្ឋបាលរាជធានីភ្នំពេញនាំយកទៀនព្រះវស្សា ទេយ្យវត្ថុ បច្ច័យ និងគ្រឿងបរិក្ខារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ទៅប្រគេនដល់វត្តចំនួន១៥១វត្ត និង៥សាលាបុណ្យក្នុងរាជធានីភ្នំពេញ សម្រាប់បុណ្យចូលព្រះវស្សា ក្នុងន័យចូលរួមពិធីបុណ្យចូលព្រះវស្សា ដើម្បីលើកតម្កើងវិស័យព្រះពុទ្ធសាសនាដែលជាសាសនារបស់រដ្ឋ។

នារសៀលថ្ងៃទី១០ ខែកក្កដា ឆ្នាំ២០២៥ ពិធីវេរទៀនព្រះវស្សា ទេយ្យវត្ថុ បច្ច័យ និងគ្រឿងបរិក្ខារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ត្រូវបានប្រារព្ធធ្វើឡើងជារួមក្នុងបរិវេណវត្តនាគវន័្ត សង្កាត់បឹងកក់២ ខណ្ឌទួលគោក ក្រោមអធិបតីភាព ឯកឧត្ដម ឃួង ស្រេង អភិបាលរាជធានីភ្នំពេញ និងលោកជំទាវ ជា ស៊ីណា ឃួង ស្រេង។

តាមទំនៀមទម្លាប់ជាប្រពៃណីនៃព្រះពុទ្ធសាសនា ព្រះសង្ឃទាំងឡាយគ្រប់អារាមក្នុងព្រះរាជាណាចក្រកម្ពុជាត្រូវនិមន្តចូលកាន់ព្រះវស្សាអស់ថេរវេលា៣ខែ។ ពាក្យថាវស្សា ប្រែថាភ្លៀង ឬរដូវភ្លៀង  ដែលមានកំណត់រយៈពេល៣ខែ រាប់ពីថ្ងៃ១រោច ខែអាសាធ ដល់ថ្ងៃ១៥កើត ខែអស្សុជ។ ក្នុងរយៈពេល៣ខែនេះនៅគ្រប់ព្រះវិហារទាំងឡាយគេតែងរក្សាភ្លើងទៀនព្រះវស្សាធ្វើពីក្រមួនឱ្យឆេះជានិច្ច។ តែបច្ចុប្បន្ននេះដោយសារក្រមួនពុំសូវសម្បូរ គេនិយមប្រើប្រេងជំនួសវិញ។ ជួនកាលមានព្រះសង្ឃខ្លះពុំបានចូលព្រះវស្សាតាមកំណត់កាលវេលា៣ខែដោយមានធុរៈអ្វីមួយ ឬដោយរោគាពាធនោះ លោកអាចចូលបច្ឆិមិកវស្សាបានគឺលោកចូលនៅថ្ងៃ១រោច ខែស្រាពណ៍ ហើយត្រូវគិតវស្សាឱ្យគ្រប់៣ខែដូចព្រះសង្ឃដែលចូលមុន គឺត្រូវចេញវិញនៅថ្ងៃ១រោច ខែកត្តិក។ ចំពោះទេយ្យទានដែលត្រូវប្រគេនដល់ព្រះសង្ឃតាមវត្តទាំង១៥១វត្ត និង៥សាលាបុណ្យដោយក្នុង១វត្ត និង១សាលាបុណ្យ ចំនួន២០០.០០០រៀល ទៀនវស្សា១គូអង្ករ១០០គីឡូក្រាម សាដកចំនួន១ ស្ករស១បាវ ២៥គីឡូក្រាម ទឹកដោះគោខាប់១កេស ទឹកក្រូច៤កេស ទឹកបរិសុទ្ធ៤កេស មី៤កេសតូច ត្រីខកំប៉ុង១កេស ស្មើ១០០កំប៉ុង។

ក្នុងឱកាសនោះដែរ ឯកឧត្តមឃួង ស្រេង អភិបាលនៃគណៈអភិបាលរាជធានីភ្នំពេញ និងលោកជំទាវជា ស៊ីណា ឃួង ស្រេង បានអញ្ជើញអុជទៀន អុជធូបនៅលើព្រះវិហារសុំសេចក្ដីសុខសប្បាយជូនប្រជាពលរដ្ឋក្នុងរាជធានីភ្នំពេញនាចូលព្រះវស្សានេះផងដែរ៕

ដោយ សួស សំរិត