AKP សៀមរាប ថ្ងៃទី១០ ខែកក្កដា ឆ្នាំ២០២៥-- អាជ្ញាធរជាតិអប្សរាបានសហការជាមួយទីភ្នាក់ងារបេតិកភណ្ឌកូរ៉េ (Korean Heritage Agency) បាន និងកំពុងជួសជុលផ្នែកមួយនៃប្រាសាទអង្គរវត្ត គឺជ្រុងឦសាននៃរួតបាកានប្រាសាទអង្គរវត្ត ដែលបច្ចុប្បន្នកំពុងដំណើរការទៅតាមការគ្រោងទុក។

លោក Kim Dongmin អ្នកគ្រប់គ្រងគម្រោងការដ្ឋានជួសជុលនៃទីភ្នាក់ងារបេតិកភណ្ឌកូរ៉េ បានឱ្យដឹងនៅរសៀលថ្ងៃទី១០ ខែកក្កដា ឆ្នាំ២០២៥ ថា គម្រោងជួសជុលជ្រុងឦសាននៃរួតបាកាននេះបានចាប់ផ្តើមនៅក្នុងខែកុម្ភៈ ឆ្នាំ២០២៥ បន្ទាប់ពីប្រើពេលមួយឆ្នាំ គឺឆ្នាំ២០២៤ ដើម្បីស្រាវជ្រាវ និងសិក្សាពីបច្ចេកទេសដើម្បីដំណើរការជួសជុល ហើយគេគ្រោងនឹងបញ្ចប់ទាំងស្រុងនៅចុងឆ្នាំ២០២៦។ 

លោក Kim Dongmin បានបង្ហាញនូវមោទនភាពចំពោះកិច្ចសហប្រតិបត្តិការជាមួយអាជ្ញាធរជាតិអប្សរា ក្នុងការជួសជុលប្រាសាទអង្គរវត្ត ដែលជាប្រាសាទដ៏ស្កឹមស្កៃ និងខ្ពង់ខ្ពស់របស់ប្រជាជាតិកម្ពុជា និងរំពឹងថា ទៅអនាគតស្ថាប័នកូរ៉េនឹងបន្តចូលរួមលើកិច្ចការអភិរក្សក្នុងតំបន់រមណីយដ្ឋានអង្គរជាបន្តបន្ទាប់ទៀត ក្នុងន័យចូលរួមថែរក្សាសម្បត្តិបេតិកភណ្ឌវប្បធម៌របស់ពិភពលោកមួយនេះ ឱ្យកាន់តែរឹងមាំ និងគង់វង្ស។

រីឯលោក ឃាម មុនី មន្រ្តីបច្ចេកទេសនៃអាជ្ញាធរជាតិអប្សរា ដែលចូលរួមក្នុងគម្រោងជួសជុលខាងលើនេះដែរ បានលើកឡើងអំពីស្ថានភាពទ្រុឌទ្រោមនៃប្រាសាទថា ស្ថានភាពនៃខឿនថ្ម និងជណ្ដើរជ្រុងឦសាន មុនពេលជួសជុលមានការញែកនិងរហែក ដែលមើលទៅមានហានិភ័យខ្ពស់គួរឱ្យបារម្ភជាខ្លាំង។ ចំពោះបច្ចេកទេសជួសជុលវិញ ក្រុមការងារបានចាប់ផ្តើមរើថ្ម និងរៀបចំពង្រឹងឡើងវិញ ពីមួយស្រទាប់ទៅមួយស្រទាប់ដោយធានាពីភាពរឹងមាំទៅអនាគត។ ហើយបច្ចេកទេសបែបនេះត្រូវបានលោក មុនី អះអាងថា បានគោរពទៅតាមអនុសាសន៍យ៉ាងត្រឹមត្រូវ របស់អ្នកជំនាញការអាដហុក អាយស៊ីស៊ី-អង្គរ និងសំបូរព្រៃគុក។

គួរបញ្ជាក់ថា គម្រោងជួសជុលជ្រុងឦសាននៃរួតបាកានប្រាសាទអង្គរវត្តនេះ ត្រូវបានរៀបចំពិធីក្រុងពលីបើកការដ្ឋានជួសជុលនៅក្នុងខែកុម្ភៈ ឆ្នាំ២០២៥ ក្រោមវត្តមានឯកឧត្តម ឡុង កុសល អគ្គនាយករងអាជ្ញាធរជាតិអប្សរា ព្រមទាំងថ្នាក់ដឹកនាំ មន្រ្តី និងបុគ្គលិក កម្មករជួសជុលជាច្រើនរូបទៀត៕

ដោយ ហង្ស សៀក