AKP កំពង់ស្ពឺ ថ្ងៃទី១០ ខែកក្កដា ឆ្នាំ២០២៥-- ‎ពិធីដង្ហែទៀនព្រះវស្សាប្រគេនព្រះសង្ឃដែលគង់ចាំព្រះវស្សាចំនួន៥វត្ត  ដឹកនាំដោយលោកជំទាវ ទឹម សាវ៉ាត ទីប្រឹក្សាសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានក្រុមការងារចុះជួយឃុំភ្នំតូច រួមដំណើរដោយលោក មួង ធី អភិបាលស្រុកសាមគ្គីមុនីជ័យ ព្រមទាំងសហការី នាថ្ងៃទី១០ ខែកក្កដា ឆ្នាំ២០២៥ បាននាំយកទៀនចំណាំព្រះវស្សា និងទេយ្យទានប្រគេនព្រះសង្ឃចំនួន៥វត្ត មានឃុំភ្នំតូច ៣វត្ត ឃុំពាំងល្វា១វត្ត និងឃុំដំណាក់រាំង១វត្ត សម្រាប់ព្រះសង្ឃត្រៀមចូលព្រះវស្សានាពេលខាងមុខនេះ ត្រូវបានប្រារព្ធធ្វើឡើងនៅវត្តភ្នំតាហយ ឃុំភ្នំតូច ស្រុកសាមគ្គីមុនីជ័យ ខេត្តកំពង់ស្ពឺ។

បន្ទាប់មកតាអាចារ្យក៏បានដឹកនាំធ្វើកិច្ចនានាតាមពិធីសាសនា រួមមានការធ្វើបទនមស្សការព្រះរតនត្រ័យ សមាទានសីលជាដើម និងការវេរប្រគេនទៀនព្រះវស្សា និងទេយ្យទានទៅដល់វត្តទាំង៥ លោកជំទាវ ‎ទឹម សារ៉ាត មានប្រសាសន៍ថា ពិធីបុណ្យចូលព្រះវស្សាគឺជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេបាន រៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។ បងប្អូនដែលជាអ្នកមានជំនឿ ទៅលើព្រះពុទ្ធសាសនា តែងតែនាំគ្នាប្រារព្ធពិធីបុណ្យ ដោយនាំយកជាសាដក អង្ករ ភេសជ្ជៈ និងរបស់ប្រើប្រាស់ផ្សេងៗទៅប្រគេនព្រះសង្ឃតាមលទ្ធភាព។

‎សូមបញ្ជាក់ផងដែរថា ក្នុងពិធីប្រគេនទៀនព្រះវស្សា ទេយ្យវត្ថុ និងបច្ច័យសម្រាប់វត្តទាំង៥ ក្នុងនោះបានប្រគេនសម្ភារសម្រាប់១វត្ត រួមមាន ទៀនវស្សា១គូ អង្ករ១៥០គីឡូក្រាម មី២កេស ទឹកសុទ្ធ៣កេស ទឹកក្រូច២កេស សាដក២ សាប៊ូលាងចាន១ដប ត្រីខ១យួរ ប្រេងឆា១ដប ទឹកត្រី១យួរ ទឹកស៊ីអ៊ីវ១យួរ កាហ្វេ២កញ្ចប់ នំសាគឺរ៉ា១កេស និងថវិកា៨០ម៉ឺនរៀលផងដែរ៕

ដោយ លឹម សាន្ត